ຮູບເງົາເລື່ອງ “ນວນແສງ” NUANSANG (THE HEARTH OF TEACHER) ເປັນຮູບເງົາທີ່ເວົ້າເຖິງ “ອຸດົມການ ອຸປະສັກ ນໍ້າຕາ ແລະ ຄວາມຮັກ” ຂອງຄູຄົນໜຶ່ງ ທີ່ໄດ້ພົບພໍ້ມາ ແລະ ກໍເປັນຮູບເງົາລາວເລື່ອງທີ 2 ຂອງປີ 2024 ນີ້ ທີ່ຈະເຂົ້າສາຍເນື່ອງໃນໂອກາດສະເຫຼີມສະຫຼອງການເປີດສົກຮຽນໃໝ່ ສົກ 2024-2025 ທີ່ຜະລິດໂດຍ ກົມຮູບເງົາລາວ (Dept of Lao Cinema) ແລະ ເປັນຜົນງານການກຳກັບໂດຍ ທ່ານ ສົມພົງ ຜົນດີ, ຜູ້ທີ່ມີຄວາມສາມາດໃນການກຳກັບຮູບເງົາລະດັບຊາດ. ໂດຍຮູບເງົາເລື່ອງດັ່ງກ່າວຈະເຂົ້າສາຍໃນໂຮງຮູບເງົາເມເຈີ ສູນການຄ້າວຽງຈັນເຊັນເຕີ ໃນວັນທີ 19 ກັນຍາ 2024.
ທ່ານ ສົມພົງ ຜົນດີ, ຜູ້ກຳກັບຮູບເງົາ “ນວນແສງ” ໃຫ້ຮູ້ວ່າ: ຄວາມເປັນມາກ່ອນຈະມາເປັນຮູບເງົາ “ນວນແສງ”, ຊື່ເດີມຂອງບົດເລື່ອງນີ້ແມ່ນ ສາວຄູ ນວນແສງ ເປັນບົດປະພັນຂອງ ອາຈານ ສຸວັນດາ ດ. ເດືອນເພັງ ຊຶ່ງມີເນື້ອໃນກ່ຽວກັບນັກສຶກສາຍິງຄົນໜຶ່ງທີ່ຫາກໍຮຽນຈົບສາຍຄູປະຖົມຢູ່ທີ່ວິທະຍາໄລຄູດົງຄຳຊ້າງຊື່ ນວນແສງ, ນວນແສງ ເປັນຄົນມີຈິດໃຈທີ່ດີງາມ, ມັກສຶກສາຮໍ່າຮຽນ, ມັກເດັກນ້ອຍ ແລະ ທີ່ສຳຄັນແມ່ນ ນວນແສງ ສົນໃຈກ່ຽວກັບປະຫວັດສາດລາວ ໂດຍສະເພາະແມ່ນວຽກງານກ່ຽວກັບລະເບີດບໍ່ທັນແຕກຢູ່ລາວ, ຫຼັງຈາກຈົບການສຶກແລ້ວກໍໄດ້ຖືກຊັບຊ້ອນໃຫ້ໄປເປັນຄູສອນຢູ່ແຂວງຊຽງຂວາງ, ຊຶ່ງການເດີທາງໄປນັ້ນກໍໄດ້ຖືກຄັດຄ້ານຈາກຜູ້ເປັນແມ່ຍ້ອນວ່າເປັນລູກຜູ້ຍິງບໍ່ຢາກໃຫ້ຫ່າງໄກຈາກບ້ານ, ແຕ່ຍ້ອນນວນແສງຮັກໃນການເປັນຄູສືບທອດຈາກຜູ້ເປັນພໍ່ທີ່ໄດ້ເສຍຊີວິດໄປແຕ່ຕອນ “ນວນແສງ” ຍັງເປັນນັກສຶກສາຝືກງານຢູ່ໂຮງຮຽນ. ການເດີນທາງຂອງ ນວນແສງ ເລີ່ມຂຶ້ນເມື່ອລົດເມແລ່ນເຂົ້າສູ່ແຂວງຊຽງຂວາງ, ເມື່ອຮອດແຂວງຊຽງຂວາງ ກໍມີຫຼາຍຍ່າງທີ່ເຮັດໃຫ້ ນວນແສງ ຕ້ອງໄດ້ຕື່ນເຕັ້ນຢູ່ຕະຫຼອດ, ຍ້ອນສິ່ງທີ່ຄິດກັບຄວາມເປັນຈິງມັນແຕກຕ່າງກັນ, ນວນແສງ ໄດ້ຖືກສົ່ງໃຫ້ໄປປະຈຳການຢູ່ເຂດຫ່າງໄກທຸລະກັນດານ, ທາງທີ່ໄປເຕັມໄປດ້ວຍເຫວຊັນ, ຂີ່ຝຸ່ນ ແລະ ປ່າຕຶບດົງໜາ. ເມື່ອເດີນທາງຮອດສະຖານທີ່ກໍໄດ້ມີພິທີຕ້ອນຮັບຈາກອຳນາດການປົກຄອງ. ອຳນາດການປົກຄອງໄດ້ມອບໝາຍໃຫ້ແມ່ສອນຫົວໜ້າສະຫະພັນແມ່ຍິງບ້ານ ເປັນຄົນຮັບເອົາ ນວນແສງ ເປັນລູກຮັກ. ແມ່ສອນເປັນຄອບຄົວທີ່ຂາດຫົວໜ້າຄອບຄົວຄືພໍ່ ທອງກ້ອນ ທີ່ຖືກອຸບັດເຫດຈາກລູກລະເບີດຕົກຄ້າງແຕ່ປາງສົງຄາມແຕກໃສ່ໃນຂະນະທີ່ກຳລັງບຸກເບີກນາໃໝ່, ມີລູກສາວຊື່ວ່າ: ຫຼ້າແກ້ວ.
