ການນອນຫຼັບ ເປັນການພັກຜ່ອນດີທີ່ສຸດສຳລັບຮ່າງກາຍ ເພາະຊ່ວຍເພີ່ມ ແລະຮັກສາປະສິດທິພາບ ການເຮັດວຽກຂອງອະໄວຍະວະຕ່າງໆ ໃຫ້ສົມບູນແຂງແຮງ. ໃນຂະນະດຽວກັນຜົນເສຍຂອງການນອນບໍ່ພຽງພໍ ຈະເຮັດໃຫ້ຈຸລັງຕ່າງໆ ເສື່ອມສະພາບ, ນຳ້ໜັກເພີ່ມ, ບໍ່ສົດຊື່ນ, ອ່ອນເພຍ ແລະອາລົມປ່ຽນແປງງ່າຍ. ໜຶ່ງໃນເຄັດລັບທີ່ເຮັດໃຫ້ທ່ານນອນຫຼັບໄດ້ດີກໍຄື ອາຫານທຸກຄາບທີ່ທ່ານກິນເຂົ້າໄປນັ້ນເອງ.
ເຂົ້າເຊົ້າ: ການວາງແຜນກິນອາຫານເພື່ອການນອນຫຼັບທີ່ດີນັ້ນ ບໍ່ໄດ້ເລີ່ມທີ່ເຂົ້າແລງພຽງຢ່າງດຽວ ແຕ່ຄ້ອງກຽມພ້ອມກັນຕັ້ງແຕ່ຕອນເຊົ້າ ເພາະມັນຈະຊ່ວຍໃຫ້ຮ່າງກາຍຕື່ນໂຕ ເນື່ອງຈາກຮ່າງກາຍໄດ້ຮັບພະລັງງານຢ່າງພຽງພໍ. ເຂົ້າເຊົ້າ ຄວນປະກອບດ້ວຍອາຫານປະເພດ ໂປຕິນ, ຊີ້ນສັດ, ໄຂ່, ເຂົ້າ, ທາດແປ້ງ ລວມທັງອາຫານທີ່ມີໄຂມັນອີກດ້ວຍ. ການບໍ່ກິນເຂົ້າເຊົ້າ ຈະເຮັດໃຫ້ຮູ້ສຶກຫິວຫຼາຍໃນຕອນສວາຍ ແລະມັກຈະກິນອັນໃດກໍຕາມທີ່ຢູ່ຕໍ່ໜ້າ ໂດຍຂາດຄວາມຢັ້ງມືຈັບ. ສຳລັບຜູ້ທີ່ມັກກິນໜ້ອຍໃນຕອນເຊົ້າ ຄວນມີອາຫານວ່າງ ກ່ອນຮອດເຂົ້າສວາຍ ເຊັ່ນ ແຊນວິດ, ເຂົ້າໜົມປັງ, ຊາລາເປົາ ຫຼືໝາກໄມ້ຕ່າງໆ; ຍົກເວັ້ນໝາກໄມ້ດອງ.
ເຂົ້າສວາຍ: ພະລັງງານຂອງອາຫານຄາບນີ້ ຄວນໜ້ອຍກວ່າເຂົ້າເຊົ້າ ໂດຍອາດຈະເລືອກກິນອາຫານທີ່ປຸງຈາກເຂົ້າ ຫຼືແປ້ງ ທີ່ບໍ່ຜ່ານການຂັດສີ ເຊັ່ນ ເຂົ້າກ້ອງ, ເຂົ້າໜົມປັງ ແລະຊີ້ນສັດທີ່ບໍ່ຕິດມັນ. ນອກນີ້ ຄວນມີຜັກ ແລະໝາກໄມ້ເປັນປະຈຳ ຫຼື ຈະກິນເຂົ້າໜົມສະຫຼັບແດ່ກໍໄດ້ ແຕ່ຄວນເນັ້ນທີ່ເຂົ້າໜົມເຮັດຈາກຖົ່ວ. ສ່ວນເຄື່ອງດື່ມ ຄວນຫຼີກເວັ້ນນຳ້ຫວານ ຫຼືນຳ້ອັດລົມ ທີ່ມີສານ ກາເຟອິນ ເປັນສ່ວນປະສົມ.
ເຂົ້າແລງ: ເປັນຄາບເຂົ້າທີ່ໃກ້ເວລານອນ ຊຶ່ງຂໍ້ແນະນຳຈາກນັກໂພຊະນາການ ທີ່ຄວນເຮັດ ແລະຄວນຫຼີກເວັ້ນ ເພື່ອຊ່ວຍໃຫ້ຫຼັບຢ່າງສະບາຍ ຄວນເຮັດດັ່ງຕໍ່ໄປນີ້:
- ກິນໃຫ້ຖືກເວລາ ເພື່ອໃຫ້ຮ່າງກາຍເກີດຄວາມລຶ້ງ ແລະຄວນກິນກ່ອນເຂົ້ານອນຢ່າງໜ້ອຍ 3 ຊົ່ວໂມງ ເພາະນອກຈາກຈະເຮັດໃຫ້ຮ່າງກາຍບໍ່ຕ້ອງເຮັດວຽກໜັກໃນຍາມນອນແລ້ວ ຍັງຊ່ວຍປ້ອງກັ ແລະບັນເທົາອາການກົດໄຫຼກັບ ຊຶ່ງມີຜົນຕໍ່ສຸຂະພາບຂອງການນອນ.
