ຖ້າໃຜຮູ້ໂຕວ່າ ໂຕເອງຕ້ອງຂັບລົດໄກໆ ສິ່ງທຳອິດທີ່ຄວນຄຳນຶງ ກໍຄື ການພັກຜ່ອນໃຫ້ພຽງພໍ ເພື່ອໃຫ້ໄດ້ມີສະຕິທີ່ດີ, ບໍ່ຫຼັບໃນ. ຖ້າພັກຜ່ອນມາບໍ່ພຽງພໍ ຮ່າງກາຍຈະອ່ອນເພຍ ຮູ້ສຶກເຫງົານອນຈົນຕ້ອງຢຸດນອນພັກຜ່ອນແຄມທາງ ຊຶ່ງມັນເປັນສິ່ງທີ່ອັນຕະລາຍທີ່ສຸດຂອງການນອນໃນລົດ, ແຕ່ດ້ວຍຄວາມຮັກສະບາຍ ຄົນສ່ວນຫຼາຍຈຶ່ງເລືອກທີ່ຈະເປີດແອລົດປະໄວ້ຂະນະນອນຫຼັບນັ້ນ ຖືເປັນສິ່ງອັນຕະລາຍຕໍ່ຊີວິດ.
ຫວ່າງບໍ່ດົນມານີ້ ຜູ້ຊ່ຽວຊານດ້ານສຸຂະພາບ ຈາກ ກະຊວງສາທາລະນະສຸກ ຈາກປະເທດໄທ ເຜີຍວ່າ: ປະເທດໄທພົບບັນຫາປະຊາຊົນເສຍຊີວິດ ໃນຂະນະທີ່ນອນຫຼັບຢູ່ໃນລົດທີ່ຕິດຈັກ ແລະ ເປີດແອໄດ້ທຸກປີ ປີລະປະມານ 1-2 ຄົນ. ການຈອດລົດຕິດຈັກໄວ້ພ້ອມທັງເປີດແອນອນ ແລະ ປິດແວ່ນທີ່ແຈບນັ້ນ ເປັນເລື່ອງທີ່ອັນຕະລາຍຫຼາຍ ເພາະເທົ່າກັບວ່າ ເຮົາກຳລັງນອນດົມກ໊າສພິດຢູ່ໃນລົດ ຊຶ່ງກ໊າສພິດ ທີ່ເຮັດໃຫ້ເສຍຊີວິດໄດ້ແກ່ ກ໊າສຄາບອນ ມໍນໍໄຊ (Carbon monoxide; CO) ຊຶ່ງເປັນກ໊າສບໍ່ມີສີ, ບໍ່ມີກິ່ນ ຢູ່ໃນລະບົບອາຍເສຍຂອງລົດທີ່ເກີດຈາກການເຜົາໄໝ້ນໍ້າມັນ, ກ໊າສສາມາດໄຫຼວຽນເຂົ້າມາພາຍໃນໂຕລົດ ໄດ້ທາງລະບົບແອຢູ່ໃນລົດໃຫຍ່ ຊຶ່ງຈະມີການດູດອາກາດຈາກພາຍນອກ ແລະດູດເອົາຄວັນຈາກທໍ່ອາຍເສຍ ລົດໃຫຍ່ເຂົ້າມາໝຸນວຽນພາຍໃນລົດພ້ອມ. ສະນັ້ນ ຜູ້ທີ່ນອນຢູ່ພາຍໃນລົດ ຈຶ່ງສູດກ໊າສພິດຊະນິດນີ້ເຂົ້າໄປສະສົມໄວ້ໃນຮ່າງກາຍໂດຍບໍ່ຮູ້ໂຕ.
