ທຶນການສຶກສາ CP ALL SCHOLARSHIP ເປັນທຶນການສຶກສາຂອງ ສະຖາບັນການຈັດການ ປັນຍາພິວັດ Panyapiwat Institute of Management ຫຼື PIM ທີ່ເປັນໜຶ່ງໃນສະຖາບັນການສຶກສາ ທີ່ຢູ່ໃນເຄືອຂອງ ບໍລິສັດ ຊີພີ ອໍລ໌ ຈໍາກັດ ມະຫາຊົນ (CP ALL) ແຫ່ງຣາຊອານາຈັກໄທ ເຊິ່ງໄດ້ຮັບຄວາມນິຍົມ ແລະ ມີຊື່ສຽງໂດ່ງດັງ ລະດັບແຖວໜ້າ ໃນພາກພື້ນອາຊຽນ ແລະ ສາກົນ ພາຍໃຕ້ຫຼັກສູດມາດຕະຖານສາກົນ ທີ່ມີຄຸນນະພາບສູງ ໂດຍໄດ້ຢັ້ງຢືນໃຫ້ເຫັນວ່າ ມີນັກສຶກສາລາວຈໍານວນບໍ່ໜ້ອຍ ໄດ້ສໍາເລັດຈາກສະຖາບັນແຫ່ງນີ້ ມີຄຸນນະພາບຈິງ, ໄດ້ອາຊີບວ່ອງໄວ ແລະ ມີເງິນເດືອນທີ່ດີ.
ໂດຍ ສະຖາບັນ ປັນຍາພິວັດ ແຫ່ງນີ້ ໄດ້ປະກາດໃຫ້ທຶນການສຶກສາໃນຫຼາຍໆປະເທດ ລວມທັງປະເທດລາວ ທີ່ໄດ້ຮັບທຶນ 60 ທຶນຕໍ່ປີ ໃນໂຄງການ CP ALL SCHOLARSHIP FOR LAOS ໂດຍໄດ້ເລີ່ມໃຫ້ທຶນມາແຕັ້ງແຕ່ປີ 2019 ເປັນຕົ້ນມາ; ໂດຍມີນັກສຶກສາລາວ ທີ່ໄດ້ສໍາເລັດການສຶກສາ ຈາກສະຖາບັນແຫ່ງນີ້ໄປແລ້ວ 186 ຄົນ, ໃນນັ້ນປະກອບມີ: ປະລິນຍາຕີ 176 ຄົນ, ປະລິນຍາໂທ 10 ຄົນ.
ໂດຍຫຼັກໆ ໃນການໃຫ້ທຶນການສຶກສາຂອງ ບໍລິສັດ ຊີພີ ອໍລ໌ ນີ້ ກໍແມ່ນເພື່ອປະກອບສ່ວນ ເຂົ້າໃນການພັດທະນາ ເສດຖະກິດ-ສັງຄົມ, ຕອບແທນສັງຄົມ, ຊ່ວຍເຫຼືອສົ່ງເສີມການພັດທະນາການສຶກສາລາວ, ສ້າງບຸກຄະລາກອນລາວ ໃຫ້ມີຄຸນນະພາບເທົ່າທຽມສາກົນ ແລະ ສາມາດແຂ່ງຂັນກັບນາໆ ຊາດໄດ້ຢ່າງແທ້ຈິງ.
