ໃນວັນທີ 12 ທັນວາ 2023 ທີ່ຜ່ານມານີ້, ຄະນະວິທະຍາສາດທຳມະຊາດ ມະຫາວິທະຍາໄລແຫ່ງຊາດໄດ້ຈັດພິທີມອບໃບຢັ້ງຢືນການຝຶກອົບຮົມໄລຍະສັ້ນໃນຫົວຂໍ້: “Coding, programing & Data Science” ໃຫ້ນັກສຳມະນາກອນໄດ້ສຳເລັດການຝຶກອົບຮົມຈໍານວນ 26 ຄົນ ເຊິ່ງເປັນໂຄງການຮ່ວມມືລະຫວ່າງມະຫາວິທະຍາໄລແຫ່ງຊາດ ກັບ ບໍລິສັດຊໍາຊຸງເອເລັກໂຕຼນິກປະຈໍາ ສປປ ລາວ.
“ຂ້າພະເຈົ້າຂໍສະແດງຄວາມຊົມເຊີຍ ແລະ ຂໍໃຫ້ນັກສຳມະນາກອນທີ່ເປັນຜູ້ສືບທອດ, ນໍາເອົາບົດຮຽນຈາກການຝຶກອົບຮົມໄປນໍາໃຊ້ໃນວຽກງານຕົວຈິງເພື່ອພັດທະນາວຽກງານໃຫ້ມີຄວາມເຂັ້ມແຂງ, ທັນສະໄໝ, ມີມາດຕະຖານທຽບເທົ່າກັບພາກພື້ນ ແລະ ສາກົນ” ທ່ານສາດສະດາຈານປະລິນຍາເອກ ຮຸ່ງເພັດ ຈັນທະວົງ ຮອງອະທິການບໍດີມະຫາວິທະຍາໄລແຫ່ງຊາດ ກ່າວ.
ການຝຶກອົບຮົມນັບແຕ່ວັນທີ 08 ເມສາ ຈົນເຖິງ 17 ພະຈິກ 2023 ໃນຕອນຕົ້ນພາຍຫຼັງທີ່ໄດ້ມີການປະກາດຜູ້ສະໝັກຝຶກອົບຮົມ, ມີນັກສຶກສາ ແລະ ພະນັກງານ-ລັດຖະກອນມາສະໝັກເຂົ້າຝຶກອົບຮົມລວມທັງໝົດ 71 ຄົນ, ຍິງ 12 ຄົນ.
ຜ່ານການສອບເສັງຄັດເລືອກໄດ້ ເຂົ້າຝຶກອົບຮົມຕົວຈິງຈໍານວນ 30 ຄົນ, ຍິງ 07 ຄົນ; ໃນນັ້ນມີນັກສຶກສາທີ່ກໍາລັງສຶກສາ, ມີພະນັກງານ-ລັດຖະກອນມາຈາກພາກສ່ວນພາຍນອກ (ທະຫານ, ຕໍາຫຼວດ, ລັດວິສາຫະກິດ, ເອກະຊົນອື່ນໆ..) ສຳລັບຄູ-ອາຈານສອນຝຶກອົບຮົມລວມທັງໝົດ 06 ຄົນ, ຍິງ 01 ຄົນ.
ການຝຶກອົບຮົມຄັ້ງນີ້ ມີເນື້ອໃນບົດຮຽນທັງໝົດ 40 ບົດ, ແບ່ງອອກເປັນ 3 ໂມດູນ (Coding, Programming and Data Science); ຮຽນ 2 ວັນ/ອາທິດ, ໃຊ້ເວລາຮຽນ 120 ນາທີ (2 ຊົ່ວໂມງ)/ວັນ; (ໃຊ້ເວລາຮຽນທັງໝົດປະມານ 7 ເດືອນກວ່າ) Samsung Innovation Campus ໄດ້ຮັບການສະໜັບສະໜູນທາງດ້ານອຸປະກອນ, ພື້ນຖານໂຄງລ່າງ, ງົບປະມານແລະບົດຮຽນການຝຶກອົບຮົມຈາກບໍລິສັດຊໍາຊຸງເອເລັກໂຕຼນິກຢ່າງເຕັມຮູບແບບ.
ທ່ານຮອງສາດສະດາຈານປະລິນຍາເອກ ແຫຼມທອງ ລັດດາວວົງ ຄະນະບໍດີຄະນະວິທະຍາສາດທໍາມະຊາດໄດ້ລາຍງານການເຄື່ອນໄຫວຂອງໂຄງການວ່າ: “ຄູ-ອາຈານທີ່ສອນຝຶກອົບຮົມທຸກທ່ານມີຄວາມຮັບຜິດຊອບສູງ, ປະຕິບັດລະບຽບວິໄນໃນການສອນຢ່າງເຂັ້ມງວດ, ເອົາໃຈໃສ່ສິດສອນສຸດກົກ-ສຸດປາຍ, ໄດ້ເຂົ້າຮ່ວມໃນການຝຶກທົດສອບທົດລອງກ່ອນການຂຶ້ນສິດສອນຕົວຈິງທຸກຄັ້ງ”.
ທ່ານຮອງສາດສະດາຈານປະລິນຍາເອກ ແຫຼມທອງ ໄດ້ລາຍງານຕື່ມ ອີກວ່າ: ນັກສຶກສາທຸກຄົນກໍໄດ້ມີຄວາມເອົາໃຈໃສ່ສຶກສາຄົ້ນຄວ້າ-ຮໍ່າຮຽນເຊິ່ງສະແດງອອກນັກສຶກສາມີກິລິຍາມາລະຍາດທີ່ດີ, ເຂົ້າຫ້ອງຮຽນທັນເວລາທຸກຄັ້ງ, ໄດ້ສົນທະນາແລກປ່ຽນບົດຮຽນກັບອາຈານຢ່າງກົງໄປກົງມາ (ມີບັນຍາກາດທີ່ດີ).
“ອະນາຄົດຈະຖືກຂັບເຄື່ອນໂດຍປັນຍາປະດິດ (AI) ແລະ Machine Learning ເຊິ່ງທັງສອງເທັກໂນໂລຍີຕໍ່ໄປກໍາລັງປ່ຽນແປງໃຫມ່ໃນໂລກຂອງພວກເຮົາ Samsung, ພວກເຮົາກຳລັງກະກຽມສຳລັບການປ່ຽນແປງໃໝ່ນີ້ ໂດຍການເປັນສ່ວນຫນຶ່ງຂອງຂັບເຄື່ອນໃຫ້ບຸກຄະລາກອນມີຄວາມຮູ້ ແລະໄດ້ກຽມພ້ອມເຄື່ອງມືໃຫ້ພ້ອມກັບການປ່ຽນແປງໃນອານາຄົດ” ກ່າວໂດຍທ່ານນາງວໍລະວັນ ຕັ້ງກົມສະຖາພອນ ຫົວໜ້າພະແນກມືຖືຕາງໜ້າບໍລິສັດຊໍາຊຸງອີເລັກໂຕຣນິກສາຂາປະເທດໄທປະຈໍາ ສປປ ລາວ.
ສາມາດຕິດຕາມໂຄງການ Samsung Innovation Campus 2024 ໄດ້ທີ່ເພສ Facebook Samsung Laos.
#SamsungLaos #SamsungInnovationCampus #TogetherforTomorrow #Enablingpeople