ພຣະພຸດທະສາສະນາ ເປັນສາສະໜາປະຈຳຊາດລາວ ເຊິ່ງໄດ້ເຂົ້າມາຕັ້ງໝັ້ນໃນດິນແດນອານາຈັກລ້ານຊ້າງເທິງສອງຟາກຝັ່ງແມ່ນ້ຳຂອງ, ແລະ ສ່ວນທີ່ເປັນປະເທດລາວເຮົານີ້ ຫຼາຍກວ່າ ໒໐໐໐ ປີ, ຄືພ້ອມກັບການເຂົ້າມາຂອງພຣະພຸດທະສາສະໜາໃນບັນດາປະເທດສຸວັນນະພູມ ຫຼື ແຫຼມທອງນີ້, ເຊິ່ງຫຼັກຖານທາງສາສະໜາວັດຖຸ, ສາສະໜາສະຖານ ໄດ້ປາກົດຕົວສອງຝາກຝັ່ງແມ່ນ້ຳຂອງເປັນຈຳນວນຫຼວງຫຼາຍ, ເປັນຕົ້ນແມ່ນຮອຍພຣະບາດ ພຣະພຸດທະຮູບຫີນຊາຍ ສີມາຫີນຕ່າງໆ. ທີ່ເປັນສັນຍາລັກຂອງພຣະພຸດທະສາສະໜາ, ໃນນັ້ນກໍມີພຣະທາດສີທັມມະຫາຍໂສກທີ່ກົມມະລຽນພຣະທາດຫຼວງ ທີ່ມີຫຼັກຖານວ່າສ້າງມາແຕ່ສະໄໝຈັນທະບຸຣີ ພສ.໒໓໖, ພຣະທາດພະນົມ ທີ່ມີຫຼັກຖານວ່າສ້າງໃນສະໄໝສີໂຄດຕະບູຣີ ແລະ ອື່ນໆ……
ພຣະພຸດທະສາສະນາເຂົ້າສູ່ລາວ ໓ ຍຸກ..ຄື:
ຍຸກທີ ໑
ພຣະພຸດທະສາສະໜາເຂົ້າສູ່ລາວຍຸກທີ່ ໑ ເຂົ້າມາຍັງອານາຈັກສີໂຄດຕະບອງ ຫຼື ໃນສະໄໝພຣະຍານັນທະເສນ ປີ ພສ.໘ ຫຼັງພຣະພຸດທະເຈົ້າປະຣິນິພານໄປແລ້ວ ໘ ປີ ໂດຍພຣະມະຫາກັດສະປະເຖຣະເຈົ້າ ພ້ອມດ້ວຍພິກຂຸອະຣະຫັນ ໕໐໐ ອົງ ໄດ້ອັນເຊີນເອົາພຣະບໍຣົມມະສາຣີຣິກະທາດ, ອຸຣັງຄະທາດ ຄື “ກະດູກຫົວ ເອີກ” ຂອງພຣະພຸດທະເຈົ້າ ມາປະດິດສະຖານ ກໍ່ອຸບມຸງໄວ້ທີ່ພູເຂົາກ້ຳພ້າ ຝັ່ງແມ່ນ້ຳຂອງກ້ຳຕາເວັນຕົກ ກົງກັບປາກເຊບັ້ງໄຟ ຄື ພຣະທາດພະນົມ ໃນປັດຈຸບັນ.
ຍຸກທີ ໒
ພຣະພຸດທະສາສະໜາເຂົ້າສູ່ລາວ ຍຸກທີ ໒ ເຂົ້າມາຍັງອານາຈັກຈັນທະບູຣີ ໃນສະໄໝພຣະຍາຈັນທະບູຣີປະສິດທິສັກ ຫຼື ພຣະຍາບູຣີຈັນອ້ວຍລ້ວຍ ໃນ ພສ.໒໓໖, ໂດຍມີພຣະອະຣະຫັນເຊື່ອຊາດ ໕ ອົງ.