ເມື່ອກາສຄາບອນ ມໍນໍໄຊ ເຂົ້າສູ່ຮ່າງກາຍ ຈະເຂົ້າໄປລວມໂຕກັບ ຮີໂມໂກບິນ ໃນເມັດເລືອດແດງໄດ້ດີກວ່າ ກ໊າດ ອອກຊີເຈນເຖິງ 200-250 ເທົ່າໂຕ ສົ່ງຜົນໃຫ້ຄວາມສາມາດຂອງເມັດເລືອດແດງ ໃນການນຳພາອອກຊີເຈນ ໄປລ້ຽງເປືອກຕ່າງໆທົ່ວຮ່າງກາຍ ແລະສະໝອງຫຼຸດລົງເລື້ອຍໆ, ເຮັດໃຫ້ຮ່າງກາຍຂາດອອກຊີເຈນ ຜູ້ທີ່ສູດດົມຈະມີອາການເຈັບຫົວ, ອ່ອນເພຍ, ປວດຮາກ ທີ່ຮຸນແຮງອາດບໍ່ຮູ້ສຶກໂຕ, ລະບົບຫາຍໃຈລົ້ມເຫຼວ ແລະເສຍຊີວິດໄດ້.
ກ໊າດຄາບອນ ມໍນໍໄຊ ພົບໄດ້ໃນອາຍເສຍລົດທີ່ໃຊ້ນຳ້ມັນແອັດຊັງ ຫຼາຍກວ່ານຳ້ມັນເຊື້ອໄຟ ຊະນິດອື່ນ ປ່ອຍອອກມາຫຼາຍທີ່ສຸດຂະນະລົດຕິດຈັກ ແລະຈອດຢູ່ບ່ອນເກົ່າ.
ໃນການປ້ອງກັນບັນຫາການເສຍຊີວິດດັ່ງກ່າວ ໃຫ້ເຮົາກຽມໂຕໃຫ້ພ້ອມກ່ອນເດີນທາງໃນກໍລະນີທີ່ຕ້ອງຂັບລົດໃນໄລຍະທາງໄກ ໂດຍພັກຜ່ອນໃຫ້ພຽງພໍຢ່າງໜ້ອຍ 8 ຊົ່ວໂມງ ແລະ ລະຫວ່າງການເດີນທາງ ຄວນແວ່ພັກຜ່ອນເພື່ອປັບປ່ຽນອະລິຍະບົດທຸກໆ 2 ຊົ່ວໂມງ ເພື່ອປ້ອງກັນອາການເຫງົານອນ.
ຖ້າຫາກຂັບລົດແລ້ວຮູ້ສຶກງ່ວງນອນ ຈຳເປັນຕ້ອງຈອດນອນພັກຜ່ອນຢູ່ໃນລົດ ກໍສາມາດເຮັດໄດ້ 2 ວິທີ ຄື:
1) ເມື່ອຈອດລົດແລ້ວ ຄວນມອດຈັກລົດ ເປີດແວ່ນລົງປະມານ 2-3 ຊັງຕີແມັດ ເພື່ອເປີດລະບາຍໃຫ້ອາກາດຈາກພາຍນອກ ຊຶ່ງມີ ອົກຊີແຊນ ປະມານ 20% ເຂົ້າມາໝຸນວຽນຖ່າຍເທພາຍໃນລົດ ແຕ່ຫ້າມເປີດແອ ແລະ ຫ້າມປິດແວ່ນລົດໂດຍເດັດຂາດ.
2) ເປີດພັດລົມແອ ໂດຍບິດກະແຈໄປທີ່ຈັງຫວະອອນ (ON) ເພື່ອໃຫ້ລະບົບໄຟຟ້າໃນລົດເຮັດວຽກ ແລ້ວຈຶ່ງບິດເປີດສະວິກແອ, ເມື່ອເປີດແລ້ວ ໃຫ້ເລືອກປຸ່ມທີ່ຂຽນວ່າ A/C ຫຼື ປຸ່ມທີ່ມີຮູບລົດ ແລະມີລູກສອນຊີ້ ເຂົ້າມາໃນໂຕລົດຈາກພາຍນອກ ເມື່ອເລືອກກົດປຸ່ມດັ່ງກ່າວ ພັດລົມແອຍັງສາມາດດູດອາກາດເຂົ້າມາໝຸນວຽນໃນຫ້ອງໂດຍສານໄດ້ອີກ ແລະຄວນນອນພັກຜ່ອນປະມານ 30-40 ນາທີ ໃຫ້ຜ່ອນຄາຍຄວາມອ່ອນເພຍ ເມື່ອພ້ອມແລ້ວຈຶ່ງອອກເດີນທາງຕໍ່.