- ຫຼີກເວັ້ນອາຫາທີ່ມີພະລັງງານສູງ, ອາຫານທີ່ມີລິດເປັນທາດຮ້ອນ ເຊັ່ນ ອາຫານທອດ, ອາຫານມນ, ກະທິ, ເຂົ້າໜົມທີ່ມີຄີມເຂັ້ມຂຸ້ນ, ອາຫານເຜັດ, ຊີ້ນສັດຕິດມັນ, ອາຫານດິບ, ນຳ້ອັດລົມ. ອາຫານພວກນີ້ຈະຍ່ອຍຍາກ ເຮັດໃຫ້ຮ່າງກາຍຕ້ອງໃຊ້ເວລາໃນການເຜົາຜານດົນ ຊຶ່ງເປັນສາເຫດໜຶ່ງຂອງການນອນບໍ່ຫຼັງ. ອາຫານທີ່ຍ່ອຍງ່າຍກໍຄື ຕ້ອງປຸງດ້ວຍການ ຕົ້ມ, ໜຶ້ງ, ແກງ.
- ຈຳກັດປະລິມານໝາກໄມ້: ໂດຍສະເພາະຊະນິດທີ່ມີນຳ້ຕານສູງ ໂດຍມັກຈະມີລິດຮ້ອນ ເຮັດໃຫ້ຮ່າງກາຍຕ້ອງໃຊ້ພະລັງງານ ໃນການເຜົາຜານຫຼາຍ ຊຶ່ງເປັນການກະຕຸ້ນໃຫ້ຮ່າງກາຍຕື່ນໂຕ ເຊັ່ນ ຖົ່ວລຽນ, ລຳໄຍ, ໝາກມີ້. ຖ້າມັກກິນໝາກໄມ້ພວກນີ້ ໃຫ້ເລື່ອນໄປກິນຕອນເຊົ້າແທນ. ນອກຈາກນີ້ ຍັງບໍ່ຄວນກິນໝາກໄມ້ແທນເຂົ້າແລງ ລວມເຖິງບໍ່ຄວນດື່ມນຳ້ໝາກໄມ້ ຫຼື ກິນໝາກໄມ້ຄັ້ງລະຫຼາຍໆ ເພາະສານອາຫານຫຼັກຂອງໝາກໄມ້ ກໍຄື ຄາໂບໄຮເດຣດ ຫຼື ນຳ້ຕານ. ແຕ່ວ່າ ຄວນເລືອກກິນໝາກໄມ້ແທນເຂົ້າໜົມຫວານ ທີ່ມີສ່ວນປະສົມຂອງກະທິ.
- ຫຍຳ້ອາຫານໃຫ້ແຫຼກ: ເພາະເຂົ້າແລງເປັນຄາບທີ່ມີເວລາໃນການກິນຫຼາຍກວ່າຄາບອື່ນ ຈຶ່ງຖືເປັນໄລຍະຈັງຫວະທີ່ເຮົາຄວນຫຍຳ້ອາຫານຫຼາຍໆຄັ້ງ ຊຶ່ງຈະເກີດຜົນກີຕໍ່ຮ່າງກາຍ ຄື ເຮັດໃຫ້ອີ່ມງ່າຍ, ບໍ່ລົບກວນການເຮັດວຽກຂອງລະບົບຍ່ອຍ ແລະດູດຊຶມຂອງກະເພາະອາຫານ ແລະລຳໄສ້.
- ກິນເຂົ້າ: ແປ້ງທີ່ບໍ່ຜ່ານການຂັດສີ ຈະເຮັດໃຫ້ຮ່າງກາຍເກັບສະສົມ ທຣິບໂຕພານ (Tryptophan) ແລະ ກາບາ (GABA) ຊຶ່ງເປັນສານສື່ປະສາດ ໃນລະບົບປະສາດສ່ວນກາງ ທີ່ມີຄຸນສົມບັດພິເສດ ຊ່ວຍໃຫ້ຜ່ອນຄາຍ ແລະເຮັດໃຫ້ນອນຫຼັບໄດ້ດີ, ແຕ່ຕ້ອງກິນຕໍ່ເນື່ອງເປັນປະຈຳ.
- ອາຫານຈາກປາ: ຖ້າຮ່າງກາຍມີພາວະຕຶງຄຽດສູງ ເຮັດໃຫ້ນອນຫຼັບຍາກ, ດັ່ງນັ້ນ ລອງເລືອກອາຫານຈາກປາທະເລ ຊຶ່ງອຸດົມໄປດ້ວຍ ໂອເມກາ 3 ຫຼື ນຳ້ມັນປາ ແລະແມັກນີຊຽມ ຊຶ່ງເປັນສານອາຫານທີ່ຕໍ່ຕ້ານຄວາມຕຶງຄຽດ ເຊັ່ນ ເຂົ້າຕົ້ມປາ, ໜຶ້ງປາ, ແກງປາ…
- ຫຼຸດເກືອ: ທີ່ຈະເຮັດໃຫ້ຄວາມດັນເລືອດສູງຂຶ້ນ ສົ່ງຜົນໃຫ້ນອນຫຼັບຍາກ. ດັ່ງນັ້ນ ຈຶ່ງຄວນຫຼີກເວັ້ນອາຫານຈຳພວກ ໝາກໄມ້ດອງ, ສົ້ມຜັກ, ປາເຄັມ, ກຸ້ງແຫ້ງ, ໝີ່ສຳເລັດຮູບ, ມັນຝຣັ່ງທອດກອບ ລວມເຖິງການປຸງອາການເຄັດຈັດ ແລະໃສ່ແປ້ງນົວຫຼາຍ.