ເຊິ່ງມີພຣະມະຫາສຸວັນນະເຖຣະ ເປັນປະທານ ໄດ້ອັນເຊີນເອົາພຣະບໍຣົມມະສາຣີຣິກະທາດ, ຊິນະຄຸຍຫາທາດ ຄື “ກະດູກຫົວເນົ່າ ຫຼື ກະດູກທີ່ລັບ” ຂອງພຣະພຸດທະເຈົ້າ ມາປະດິດສະຖານໄວ້ທີ່ພູເຂົາຫຼວງ, ຄືບໍຣິເວນພຣະທາດຫຼວງປັດຈຸບັນນີ້, ແລະ ພຣະທາດແຂ້ວຝາງ ບັນຈຸອຸບມຸງໄວ້ທີ່ແຄມຫ້ວຍບັງພວນ, ບໍຣິເວນພຣະທາດບັງພວນ ປັດຈຸບັນນີ້, ພຣະທາດເມືອງຫຼ້າ ປາກຫ້ວຍຫຼວງ ແລະ ຝຸ່ນຂອງພຣະພຸດທະເຈົ້າກໍ່ອຸບມຸງໄວ້ທີ່ເມືອງພວນ…
ຍຸກທີ ໓
ພຣະພຸດທະສາສະໜາເຂົ້າສູ່ລາວຍຸກທີ່ ໓ ເຂົ້າມາໃນສະໄໝເຈົ້າຟ້າງຸ່ມມະຫາຣາຊ ພສ. ໑໙໐໒ , ເຊິ່ງພຣະອົງສຳເລັດການທ້ອນໂຮມອານາຈັກລ້ານຊ້າງແລ້ວ, ກໍແຕ່ງຣາຊະທູດໄປອັນເຊີນເອົາພຣະພຸດທະສາສະໜາຈາກອານາຈັກອັງກໍ ປະເທດຂະແມ ມາປະດິດສະຖານໄວ້ທີ່ອານາຈັກຊຽງທອງ ແລະ ມີພຣະຣາຊະອາຍາໃຫ້ຫົວເມືອງຕ່າງໆ ເລີກນັບຖືຜີສາງ, ຫັນມານັບຖືພຸດທະສາສະໜາແທນ ທົ່ວພຣະຣາຊະອານາຈັກ, ໂດຍມີພຣະມະຫາປາສະມັນເຖຣະເປັນປະທານ. ໄດ້ນຳເອົາພຣະບາງ, ຕົ້ນໂພສີ, ພຣະໄຕຣປິດົກ, ພ້ອມດ້ວຍພຣະເທບລັງກາ, ພຣະປັນຍາລັງຄາ, ແລະ ບັນດິດ ຄື ນໍຣະສິງ, ນໍຣະສາດເປັນເຄົ້າ, ຂະບວນນຳເອົາພຣະພຸດທະສາສະໜາຄື ປົກບ້ານຫ້ວຍໂຮບ ແລະ ຕັ້ງວັດໄວ້ທີ່ນັ້ນ ຊື່ວ່າວັດປ່າປາສະມັນ ທີ່ ທ່າວັດພຣະບາດໃຕ້ ໄດ້ສະລັກຮອຍພຣະບາດໄວ້, ຖືເປັນການຝັງຮາກຖານພຣະພຸດທະສາສະໜາ, ລັດທິລັງກາວົງໄວ້ໃນລາວເທົ່າບັດນີ້…
ທີ່ມາ: ອັກສອນທັມລາວ-อักษรธรรมลาว
ຮຽບຮຽງ ແລະ ສະຫຼຸບຫຍໍ້ໂດຍ: ພຣະອາຈານເນືອງພິລັກ ໂຊຕິທອນ, ເຈົ້າອະທິການວັດວິຈິດທັມມາຣາມ ບ້ານວຽງຈະເລີນ, ຮອງຜູ້ອຳນວຍການວິທະຍາໄລສົງ(ອົງຕື້) ວຽງຈັນ ວັນທີ່ 06 ກັນຍາ 2014
#ຄຳຖາມ: ພຣະພຸດທະສາສະໜາເຂົ້າມາເຜີຍແຜ່ໃນລາວມີຈັກຍຸກສະໄໝ..?
#ຄຳຕອບ: ພຣະພຸດທະສາສະໜາເຂົ້າສູ່ລາວມີ ໓ ຍຸກຄື:
໑. ຍຸກອານາຈັກສີໂຄດຕະບອງ ພສ ໘ ….
- ສະໄໝພຣະຍານັນທະເສນ…
- ສາສະໜະສະຖານ: ພຣະທາດພະນົມ (ພູກ້ຳພ້າ) ແລະ ອື່ນໆ…
໒. ຍຸກອານາຈັກຈັນທະບູຣີ ພສ. ໒໓໖..
- ສະໄໝພຣະຍາບູຣີຈັນທະອ້ວຍລ້ວຍ…
- ສາສະໜະສະຖານ: ພຣະທາດຫຼວງ (ພູຫຼວງ) ແລະ ອື່ນໆ…
໓. ຍຸກທ້ອນໂຮມອານາຈັກລ້ານຊ້າງ.ພສ.໑໙໐໒…
- ສະໄໝເຈົ້າຟ້າງຸ່ມມະຫາຣາຊ…
- ສາສະໜະສະຖານ: ພຣະບາງ, ວັດປ່າປາສະມັນ, ວັດຊຽງທອງ ແລະ ອື່ນໆ…