ປະເດັນທີ່ສັງຄົມອອນລາຍກຳລັງກ່າວເຖິງກັນຮ້ອນແຮງໃນຕອນນີ້ກໍຄົງບໍ່ພົ້ນຄຳວ່າ sexual harassment ຫຼື ການຄຸກຄາມທາງເພດ “ການຄຸກຄາມທາງເພດບໍ່ແມ່ນເລື່ອງຕະຫຼົກ ແລະ ບໍ່ແມ່ນເລື່ອງທຳມະດາທີ່ເກີດຂຶ້ນແລ້ວໆໄປ”
ໜ້າເສົ້າທີ່ເວລາຄົນທີ່ຖືກກະທຳ ຫຼື ຕົກເປັນເຫຍື່ອສ່ວນຫຼາຍຈະແມ່ນ ແມ່ຍິງ-ເດັກນ້ອຍ ແລະ ຄົນສ່ວນຫຼາຍກໍມັກຈະຖືກສັງຄົມຕັ້ງຄຳຖາມຫຼາຍກວ່າຜູ້ກະທຳ(ຄົນຜິດ) ເຊິ່ງເຮັດໃຫ້ເຫຍື່ອທີ່ຖືກກະທຳເລືອກທີ່ຈະອົດທົນ, ບໍ່ກ້າບອກຄົນອ້ອມຂ້າງເພາະຮູ້ສຶກອັບອາຍ, ຢ້ານກົວ ແລະ ຈິດຕົກ ມີບັນຫາໃນການນອນຫຼັບ, ຊຶມເສົ້າ, ຮູ້ສຶກບໍ່ປອດໄພ ລວມທັງສາມາດສົ່ງຜົນກະທົບຕໍ່ການຮຽນ, ການເຮັດວຽກ ແລະ ການໃຊ້ຊີວິດປະຈຳວັນນຳອີກ.
ປັດຈຸບັນ ການຄຸກຄາມທາງເພດມີຫຼາຍຮູບແບບບໍ່ວ່າຈະເປັນ:
- ຄຸກຄາມທາງຮ່າງກາຍ: ອາດຈະຖືກອີກຝ່າຍກະທຳອານາຈານເຊັ່ນ: ການສໍາພັດໂຕ, ກອດ, ຫອມ, ຈູບ ແລະ ຂືນໃຈໂດຍທີ່ຜູ້ຖືກກະທຳບໍ່ຍິນຍອມ.
- ຄຸກຄາມດ້ວຍສາຍຕາ: ໃຊ້ສາຍຕາເບິ່ງອະໄວຍະວະຮ່າງກາຍ, ໜ້າເອິກ, ກົ້ນ ຫຼື ການໃຊ້ສາຍຕາທ່າທາງທີ່ມີຈຸດປະສົງຊື່ໄປເຖິງເລື່ອງເພດ ຈົນເຮັດໃຫ້ຜູ້ຖືກກະທຳຮູ້ສຶກຢ້ານ, ອຶດອັດ ແລະ ບໍ່ສະບາຍໃຈ.
- ຄຸກຄາມຜ່ານການໃຊ້ວາຈາ ຫຼື ຄຳເວົ້າ: ໃຊ້ຄໍາເວົ້າມີລັກສະນະທາງເພດ, ເວົ້າເຖິງຮູບຮ່າງ ຫຼື ອະໄວຍະວະຂອງຜູ້ອື່ນ ຫຼື ນຳມາເປັນມຸກຕະຫຼົກຊວນຫົວໂດຍທີ່ຜູ້ກະທຳຮູ້ສຶກອຶດອັດໃຈ.
- ຄຸກຄາມໂດຍຜ່ານການສົ່ງຂໍ້ຄວາມທາງໂທລະສັບ ຫຼື ທາງອອນລາຍ: ການໃຊ້ຄໍາເວົ້າທີ່ເຂົ້າຄ່າຍລາມົກ, ອານາຈານ, ການເວົ້າເຖິງເລື່ອງເພດສຳພັນ ລວມໄປເຖິງການສົ່ງຮູບພາບໂປ້ເປືອຍ ຫຼື ອະໄວຍະວະເພດໂດຍຜ່ານຂໍ້ຄວາມທາງ social media ໃຫ້ຜູ້ອື່ນ.
- ການເປີດເຜີຍຂອງສະຫງວນ: ການເປືອຍຮ່າງກາຍ ຫຼື ເປີດເຜີຍອະໄວຍະວະເພດໃນທີ່ສາທາລະນະຕ່າງໆ ຫຼື ການຊ່ວຍໂຕເອງໃຫ້ຜູ້ອື່ນເຫັນຖືວ່າເປັນການຄຸກຄາມທາງເພດອີກຢ່າງໜື່ງ.
ຄວາມຈິງແລ້ວ ບໍ່ວ່າຈະເປັນການຄຸກຄາມທາງໃດມັນກໍບໍ່ແມ່ນເລື່ອງທີ່ດີ ຢ່າຄິດວ່າມັນເປັນເລື່ອງຕະຫຼົກ, ເປັນເລື່ອງທຳມະດາທີ່ເກີດຂຶ້ນທົ່ວໄປ ມັນຄວນໝົດໄປ ແລະ ບໍ່ຄວນມີເພດໃດຖືກລ່ວງລະເມີດ ຫຼື ຖືກຄຸກຄາມທາງເພດ.