ນາງ ກິຕ້າ ສິຣິປັນຍາ, HR OFFICER ບໍລິສັດ ຊີພີ ອໍລ໌ ລາວ ຈໍາກັດ ໃຫ້ຮູ້ວ່າ: ຊີວິດເລີ່ມຈາກເດັກນ້ອຍທີ່ມີໂອກາດການສຶກສາຂ້ອນຂ້າງໜ້ອຍຢູ່ເຂດນອກເມືອງ ໃນເມືອງນາຊາຍທອງ, ນະຄອນຫຼວງ ວຽງຈັນ, ເມື່ອຈົບການສຶກສາ ມັດທະຍາຍົມຕອນປາຍ ແລະ ໄດ້ຮັບທຶນການສຶກສາຈາກບໍລິສັດ ຊີພີ ອໍລ໌ ໄປຮຽນຕໍ່ລະດັບປະລິນຍາຕີ, ຄະນະບໍລິຫານທຸລະກິດ, ສາຂາຈັດການ ທຸລະກິດ-ການຄ້າສະໄໝໃໝ່ ໃນປະເທດໄທ ເຊິ່ງຜູ້ກ່ຽວເປັນໜຶ່ງຄົນທີ່ໄດ້ສໍາເລັດການສຶກສາ ແລະ ໄດ້ຮັບກຽດນິຍົມອັນດັບທີ 1 ໄດ້ໃຫ້ ສໍາພາດວ່າ: ກ່ອນໜ້ານັ້ນບໍ່ຄິດບໍ່ຝັນວ່າຈະໄດ້ຮັບທຶນ ແລະ ໄດ້ໄປຮຽນຢູ່ຕ່າງປະເທດ ເບື້ອງຕົ້ນກໍໄດ້ຮຽນຢູ່ບ້ານເຮົາຕາມພາສາຊາວບ້ານ, ຕໍ່ມາໄດ້ເຫັນເພິ່ນປະກາດສະໝັກທຶນຮຽນຕໍ່ຢູ່ໄທ ເລີຍຕັດສິນໃຈລອງສະໝັກ ແລະ ບັງເອີນໄດ້ຮັບທຶນມາຮຽນຢູ່ ສະຖາບັນ ປັນຍາພິວັດ (PIM) ນີ້ ແລະ ຍອມຮັບວ່າລະບົບການສຶກສາມີຄວາມແຕກຕ່າງຫຼາຍ ໂດຍສະເພາະຫຼັກສູດການສຶກສາທີ່ມີຄວາມເປັນສາກົນ, ສະຖານທີ່ຮຽນເປັນອາຄານຮຽນໃຫຍ່ຫຼາຍ, ອຸປະກອນການຮຽນ-ການສອນ ຄົບຊຸດ ທັນສະໄໝ, ມີຄູອາຈານທັງພາຍໃນ-ຕ່າງປະເທດ ລ້ວນແລ້ວມີແຕ່ຄົນເກັ່ງໆ, ມີວິໄນ-ມີລະບຽບແບບແຜນສໍາລັບ ການຮຽນ-ການສອນ ຄົບຊຸດ, ໄດ້ທັງຮຽນໄປນໍາ ແລະ ເຮັດວຽກຕົວຈິງໄປນໍາ ພ້ອມດຽວກັນນັ້ນ ໃນໄລຍະເວລາສຶກສາຮໍ່າຮຽນຢູ່ທີ່ນີ້ ກໍໄດ້ຮັບເງິນເດືອນທຸກເດືອນບໍ່ຕໍ່າກວ່າ 5 ພັນບາດຕໍ່ເດືອນ ຫຼື ຫຼາຍກວ່ານັ້ນ ຂຶ້ນກັບລະດັບການສຶກສາ, ໃນໄລຍະການລົງໄປຝຶກງານຕາມຮ້ານສະດວກຊື້ 7-Eleven ກໍໄດ້ຮັບເງິນເດືອນອີກເປັນປົກກະຕິ ເຊິ່ງເປັນແຮງດຶງດູດ ແລະ ຈູງໃຈຫຼາຍ ທີ່ເຮັດໃຫ້ເຮົາມີຄວາມກະຕືລືລົ້ນຢາກເຮັດແຕ່ວຽກ ແລະ ມີຄວາມຮັບຜິດຊອບສູງ.
ດ້ານ ນາງ ອ່ອນຈັນ ວົງມາລາ, Assistant Store Manager 7-Eleven ສາຂາທຳອິດໃນລາວ ກ່າວວ່າ: ນ້ອງເອງໄດ້ຈົບການສຶກສາຈາກ ສະຖາບັນການຈັດການປັນຍາພິວັດ ລະດັບປະລິນຍາຕີ ສາຂາບໍລິຫານທຸລະກິດ ໂດຍໄດ້ຮັບທຶນຈາກ CP ALL SCHOLARSHIP ໃນປີ 2019. ນ້ອງຮູ້ຈັກທຶນນີ້ໄດ້ຈາກເອື້ອຍແນະນຳວ່າເປັນທຶນຂອງ CP ALL ນ້ອງສົນໃຈກໍເລີຍສະໝັກຂໍທຶນ ແລະ ກໍໂຊກດີທີ່ໄດ້ຮັບທຶນນີ້.
ສຳລັບຕອນທີ່ນ້ອງໄປຮຽນນັ້ນ. ທາງສະຖາບັນໄດ້ຈັດໃຫ້ມີທັງການຮຽນ ແລະ ເຮັດວຽກຕົວຈິງຄວບຄູ່ໄປນຳ ເຊິ່ງມັນເຮັດໃຫ້ນ້ອງໄດ້ມີທັກສະໃນການເຮັດວຽກຫຼາຍຂຶ້ນ ເມື່ອຈົບອອກມາກໍສາມາດເຮັດວຽກໄດ້ເລີຍ.
