“ໝໍ້ໄຟ” Battery ແມ່ນຊິ້ນສ່ວນທີ່ເປັນສະເໝືອນບ່ອນເກັບພະລັງງານສຳຮອງຂອງລົດໃຫຍ່ ເຮັດໜ້າທີ່ຈ່າຍໄຟຟ້າໃນການສະຕາດເຄື່ອງຈັກ ລວມເຖິງລະບົບວົງຈອນໄຟຟ້າອື່ນໆ ເຊິ່ງຜູ້ທີ່ໃຊ້ລົດໃຫ້ທຸກຄົນອາດຈະຮູ້ດີວ່າ ໝໍ້ໄຟນັ້ນເປັນອຸປະກອນທີ່ມີອາຍຸການໃຊ້ງານ ເມື່ອເລີ່ມພົບອາການຕ່າງໆເຊັ່ນ: ລົດເລີ່ມຕິດຍາກ, ຕາໄຟລົດຕ່າງໆ ບໍ່ຄ່ອຍແຈ້ງຄືເກົ່າ, ແວ່ນໄຟຟ້າເລື່ອນ ຂຶ້ນ-ລົງ ຊ້າກວ່າປົກກະ ຕິ ແລະ ອື່ນໆ ເຊິ່ງນັ້ນເປັນການສົ່ງສັນຍານເຕືອນເຮົາໃນເບື້ອງຕົ້ນວ່າ ໃກ້ຈະຮອດເວລາປ່ຽນໝໍ້ໄຟໜ່ວຍໃໝ່ແລ້ວ.
ສຳລັບໝໍ້ໄຟລົດໃຫຍ່ມີທັງໝົດ 4 ຊະນິດ ເຊິ່ງມັນແຕກຕ່າງກັນແນວໃດ? ຄົນຮັກລົດຄວນຮູ້ໄວ້:
- ໝໍ້ໄຟນ້ຳ ຫຼື ໝໍ້ໄຟທຳມະດາ (Conventional Battery)
- ໝໍ້ໄຟເຄິ່ງແຫ້ງ ຫຼື ແບັດ MF (Maintenance Free)
- ໝໍ້ໄຟແຫ້ງ SMF (Sealed Maintenance Free)
- ໝໍ້ໄຟໄຮບຼິດ (Hybrid Battery)
- ໝໍ້ໄຟນ້ຳ ຫຼື ໝໍ້ໄຟທຳມະດາ (Conventional Battery):
ຄືໝໍ້ໄຟຊະນິດກົ່ວກົດ ສ່ວນຜະສົມໃນໝໍ້ໄຟຊະນິດນີ້ປະກອບດ້ວຍ ໂລຫະຜະສົມລະຫວ່າງກົ່ວກັບພລວງ ຊຶ່ງໝໍ້ໄຟຊະນິດນ້ຳນີ້ ເໝາະສຳລັບຄົນທີ່ມີເວລາໃນການເບິ່ງແຍງລົດພໍສົມຄວນ ເພາະຕ້ອງໝັ່ນກວດສອບເບິ່ງລະດັບນ້ຳກັ່ນ ແລະ ຕື່ມນ້ຳກັ່ນຢ່າງສະໝ່ຳສະເໝີ ເພື່ອໃຫ້ໝໍ້ໄຟນ້ຳນັ້ນພ້ອມໃຊ້ງານຕະຫຼອດເວລາ.
ຂໍ້ດີ: ມີຄວາມທົນທານຕໍ່ການປະຈຸໄຟເກີນ ແລະ ຄາຍປະຈຸ ມີອາຍຸການໃຊ້ງານຂ້ອນຂ້າງດົນ ແລະ ທີ່ສຳຄັນລາຄາຖືກ.
ຂໍ້ເສຍ: ຕ້ອງຄອຍກວດສອບລະດັບນ້ຳກັ່ນກ່ອນການໃຊ້ງານຢູ່ສະເໝີ ອາດຈະອາທິດໜຶ່ງລະຄັ້ງຂຶ້ນຢູ່ກັບການໃຊ້ງານ ແລະ ຫາກມີການເຄື່ອນຍ້າຍໂຕໝໍ້ໄຟ ຕ້ອງລະມັດລະວັງສານລະລາຍທີ່ອາດຮົ່ວໄຫຼອອກມາໄດ້.
