ກອງເລຂາຄະນະກຳມະການ ຈັດງານມະຫະກຳກິລາມະຫາວິທະຍາໄລລາວ ຄັ້ງທີ 2 ໄດ້ຈັດກອງປະຊຸມປຶກສາຫາລື ກັບບັນດາອະນຸກຳມະການຝ່າຍຕ່າງໆ ເພື່ອກະກຽມໃສ່ການເປີດງານມະຫະກຳກິລາມະຫາວິທະຍາໄລລາວ ຄັ້ງທີ 2 ໃນລະຫວ່າງ ວັນທີ 5-14 ພຶດສະພາ 2024 ທີ່ຈະເຖິງນີ້ ໂດຍການເປັນປະທານຂອງ ທ່ານຮອງສາດສະດາຈານ ສິນທະວອນ ດາລາວົງ ຮອງອະທິການບໍດີ ມະຫາວິທະຍາໄລແຫ່ງຊາດ ທັງເປັນຮອງປະທານຮັບຜິດຊອບຈັດງານມະຫະກຳກິລາມະຫາວິທະຍາໄລລາວ ຄັ້ງທີ 2, ມີບັນດາຫົວໜ້າ ແລະ ຮອງອະນຸກຳມະການຝ່າຍຕ່າງໆຂອງກອງເລຂາຄະນະຈັດງານເຂົ້າຮ່ວມ ເຊັ່ນ: ອະນຸກຳມະການເນື້ອໃນ; ອະນຸກຳມະການບໍລິຫານ-ບໍລິການ; ອະນຸກຳມະການພິທີການ, ຕ້ອນຮັບ ແລະ ຈັດຫາອາສາສະໝັກ; ອະນຸກຳມະການຂ່າວສານ ແລະ ຍ້ອງຍໍ; ອະນຸກຳມະການພິທີເປີດ-ປິດ ແລະ ອະນຸກຳມະການການແພດ.
ງານມະຫະກຳກິລາມະຫາວິທະຍາໄລລາວ ຄັ້ງທີ 2 ຈະໄຂຂຶ້ນໃນລະຫວ່າງ ວັນທີ 5 ເຖິງ 14 ພຶດສະພາ 2024 ເຊິ່ງມະຫາວິທະຍາແຫ່ງຊາດ ເປັນເຈົ້າພາບ ໂດຍມີການແຂ່ງຂັນທັງໝົດ 14 ປະເພດກິລາ ເຊັ່ນ: ບານເຕະ (ຊາຍ-ຍິງ), ບານສົ່ງ (ຮົ່ມ ແລະ ຫາດຊາຍ), ບານບ້ວງ 3×3, ເປຕັງ, ຢູໂດ, ເທຄວັນໂດ, ປັນຈັກສີລັດ, ດອກປີກໄກ່, ກະຕໍ້ ແລະ ອີ-ສະປອດ ເຊິ່ງ 10 ປະເພດ ແມ່ນຈະຈັດຢູ່ໃນບໍລິເວນເຂດ ມຊ ດົງໂດກ ຍົກເວັ້ນກິລາ ຢູໂດ ຈະຈັດຢູ່ສູນບູໂດເຊັນເຕີ.
ສ່ວນພິທີເປີດ-ປິດ ໃນຄັ້ງນີ້ ຈະຈັດຢູ່ເດີ່ນໃນຮົ່ມ ໃນຮູບແບບກະທັດຮັດ ສອດຄ່ອງກັບຍຸກສະໄໝໃໝ່ ແລະ ມີເນື້ອໃນ.
ຂ່າວ-ພາບ: ຄົນຂ້າງສະໜາມ