ສ່ວນເລື່ອງຊີວິດການເປັນຢູ່ໃນສະຖາບັນຕອນທີ່ນ້ອງຮຽນນັ້ນ ກໍມີຄວາມເປັນກັນເອງຫຼາຍ ມີຫຍັງກໍຊ່ວຍເຫຼືອກັນ ນອກຈາກເພິ່ນຈະໃຫ້ທຶນຮຽນຈົນຈົບແລ້ວ ເພິ່ນຍັງໃຫ້ເງິນເດືອນໃນຊ່ວງທີ່ຍັງບໍ່ທັນໄດ້ລົງຝຶກງານນຳອີກ ເວົ້າໄດ້ວ່າຊ່ວຍແຕ່ຕົ້ນຈົນຈົບໂດຍທີ່ບໍ່ໄດ້ເດືອດຮ້ອນທາງບ້ານຝາກເງິນມາໃຫ້.
ນາງ ນິຊາ ຂັນຕິສຸກ, ອາຍຸ 21 ປີ, ກຳລັງນັກສຶກສາ ຢູ່ປີທີ 3, ຄະນະບໍລິຫານທຸລະກິດ ສາຂາຈັດການທຸລະກິດຄ້າປີກ (ຍ່ອຍ) ສະໄໝໃໝ່, ລະດັບປະລິນຍາຕີ ບອກວ່າ: ສິ່ງທໍາອິດຢາກຂໍສະແດງຄວາມຂອບໃຈ ແລະ ຮູ້ບຸນຄຸນຕໍ່ຄະນະນໍາຂອງ ບໍລິສັດ ຊີພີ ອໍລ໌ ຈໍາກັດ ມະຫາຊົນ (CP ALL) ແຫ່ງຣາຊອານາຈັກໄທໄດ້ມອບໂອກາດດີໆ ແລະ ທຶນການສຶກສາໃຫ້ຕົນເອງ ເຊິ່ງເຮັດໃຫ້ນ້ອງເອງ ທີ່ເປັນພຽງເດັກບ້ານນອກ ໄດ້ກ້າວຂາເຂົ້າມາສຶກສາຮໍ່າຮຽນຢູ່ທີ່ ສະຖາບັນປັນຍາພິວັດ (PIM) ແຫ່ງນີ້, ຖ້າເວົ້າຢ້ອນເວລາກັບຄືນອະດີດຜ່ານມາ ນ້ອງຈະເປັນຄົນທີ່ບໍ່ກ້າປາກເວົ້າ ແລະ ບໍ່ກ້າສະແດງອອກຕໍ່ໜ້າມວນຊົນ, ແຕ່ໄດ້ມາຮຽນທີ່ນີ້ແລ້ວ ຍອມຮັບຈາກໃຈເລີຍວ່າ ເພິ່ນຫຼໍ່ຫຼອມຄົນໃຫ້ເກັ່ງແທ້ໆ ດ້ວຍຄວາມຮູ້, ຄວາມສາມາດ ແລະ ທັກສະການສ້າງອາຊີບແນ່ນອນ ເຊິ່ງກຸ້ມຄ່າທີ່ໄດ້ຮຽນ.
ນອກຈາກນັ້ນ ເລື່ອງການໃຫ້ສະຫວັດດີການ ແລະ ການເບິ່ງແຍງຊີວິດການເປັນຢູ່ຂອງນັກຮຽນກໍດີຫຼາຍບໍ່ມີບ່ອນຕິເລີຍ ຕົວຢ່າງ: ຄ່າອຸປະກອນການຮຽນ, ເງິນເດືອນກໍໄດ້ 5 ພັນບາດຕໍ່ເດືອນ, ລົງໄປຝຶກງານຕາມສາຂາຮ້ານສະດວກຊື້ 7-Eleven ຕ່າງໆ ເພິ່ນກໍຄິດໄລ່ເງິນເດືອນໃຫ້ອີກ 10,000 ບາດຕໍ່ເດືອນ ຫຼື ຫຼາຍກວ່ານັ້ນ. ສະຫຼຸບແລ້ວມີແຕ່ສິ່ງດຶງດູດ ແລະ ເຮັດໃຫ້ເຮົາມີກໍາລັງໃຈຮຽນ, ມີກໍາລັງເຮັດວຽກຢ່າງບໍ່ຮູ້ອິດບໍ່ເມື່ອຍ.
