ໃນຊ່ວງທີ່ມີຝົນຕົກໜັກຕໍ່ເນື່ອງແບບນີ້ ຈົນເຮັດໃຫ້ຫຼາຍພື້ນທີ່ເກີດນໍ້າຖ້ວມ ນອກນັ້ນ, ຍັງມີນໍ້າຂັງຕາມຄອງ, ບຶງ ຕ່າງໆ ເຊິ່ງເປັນແຫຼ່ງສະສົມຂອງເຊື້ອພະຍາດໄດ້ດີ.
ດັ່ງນັ້ນ, ເພື່ອປ້ອງກັນການຕິດເຊື້ອ ເຮົາມາຮູ້ຈັກພະຍາດຊະນິດຕ່າງໆ ທີ່ອາດມາກັບນໍ້າ ນຳກັນ:
- ພະຍາດ ລະບົບຫາຍໃຈ ເຊັ່ນ: ໄຂ້ຫວັດ, ປອດບວມ ເປັນຕົ້ນ
- ອາການ: ມັກຈະມີໄຂ້ ມີນໍ້າມູກ ໄອ ເຈັບຄໍ ປວດເມື່ອຍຕາມຕົນໂຕ ເຈັບຫົວ ອ່ອນເພຍໄດ້ງ່າຍ ແລະ ເບື່ອອາຫານ
- ການປ້ອງກັນ: ເບື້ອງຕົ້ນດູແລຮ່າງກາຍໃຫ້ອົບອຸ່ນຢູ່ສະເໝີ, ບໍ່ໃສ່ເສື້ອຜ້າປຽກ, ຮັກສາຄວາມສະອາດໃນການກິນຢູ່, ທີ່ພັກອາໃສ ແລະ ຫຼີກລ້ຽງການສຳຜັດກັບຄົນທີ່ເປັນກຸ່ມສ່ຽງຕິດພະຍາດນີ້.
2. ພະຍາດທາງເດີນອາຫານ ເຊັ່ນ: ອາຫານເປັນຜິດ, ອະຫິວາ, ຕັບອັກເສບ ແລະ ອື່ນໆ
- ພະຍາດເຫຼົ່ານີ້ ອາການເບື້ອງຕົ້ນມັກຈະຖ່າຍຜິດປົກກະຕິ (ອາດຈະເປັນນໍ້າ ຫລື ເລືອດ), ເຈັບທ້ອງ, ປວດຮາກ, ວິນຫົວ ອາດຈະມີໄຂ້ ປວດເມື່ອຍຕາມຕົນໂຕ ເບື່ອອາຫານ ບາງຄົນອາດມີອາການຕາເຫຼືອງ ຫລື ຕົນໂຕເຫລືອງ..
- ການປ້ອງກັນ: ຄວນກິນອາຫານທີ່ສະອາດ ປຸ່ງແຕ່ງສຸກແລ້ວ ຫລີກລ້ຽງອາຫານດິບ ແລະ ອາຫານທີ່ໝົດອາຍຸ, ດື່ມນໍ້າທີ່ສະອາດ ຫລື ນໍ້າຕົ້ມສຸກ ຈະດີຫລາຍ ຮັກສາສຸຂະອານາໄມໃຫ້ດີ.
3. ພະຍາດຜິວໜັງ ເຊັ່ນ: ຕຸມແພ້, ຜິວໜັງອັກເສບ …
- ອາການ: ສ່ວນຫຼາຍມັກຈະມີອາການຄັນຕາມຕົນໂຕ ບາງຄົນມີຕຸມແດງຂຶ້ນເປັນແຜ່ນ, ຜິວໜັງລອກ ອັກເສບ ບວມແດງ ບາງອາການຮ້າຍແຮງກໍມີລັກສະນະ ເປື່ອຍ ຫລື ເປັນໜອງ.