ຜູ້ກໍາກັບຮູບເງົາເລື່ອງ “ນວນແສງ” ໃຫ້ຮູ້ຕື່ມອີກວ່າ: ນວນແສງ ໄດ້ປັບຕົວເຂົ້າກັບຄອບຄົວແມ່ສອນໄດ້ດີ. ການເວລາຜ່ານໄປເຮັດໃຫ້ ນວນແສງ ໄດ້ຮູ້ໄດ້ເຫັນຫຼາຍຍ່າງກ່ຽວກັບສະພາບການຂອງບ້ານເມືອງ ແລະ ຄວາມທຸກຍາກຂາດເຂີນຂອງປະຊາຊົນໃນໝູ່ບ້ານ, ລາວໄດ້ຊອກວິທີທາງເພື່ອຈະຊ່ວຍເຫຼືອ ແລະ ສົ່ງຄວາມຮູ້ໃຫ້ນັກຮຽນໄດ້ຮຽນໃຫ້ຫຼາຍທີ່ສຸດ, ນວນແສງ ໄດ້ຍາດເວລາເພື່ອຊອກຂໍ້ມູນກ່ຽວລະເບີດບໍ່ທັນແຕກ ແລະ ຜົນກະທົບຂອງມັນມາສອນໃຫ້ນັກຮຽນ, ໂດຍມີການຊ່ວຍເຫຼືອຂອງ ບຸນທະວີ ຫົວໜ້າກອງຫຼອນບ້ານຜູ້ທີ່ເປັນບ່າວຄ້າງບ້ານທີ່ຍັງຄອຍຖ້າຄູ່ຄອງ, ມີເດັກນ້ອຍຂີ້ດື້ປະຈຳບ້ານຄົນໜຶ່ງຊື່ວ່າ ກິແດງ ໄດ້ແບກລູກລະເບີດໃສ່ບ່າ ຊຶ່ງສາວຄູ ນວນແສງ ໄດ້ເຫັນ ແລະ ທ້ວງໃສ່ ກິແດງ ວ່າເປັນລູກລະເບີດໄດ ເຮັດໃຫ້ ກິແດງ ທີ່ຕົກໃຈ ໄດ້ຖີ້ມລູກລະເບີດລົງດິນ ກິ້ງລົງພູ ມາໃສ່ ນວນແສງ ເຮັດໃຫ້ ນວນແສງ ພົບກັບຊາຕາກຳທີ່ໂຫດຮ້າຍຈາກລະເບີດທີ່ບໍ່ທັນແຕກຢູ່ໃນລາວໂດຍສະເພາະແມ່ນເຂດທີ່ ນວນແສງ ໄປປະຈຳການຢູ່ ຈາກຝີມືຂອງລູກສິດຂີ້ດື້ ກິແດງ, ຫຼັງຈາກໄດ້ຮັບເຄາະກຳແນວນັ້ນ ນວນແສງ ກໍໄດ້ຍຸດຕິທຸກຍ່າງເພື່ອຮັບການປິ່ນປົວ ແລະ ກິແດງ ກໍກັບໃຈເປັນຄົນດີ. ຕອນທີ່ ນວນແສງ ເຈັບປ່ວຍຢູ່ນັ້ນກໍໄດ້ຮັບການຊ່ວຍເຫຼືອຈາກ ບຸນທະວີ ຊຶ່ງ ບຸນທະວີ ໄດ້ເອົາໃຈໃສ່ເບິ່ງແຍງ, ຄວາມໃກ້ຊິດ, ຄວາມຜູກພັນ ເຮັດໃຫ້ຫົວໃຈຂອງຊາຍໜຸ່ມ ແລະ ຍິງສາວເກີດມີຄວາມຮັກຕໍ່ກັນ ແລະ ກັນ.