ຖ້າຫາກວ່າເຮົາຮຽນຈົບຈາກສະຖາບັນດັ່ງກ່າວແລ້ວ ເພິ່ນກໍບໍ່ໄດ້ບັງຄັບວ່າຈະຕ້ອງເຮັດວຽກໃຫ້ໃນເຄື່ອຊີພີຢ່າງດຽວ ແຕ່ຂຶ້ນກັບນັກສຶກສາເອງເປັນຜູ້ເລືອກ ເນື່ອງຈາກວ່າສະຖາບັນປັນຍາພິວັດ (PIM) ເປັນບ່ອນຝຶກຝົນຫຼໍ່ຫຼອມ ແລະ ພັດທະນາບຸກຄະລາກອນໃຫ້ມີຄຸນນະພາບຮັບໃຊ້ສັງຄົມ ແລະ ເກີດຜົນປະໂຫຍດສູງສຸດຕໍ່ສ່ວນລວມ.
ສະເພາະນ້ອງເອງ ຖ້າຈົບຢູ່ນີ້ແລ້ວຖ້າບໍ່ມີທຶນເຮັດທຸລະກິດເປັນຂອງຕົນເອງ ແມ່ນຈະສືບຕໍ່ສະໝັກເຮັດວຽກນໍາເພິ່ນເລີຍ ໂດຍສະເພາະຢູ່ຮ້ານສະດວກ 7-Eleven ຫຼື ເຄື່ອຂ່າຍທຸລະກິດປິ່ນອອ້ມຂອງເພີ່ນ ໂດຍເຊື່ອໝັ້ນວ່າ ໃນເຄືອບໍລິສັດຂອງເພິ່ນຈະໄດ້ຮັບເງິນເດືອນດີ, ສະຫວັດດີການດີ ແລະ ມີການຍົກລະດັບຄວາມຮູ້ໃຫ້ພະນັກງານຕະຫຼອດເວລາ.
ສ່ວນ ທ້າວ ຄໍາປັນ ສີລາເພັດ, ອາຍຸ 20 ປີ, ກຳລັງສຶກສາຢູ່ປີ 1 ສາຂາທີ່ເດີນທາງມາຈາກພາກໃຕ້ຂອງ ສປປ ລາວ, ເມືອງໂຂງ ແຂວງຈໍາປາສັກ ບອກວ່າ: ເຖິງແມ່ນນ້ອງຫາກໍມາຮຽນຢູ່ສະຖານບັນນີ້ພຽງ 1 ປີກວ່າ ກໍຮູ້ສຶກໄດ້ເຖິງການຕ້ອນຮັບທີ່ມີຄວາມອົບອຸ່ນ, ເປັນກັນເອງ ແລະ ໃຫ້ການເບິ່ງແຍງໄດ້ດີຫຼາຍ. ສະນັ້ນ, ການຮຽນຢູ່ທີ່ນີ້ບໍ່ມີວັນໜ້າເບື່ອ ແລະ ມີຄວາມຕື່ນເຕັ້ນຕະຫຼອດ, ເພາະຄູ-ອາຈານ ເປັນມືອາຊີບລະດັບສາກົນແທ້ໆ ດ້ານການຮຽນ-ການສອນ ເພິ່ນກໍເນັ້ນທິດສະດີ ແລະ ຕົວຈິງ ຄວບຄູ່ກັນໄປ, ຖ້າເຮົາຂັດຂ້ອງໃນການຮຽນ ກໍຈະມີອາຈານມານັ່ງຄຽງຂ້າງໃຫ້ຄໍາແນະນໍາ ແລະ ບອກສອນຢ່າງໃກ້ຊິດ.
ດັ່ງທີ່ຮູ້ນຳກັນ ໄທ ແລະ ລາວ ເປັນປະເທດບ້ານໃກ້ເຮືອນຄຽງທີ່ມີພາສາປາກເວົ້າ ແລະ ຮີດຄອງປະເພນີວັດທະນະທໍາຄ້າຍຄືກັນ ເຊິ່ງການດໍາລົງຊີວິດຂອງຄົນລາວ ກໍຄ້າຍກັບຄົນໄທຄືກັນ ບໍ່ແຕກຕ່າງຫຍັງຫຼາຍ ນອກຈາກນັ້ນ, ຄົນໄທກໍຮັກນັກສຶກສາລາວ ແລະ ຊ່ວຍເຫຼືອກັນຢ່າງໃກ້ຊິດ.