- ການປ້ອງກັນ: ພະຍາຍາມຫລີກລ້ຽງການແຊ່ນໍ້າເປັນເວລາດົນ, ຖ້າຈຳເປັນຕ້ອງລົງນໍ້າເປື້ອນຕ້ອງຮີບລ້າງ ເຊັດໂຕໃຫ້ແຫ້ງ, ບໍ່ໃສ່ເຄື່ອງປຽກເປັນເວລາດົນ, ຢ່າໃຫ້ຮ່າງກາຍມີບາດແຜເພາະຍິ່ງຈະເປັນອັນຕະລາຍ ຖ້າເກີດອາການເລັກນ້ອຍຄວນທາຢາ ຫລື ກິນຢາແກ້ແພ້ ຖ້າອາການເລີ່ມໜັກຄວນໄປພົບແພດທັນທີ.
4. ພະຍາດຕາແດງ
- ອາການ: ມັກຈະລະຄາຍເຄືອງຕາ, ຫນັງຕາບວມ, ຕາເມື່ອຍລ້າ ສູ້ແສງບໍ່ໄດ້ ຫລື ບາງຄົນກໍມີອາການນໍ້າຕາໄຫລ ມີຂີ້ຕາຫລາຍກວ່າປົກກະຕິ.
- ການປ້ອງກັນ: ເລີ່ມຕົ້ນແມ່ນຫລີກລ້ຽງການຖືກຝຸ່ນ ແລະ ນໍ້າເປື້ອນ ຫາກມັກເຂົ້າຕາກໍຄວນຮີບລ້າງດ້ວຍນໍ້າສະອາດທັນທີ, ເມື່ອມີອາການຄັນຕາບໍ່ສີຕາຫລາຍຄັ້ງ, ໃຊ້ຜ້າທີ່ສະອາດໃນການເຊັດໜ້າເພື່ອບໍ່ໃຫ້ຝຸ່ນ ຫລື ສິ່ງສົກກະປົກເຂົ້າຕາ ຖ້າພົບຄົນເປັນໂລກຕາແດງຄວນແຍກຜູ້ປ່ວຍສະເພາະ ແລະ ບໍ່ໃຊ້ເຄື່ອງຂອງຮ່ວມກັນເພື່ອປ້ອງກັນການຕິດຕໍ່.
5. ພະຍາດໄຂ້ເລືອດອອກ
- ພະຍາດສຸດຮິດທີ່ເປັນກັນຫຼາຍ ແລະ ຫຼີກຫຼ່ຽງໄດ້ຍາກ ອາການ: ມັກຈະມີໄຂ້ຂຶ້ນສູງ, ເຈັບຫົວ, ມີອາການໜາວສັ່ນ, ປວດເມື່ອຍຕາມຕົນໂຕ ອາດມີເລືອດອອກມາເປັນຈຸດຕາມຕົນໂຕ.
- ການປ້ອງກັນ: ຫຼີກຫຼ່ຽງບໍ່ໃຫ້ຍຸງກັດ, ນອນໃນມຸ້ງທີ່ຍ້ອມຢາ, ໃສ່ເສື້ອແຂນຍາວເວລາເຂົ້າປ່າ ທີ່ສຳຄັນແມ່ນ ທຳລາຍແຫລ່ງແຜ່ພັນຂອງຍຸງ.
ນີ້ເປັນພຽງບາງພະຍາດທີ່ມັກເກີດຂຶ້ນໃນຊ່ວງຍາມຝົນທີ່ມີນໍ້າຖ້ວມ ທີ່ຍົກມາແບ່ງປັນກັບທຸກຄົນ ເຖິງຢ່າງໃດກໍຕ້ອງລະມັດລະວັງ ຮັກສາສຸຂະນາໄມໃຫ້ດີ ເພື່ອບໍ່ໃຫ້ມີພະຍາດຕ່າງໆນີ້ມາບຽດບຽນ ເພື່ອທຸກຄົນໃນຄອບຄົວຈະໄດ້ມີສຸຂະພາບທີ່ດີ.