- ໝໍ້ໄຟເຄິ່ງແຫ້ງ ຫຼື ແບັດ MF (Maintenance Free):
ເປັນໝໍ້ໄຟທີ່ຍັງມີຮູໃຫ້ສາມາດຕື່ມນ້ຳກັ່ນໄດ້ ໝໍ້ໄຟເຄິ່ງແຫ້ງນັ້ນ ເປັນໝໍ້ໄຟທີ່ຍັງຕ້ອງເບິ່ງແຍງຢູ່ສະເໝີ ແຕ່ອາດຈະບໍ່ຕ້ອງເບິ່ງແຍງຫຼາຍເທົ່າກັບໝໍ້ໄຟນ້ຳ ໂດຍໝັ່ນກວດສອບລະດັບນ້ຳກັ່ນປີລະ 1-2 ເທື່ອເທົ່ານັ້ນ, ເນື່ອງຈາກນ້ຳກົດພາຍໃນໝໍ້ໄຟເຄິ່ງແຫ້ງນັ້ນຈະເຂັ້ມກວ່ານ້ຳກົດໃນໝໍ້ໄຟຊະນິດນ້ຳຫຼາຍ ເຮັດໃຫ້ລະເຫີຍອາຍໄດ້ຊ້າກວ່າ.
ຂໍ້ດີ: ບໍ່ຕ້ອງກວດເຊັກ ຫຼື ຄອຍຕື່ມນ້ຳກັ່ນເປັນປະຈຳເທົ່າກັບໝໍ້ໄຟນ້ຳ ເພາະພາຍໃນໝໍ້ໄຟມີການປ້ອງກັນການລະເຫີຍຂອງນ້ຳກັ່ນທີ່ແໜ້ນໜາພໍສົມຄວນ.
ຂໍ້ເສຍ: ເຖິງວ່າຈະບໍ່ຕ້ອງໝັ່ນຕື່ມນ້ຳກັ່ນຢູ່ຕະຫຼອດ ແຕ່ກໍຕ້ອງໝັ່ນກວດເຊັກຢູ່ສະໝ່ຳສະເໝີ ເພາະອາຍຸການໃຊ້ການອາດຈະບໍ່ດົນເທົ່າໝໍ້ໄຟນ້ຳ.
- ໝໍ້ໄຟແຫ້ງ SMF (Sealed Maintenance Free):
ເປັນໝໍ້ໄຟທີ່ໄດ້ຮັບຄວາມນິຍົມຫຼາຍໃນປັດຈຸບັນ ເນື່ອງຈາກວ່າໝໍ້ໄຟແຫ້ງນັ້ນ ບໍ່ຈຳເປັນຕ້ອງເບິ່ງແຍງຫຍັງເລີຍ ອາດຈະເໝາະກັບຄົນໃນຍຸກປັດຈຸບັນ ເພາະບໍ່ຕ້ອງຄອຍຕື່ມນ້ຳກັ່ນ ແລະ ໝໍ້ໄຟແຫ້ງນັ້ນ ສາມາດປ່ອຍຖິ້ມໄວ້ໃນສະພາບບໍ່ມີປະຈຸໄຟໄດ້ດົນກວ່າໝໍ້ໄຟທຳມະດາ ໄດຍບໍ່ຕ້ອງສາກໄຟກະຕຸ້ນ.
ຂໍ້ດີ: ເໝາະສຳລັບຜູ້ທີ່ບໍ່ມີເວລາເບິ່ງແຍງລົດ ບໍ່ຕ້ອງກວດເຊັກຕະຫຼອດ, ບໍ່ຕ້ອງຕື່ມນ້ຳກັ່ນ, ໝໍ້ໄຟບໍ່ໝົດ ເຖິງຈະບໍ່ໄດ້ໃຊ້ເປັນເວລາດົນ.
ຂໍ້ເສຍ: ມີລາຄາຂ້ອນຂ້າງສູງກວ່າໝໍ້ໄຟນ້ໍາ ແລະ ໝໍ້ໄຟເຄິ່ງແຫ່ງ ແລະ ບ່ອນໂຕໝໍ້ໄຟຈະມີຮູລະບາຍອາກາດ ທີ່ຂ້ອນຂ້າງນ້ອຍ ຊຶ່ງອາດອຸດຕັນໄດ້ງ່າຍ ແລະ ສົ່ງຜົນເຮັດໃຫ້ເກີດບັນຫາພາຍໃນໝໍ້ໄຟໄດ້ອີກດ້ວຍ.