ໃນອະນາຄົດ ຖ້າມີພີ່ນ້ອງຖາມເລື່ອງໄປຮຽນຕໍ່ຢູ່ຕ່າງປະເທດນັ້ນ ນ້ອງຈະແນະນໍາໃຫ້ມາຮຽນທີ່ນີ້ ເພາະສະຖາບັນປັນຍາພິວັດ (PIM) ດີທີ່ສຸດ ທີ່ນ້ອງເວົ້າແບບນີ້ກໍບໍ່ໝາຍວ່າຍົກຍ້ອງບ່ອນຮຽນ ແຕ່ເປັນຄວາມຈິງທີ່ນ້ອງໄດ້ສຳພັດມາແລ້ວດ້ວຍໂຕເອງ.
ໃນສ່ວນຂອງ ທ່ານ ໄຊ ໂຣດ ທິວັດໝັ້ນຈະເລີນ, ຮອງກໍາມະການຜູ້ຈັດການອາວຸໂສ ບໍລິສັດ ຊີພີ ອໍລ໌ ຈໍາກັດ (ມະຫາຊົນ) ໄດ້ໃຫ້ສໍາພາດວ່າ: ການທີ່ ຊີພີ ອໍລ໌ໄດ້ເຂົ້າມາດໍາເນີນທຸລະກິດໃນ ສປປ ລາວ ເປັນການຕັດສິນໃຈທີ່ຖືກຕ້ອງແລ້ວ ແລະ ສອດຄ່ອງກັບແນວທາງນະໂຍບາຍຂອງພັກ-ລັດຖະບານລາວ, ສອງລັດຖະບານລະຫວ່າງ ລາວ-ໄທ ຢ່າງແທ້ຈິງຄື, ພວກເຮົາເຂົ້າມາດໍາເນີນທຸລະກິດຮ້ານສະດວກຊື້ 7-Eleven ແລະ ທຸລະກິດ ປິ່ນອອ້ມຢູ່ ສປປ ລາວ ນັ້ນ ແມ່ນໄດ້ຖືເອົາຜົນປະໂຫຍດ 3 ຢ່າງຄວບຄູ່ກັນຄື: ລັດໄດ້, ບໍລິສັດໄດ້ ແລະ ປະຊາຊົນໄດ້ ນອກຈາກນີ້, ພວກເຮົາຈະບໍ່ຖິ້ມໃຜໄວ້ຢູ່ເບື້ອງຫຼັງ.
ດັ່ງທີ່ຮູ້ນໍາກັນ ພວກເຮົາມາເຮັດທຸລະກິດທີ່ນີ້ເພື່ອຕັ້ງໃຈປະກອບສ່ວນເຂົ້າໃນການພັດທະນາເສດຖະກິດ-ສັງຄົມ ລາວ ໃນການສ້າງວຽກເຮັດງານທໍາໃຫ້ຄົນລາວ, ສ້າງໂອກາດດີເຮັດໃຫ້ຄົນລາວ ໄດ້ເຂົ້າເຖິງການສຶກສາ, ສ້າງທັກສະ ວິຊາອາຊີບໃຫ້ຄົນລາວ ມີຄວາມຊໍານິຊໍານານ ແລະ ອື່ນໆ ເພື່ອຄວາມເຂັ້ມແຂງທີ່ຍືນຍົງ.
