ປັດຈຸບັນ ສະພາບການລະບາດຂອງໄຂ້ຍຸງລາຍ ຍັງສືບຕໍ່ລະບາດໃນຂອບເຂດທົ່ວປະເທດ ບໍ່ວ່າຈະຢູ່ໃນໄລຍະລະດູຝົນ ແລະ ລະດູໜາວ, ໂດຍສະເພາະ ປີ 2024 ມີຜູ້ເສຍຊິວິດຍ້ອນໄຂ້ຍຸງລາຍ ແລ້ວ 1 ຄົນ, ເປັນເພດຊາຍ ອາຍຸ 33 ປີ, ພັກຢູ່ຫ້ອງແຖວຫໍພັກບຸນເກີດ, ບ້ານສີເກີດ, ເມືອງ ນາຊາຍທອງ, ນະຄອນຫຼວງ ວຽງຈັນ ໃນວັນທີ 20 ກຸມພາ 2024 ຜ່ານມາ.
ສູນຂ່າວສານການແພດສຸຂະສຶກສາ ລາຍງານວ່າ: ນັບຕັ້ງແຕ່ຕົ້ນເດືອນມັງກອນ 2024 ຈົນຮອດປັດຈຸບັນ, ມີຜູ້ປ່ວຍໄຂ້ຍຸງລາຍ ສະສົມແລ້ວ 1.053 ກໍລະນີ, ໃນນັ້ນ ມີຜູ້ປ່ວຍໄຂ້ຍຸງລາຍຫຼາຍກວ່າໝູ່ແມ່ນແຂວງເຊກອງ 296 ກໍລະນີ, ນະຄອນຫຼວງວຽງຈັນ 217 ກໍລະນີ, ຫຼວງນໍ້າທາ 173 ກໍລະນີ ແລະ ແຂວງ ອື່ນໆ ອີກ.
ສໍາລັບ ປີ 2023 ທີ່ຜ່ານມາ, ໃນທົ່ວປະເທດລາວ ມີຜູ້ປ່ວຍໄຂ້ຍຸງລາຍທັງໝົດ 35.317 ກໍລະນີຄົນ ແລະ ມີຜູ້ເສຍຊີວິດ ທັງໝົດ 20 ຄົນ (ນະຄອນຫຼວງວຽງຈັນ 3 ຄົນ, ແຂວງຄໍາມ່ວນ 1 ຄົນ, ສະຫວັນນະເຂດ 2 ຄົນ, ບໍລິຄໍາໄຊ 5 ຄົນ, ວຽງຈັນ 3 ຄົນ, ໄຊຍະບູລີ 2 ຄົນ, ອຸດົມໄຊ 1 ຄົນ, ອັດຕະປຶ 2 ຄົນ ແລະ ເຊກອງ 1 ຄົນ).
ພະຍາດໄຂ້ຍຸງລາຍ ເປັນອີກພະຍາດໜຶ່ງ ຕ້ອງໄດ້ເອົາໃຈໃສ່ ເຝົ້າລະວັງຢ່າງເຂັ້ມງວດ ເພາະຍັງມີທ່າອ່ຽງເພີ່ມຂຶ້ນເລື້ອຍໆ ແລະ ແຜ່ລະບາດຢ່າງກວ້າງຂວາງໃນທົ່ວປະເທດ. ສະນັ້ນ ເພື່ອຫຼດຜ່ອນການແຜ່ເຊື້ອໄຂ້ຍຸງລາຍ, ໃຫ້ທຸກຄົນຕ້ອງເອົາໃຈໃສ່ ກໍາຈັດແຫຼ່ງເພາະພັນຍຸງລາຍໃຫ້ໝົດ, ຊຶ່ງມີຫຼາຍວິທີ ຄວນດໍາເນີນການ ແຕ່ກ່ອນຍັງບໍ່ທັນເປັນໜອນນໍ້າ ຈະດີທີ່ສຸດ ພຽງທຳລາຍແຫຼ່ງນ້ຳຂັງພາຍໃນເຮືອນ ແລະ ນອກເຮືອນ ທີ່ເປັນແຫຼ່ງກຳເນີດຂອງຍຸງ, ປ່ຽນນໍ້າທຸກໆ 7 ວັນ ພ້ອມອະນາໄມພາຊະນະທີ່ໃຊ້, ພຽງເທົ່ານີ້ຍຸງລາຍກໍຈະໝົດສິ້ນ ແລະ ຄອບຄົວ ກໍຈະມີ ຄວາມປອດໄພ ຈາກການຕິດເຊື້ອໄຂ້ຍຸງລາຍ.
ຂໍ້ມູນຈາກ: ສູນຂ່າວສານການແພດສຸຂະສຶກສາ Centre of Information and Education for Health