ຜົນງານການວິໄຈທີ່ຕີພິມລົງໃນ ວາລະສານ ປະສາດວິທະຍາ ທີ່ທຳການທົດລອງໜູ ພົບວ່າ ການນອນບໍ່ພຽງພໍ ອາດເປັນການທຳລາຍຈຸລັງສະໝອງທີ່ເຮົາບໍ່ຮູ້ໂຕ.
ນັກວິທະຍາສາດ ຈາກ ມະຫາວິທະຍາໄລ ເພນຊິນວາເນຍ ແຫ່ງ ສະຫະລັດ ອາເມຣິກາ ໄດ້ທຳການທົດລອງກັບໜູ ເພື່ອຈຳລອງສະຖານະການ ແບບດຽວກັບມະນຸດທີ່ເຮັດວຽກໃນເວລາກາງຄືນ ຫຼື ເຮັດວຽກໜັກເກີນກວ່າເວລາປົກກະຕິ ແລະ ນອນໜ້ອຍກວ່າ 4-5 ຊົ່ວໂມງຕໍ່ມື້ ກ່ອນທີ່ຈະທຳການສຶກສາຈຸລັງສະໝອງຂອງໜູ ທີ່ເຮັດໜ້າທີ່ໃນການກະຕຸ້ນໃຫ້ສະໝອງຕື່ນໂຕ.
ທີມວິໄຈພົບວ່າ ຫຼັງຈາກຜ່ານໄປ 2-3 ມື້ ໜູທົດລອງສູນເສຍຈຸລັງສະໝອງ ໃນສ່ວນຂອງກ້ານສະໝອງໄປເຖິງ 25%. ການຄົ້ນພົບດັ່ງກ່າວ ນັບວ່າ ເປັນຫຼັກຖານການຄົ້ນພົບ ການສູນເສຍຈຸລັງສະໝອງຈາກ ການນອນໜ້ອຍເປັນຄັ້ງທຳອິດ.
ທີມນັກວິທະຍາສາດ ລະບຸວ່າ: ມັນຈຳເປັນຕ້ອງມີການສຶກສາເພີ່ມຫຼາຍກວ່ານີ້ ໂດຍຈະທຳການສຶກສາສະໝອງຂອງຄົນທີ່ເຮັດວຽກໃນໄລຍະເວລາກາງຄືນ ຫຼັງຈາກເສຍຊີວິດ ເພື່ອວິໄຈເບິ່ງວ່າ ຜົນຈາກການນອນບໍ່ພຽງພໍ ຈະສົ່ງຜົນຕໍ່ຈຸລັງສະໝອງຂອງມະນຸດ ນຳຫຼືບໍ່? ນອກຈາກນີ້ ການສຶກສາດັ່ງກ່າວ ອາດນຳໄປສູ່ການຄິດຄົ້ນຢາທີ່ສາມາດປົກປ້ອງຈຸລັງສະໝອງທີ່ອາດສູນເສຍໄປຈາກ ການນອນບໍ່ພຽງພໍໄດ້ອີກດ້ວຍ.