ໃນໄລຍະຜ່ານມາ ເຖິງແມ່ນວ່າມີຂ່າວເສດຖະກິດຂອງລາວ ພົບບັນຫາຫຍຸ້ງຍາກເລື່ອງເງິນເຟີ້ ແລະ ຄ່າຄອງຊີບແພງ ແຕ່ພວກເຮົາເຊື່ອໝັ້ນວ່າ ເສດຖະກິດຂອງລາວ ຍັງມີທ່າແຮງບົ່ມຊ້ອນສູງ ແລະ ຈະຟື້ນຕົວຢ່າງວ່ອງໄວ. ແຕ່ສິ່ງສໍາຄັນຄົນລາວມີຈິດໃຈດີງາມເອື້ອເຟື້ອເພື່ອແຜ່, ມີນໍ້າໃຈອົດທົນ ແລະ ຍິ້ມແຍ້ມແຈມໃສດີ ຍົກຕົວຢ່າງນ້ອຍໆ ມີພະນັກງານເປັນຄົນລາວທີ່ເຂົ້າມາເຮັດວຽກຢູ່ຮ້ານສະດວກຊື້ 7-Eleven ຕາມສາຂາຕ່າງໆ ເຊິ່ງເຂົາເຈົ້າມີຄວາມເອົາໃຈໃສ່, ຫ້າວຫັນ, ເຊື່ອຟັງ ແລະ ອົດທົນຫຼາຍ, ສ່ວນຜູ້ໄດ້ຮັບທຶນການສຶກສາມາຮຽນຢູ່ໄທ ກໍລ້ວນແຕ່ເປັນຄົນມີຄວາມຕັ້ງໃຈຮໍ່າຮຽນ, ຮຽນດີຮຽນເກັ່ງ ຈົນກາຍເປັນນັກຮຽນໄດ້ຮັບກຽດນິຍົມອັນດັບທີ 1 ຢູ່ສະຖານບັນນີ້, ລອງວາດພາບເບິ່ງວ່າມີນັກຮຽນຫຼາຍພັນຄົນຈາກຕ່າງປະເທດມາຮຽນທີ່ນີ້ບໍ່ແມ່ນເລື່ອງງ່າຍ, ແຕ່ນັກຮຽນຈາກ ສປປ ລາວ ຍາດໄດ້ນັກຮຽນດີຮຽນເກັ່ງ ຖືວ່າສຸດຍອດແລ້ວ.
ປັດຈຸບັນ, ຮ້ານສະດວກ 7-Eleven ຖືເປັນສ່ວນໜຶ່ງທຸລະກິດຂອງພວກເຮົາທີ່ກຳລັງດໍາເນີນຢູ່ ສປປ ລາວ ເຊິ່ງເຕີບໃຫຍ່ຂະຫຍາຍຕົວດ້ວຍຄຸນນະພາບ ແລະ ຄວາມເຊື່ອໝັ້ນສູງພໍສົມຄວນ ຈາກຈຸດເລີ່ມຕົ້ນພຽງ 1 ສາຂາແລ້ວສືບຕໍ່ຂະຫຍາຍຂຶ້ນຕື່ມເຖິງ 6-7 ສາຂາ ແລະ ຈະສືບຕໍ່ຂະຫຍາຍໄປບັນດາແຂວງຕ່າງໆ ທີ່ມີທ່າແຮງບົ່ມຊ້ອນ ເພື່ອຮັບປະກັນວ່າປະຊາຊົນລາວບັນດາເຜົ່າ, ນັກທ່ອງທ່ຽວພາຍໃນ ແລະ ຕ່າງປະເທດ ຈະໄດ້ຮັບໂອກາດການເຂົ້າເຖິງສິນຄ້າທີ່ມີຄຸນນະພາບສູງ, ມາດຕະຖານສາກົນ ແລະ ຄາລາສົມເຫດສົມຜົນ.
ດ້ວຍເຫດນັ້ນ, ພວກເຮົາກໍມີຄວາມຈໍາເປັນຕ້ອງຜະລິດ ແລະ ສ້າງບຸກຄະລາກອນທີ່ມີຄຸນນະພາບໄປຄວບຄູ່ກັນ ເພື່ອຮອງຮັບການຂະຫຍາຍຕົວຢ່າງມີໄລຍະສໍາຄັນ. ໃນອະນາຄົດ ສປປ ລາວ ມີເສັ້ນທາງລົດໄຟ ລາວ-ຈີນ, ມີຂົວຂ້າມແມ່ນໍ້າຂອງຫຼາຍແຫ່ງ, ມີເສັ້ນທາງສາຍການບິນຫຼາຍສາຍ ແລະ ມີການລົງທຶນກັບສາກົນເພີ່ມຂຶ້ນເລື້ອຍໆ ເຊິ່ງນັ້ນຈະຊ່ວຍສ້າງໂອກາດດີຢ່າງແນ່ນອນ ແລະ ເສດຖະກິດຂອງລາວ ຈະເຂັ້ມແຂງຂຶ້ນ.
ຖ້າທ່ານໃດມີຄວາມສົນໃຈຢາກສະໝັກຂໍທຶນໄປຮຽນຕໍ່ຢູ່ສະຖາບັນການຈັດການ PIM ສາມາດເຂົ້າໄປເບິ່ງລາຍລະອຽດໄດ້ຕາມເວັບໄຊ www.pim.ac.th