- ໝໍ້ໄຟໄຮບຼິດ (Hybrid Battery):
ຄືໝໍ້ໄຟທີ່ໄດ້ຮັບການພັດທະນາມາຈາກໝໍ້ໄຟນ້ຳ ພາຍໃນໂຕໝໍ້ໄຟນັ້ນຈະປະກອບດ້ວຍໂລຫະປະສົມກົ່ວ ກັບ ແຄລຊ້ຽມສະເພາະແຜ່ນທາດລົບ, ເພື່ອເປັນການແກ້ໄຂຂໍ້ເສຍຂອງໝໍ້ໄຟນ້ຳ ທີ່ມີການລະເຫີຍຂອງນ້ຳກັ່ນທີ່ສູງຫຼາຍ ຊຶ່ງໝໍ້ໄຟໄຮບຼິດນີ້ ຈະມີອັດຕາການລະເຫີຍຂອງນ້ຳກັ່ນ ໜ້ອຍກວ່າໝໍ້ໄຟທຳມະດາຫຼາຍ, ໝໍ້ໄຟໄຮບຼິດ ມັກໃຊ້ກັບລົດທີ່ໃຊ້ງານໜັກໆເຊັ່ນ: ລົດບັນທຸກ, ລົດໂດຍສານ ຫຼື ລົດຮັບຈ້າງ ເປັນຕົ້ນ.
ຂໍ້ດີ: ມີການລະເຫີຍຂອງນຳ້ກັ່ນໜ້ອຍກວ່າໝໍ້ໄຟລຸ້ນທຳມະດາຫຼາຍ ເຮັດໃຫ້ສາມາດໃຊ້ງານໄດ້ຢ່າງຍາວນານ.
ຂໍ້ເສຍ: ມີລາຄາສູງຫຼາຍ ມັກໃຊ້ກັບລົດຂະໜາດໃຫຍ່.
ແລ້ວໝໍ້ໄຟລົດໃຫຍ່ແບບໃດດີທີ່ສຸດ?
ໝໍ້ໄຟແຕ່ລະຊະນິດ ຕ່າງກໍມີທັງຂໍ້ດີ ແລະ ຂໍ້ເສຍ ແຕກຕ່າງກັນອອກໄປ ຊຶ່ງຄົງຕ້ອງຂຶ້ນຢູ່ກັບຄວາມຕ້ອງການຂອງຜູ້ໃຊ້ລົດ ວ່າຈະເລືອກໃຊ້ແບບໃດດີ, ຫາກຕ້ອງການໝໍ້ໄຟທີ່ທົນທານ, ລາຄາຖືກ ໝໍ້ໄຟນ້ຳ ເບິ່ງຄືຈະຕອບໂຈດໄດ້ດີທີ່ສຸດ ແຕ່ຕ້ອງແລກກັບການທີ່ເຮົາຕ້ອງໝັ່ນກວດສອບເບິ່ງແຍງລະດັບນ້ຳກັ່ນເປັນປະຈຳຢ່າງສະໝ່ຳສະເໝີ, ສ່ວນຜູ່ໃດທີ່ມັກສະຕາດລົດແລ້ວຂັບອອກໄປເຮັດວຽກທັນທີ ບໍ່ມີເວລາທີ່ຈະມາກວດເຊັກຫຍັງ ແລະ ບໍ່ຕິເລື່ອງລາຄາ ໝໍ້ໄຟແຫ້ງເໝາະສົມທີ່ສຸດ ບໍ່ຕ້ອງຕື່ມນ້ຳກັ່ນ, ໄຟບໍ່ໝົດເຖິງບໍ່ຄ່ອຍໄດ້ໃຊ້ລົດ ແຕ່ທ່ານອາດຈະໃຊ້ເສຍເງິນຫຼາຍຂຶ້ນແດ່ ເພື່ອແລກກັບຄວາມສະບາຍ, ຢ່າງໃດກໍຕາມຜູ້ໃຊ້ລົດກໍຄວນສຶກສາຫາຂໍ້ມູນເພີ່ມຕື່ມຈາກຜູ້ຮູ້ວ່າ: ລົດຂອງແຕ່ລະທ່ານເໝາະສົມກັບໝໍ້ໄຟແບບໃດ.