ບົດຄງາມນີ້, ແມ່ນຄັດຕໍ່ມາຈາກເພຈ “AeroLaos” ເພື່ອໃຫ້ທາງ ສະມາຊິກ ອິນໄຊລາວ ໄດ້ບໍລິໂພກຂໍ້ມູນດີໆນຳກັນ.
ປັດຈຸບັນຄ່າເງິນກີບອ່ອນຄ່າລົງ ເຮັດໃຫ້ຄ່າຄອງຊີບສູງຂຶ້ນ ເຮົາຈະມາຮ່ວມແຮງຮ່ວມໃຈກັນຝ່າວິກິດຄ່າເງິນອ່ອນໄດ້ແນວໃດ?
1. ເຊີນຊວນຄົນລາວທ່ອງທ່ຽວໃນເມືອງລາວໃຫ້ຫຼາຍຂຶ້ນ ເພື່ອຫຼຸດການທ່ອງທ່ຽວຕ່າງປະເທດ ທີ່ເປັນສາເຫດໃຫ້ເງິນຕາໃນປະເທດອອກນອກປະເທດ.
2. ເພິ່ມຈຳນວນນັກທ່ອງທ່ຽວຕ່າງປະເທດໃຫ້ມາທ່ຽວລາວຫຼາຍຂຶ້ນ ເພາະການນຳເງິນຕາຕ່າງປະເທດເຂົ້າມາໃນລາວ ຈະຊ່ວຍໃຫ້ຄ່າເງິນກີບແຂງຄ່າຂຶ້ນ. ວິທີທີ່ເຮັດໄດ້ງ່າຍທີ່ສຸດໃນຕອນນີ້ຄື ການເຮັດການຕະຫຼາດດ້ານການທ່ອງທ່ຽວ ໂດຍສະເພາະການຕະຫຼາດອອນໄລນ໌ ຈະເປັນການຕະຫຼາດທີ່ເຂົ້າຮອດກຸ່ມເປົ້າຫມາຍໄດ້ໄວທີ່ສຸດ ປະຫຍັດ ແລະມີປະສິດທິພາບຫຼາຍທີ່ສຸດ.
3. ຮ່ວມມືກັນເປັນເຈົ້າບ້ານທີ່ດີ ທັ້ງພາກບໍລິການດ້ານການທ່ອງທ່ຽວໂດຍກົງ ເຊ່ນ: ຮ້ານຄ້າ, ຮ້ານອາຫານ, ໂຮງແຮມ, ບ້ານພັກ ຄວນເນ້ນການບໍລິການທີ່ດີ ສະອາດ ບໍ່ເອົາປຽບລູກຄ້າ. ສ່ວນປະຊາຊົນ ແມ່ນບໍ່ຄວນຖິ້ມຂີ້ເຫຍື່ອຊະຊາຍ ຊ່ວຍກັນຮັກສາຄວາມສະອາດ ສິ່ງແວດລ້ອມ ວັດທະນະທຳອັນດີງາມຂອງຊາດ ແລະ ການມີນ້ຳໃຈ ມີຮອຍຍິ້ມ ແລະມິດຕະພາບ.
4. ພາກລັດຄວນມີການວາງແຜນເຮັດກິດຈະກຳເພື່ອສົ່ງເສິມດ້ານການທ່ງທ່ຽວຕະຫຼອດປີ ເພື່ອຮັກສາຖານລູກຄ້າເກົ່າ ແລະເພິ່ມຖານລູກຄ້າໃໝ່.
5. ພາກລັດຫາຕະຫຼາດນັກທ່ອງທ່ຽວໃໝ່ໆ ເຊ່ນ ກຸ່ມປະເທດອາຫຼັບ ປະເທດອິນເດຍ ລັດເຊຍ ຍຸໂລປ ອະເມລິກາ ເປັນຕົ້ນ ເພາະປະເທດເຫຼ່ານີ້ ມີຈຳນວນນັກທ່ອງທ່ຽວທີ່ມີຄຸນນະພາບຫຼາຍ.
6. ເນ້ນການທ່ອງທ່ຽວຄຸນນະພາບ ລາຄາແພງ ສຳລັບກຸ່ມລູກຄ້າທີ່ມີສັກກະຍະພາບ ເປັນການທ່ອງທ່ຽວແບບຫຼູຫຼາ ເຊ່ນ: ກຸ່ມຜູ້ບໍລິຫານ, ນັກທຸລະກິດ, ນັກກີລາລະດັບໂລກ ເປັນຕົ້ນ.
ການທາງທ່ຽວທີ່ເນ້ນ ລາຄາແພງ ຄຸນນະພາບດີ ເຊ່ນ: ການຈັດສຶກສາດູງານ, ການສຳມະນາລະດັບນານາຊາດ, ການແຂ່ງຂັນກີລາລະດັບໂລກ ເປັນຕົ້ນ.
7. ການສົ່ງເສິມ ການຝຶກອົບຮົມ ໃຫ້ຄວາມຮູ້ແລະທັກສະ ແກ່ຜູ້ປະກອບການ ພະນັກງານດ້ານການທ່ອງທ່ຽວເພິ່ມຂຶ້ນ ເພື່ອສາມາດຮອງຮັບກັບການເພິ່ມຈຳນວນນັກທ່ອງທ່ຽວໃນອະນາຄົດ.
ການທ່ອງທ່ຽວ ຖືວ່າເປັນອີກຫນຶ່ງບົດບາດ ທີ່ຈະຊ່ວຍໃຫ້ປະເທດເຮົາມີລາຍຮັບເພິ່ມຊຶ້ນ ແລະຈະຊ່ວຍໃຫ້ເຮົາຝ່າວິກິດຄ່າເງິນອ່ອນໄປໄດ້.
ບົດຮຽນນີ້ ປະເທດເພື່ອນບ້ານ ຄື ປະເທດໄທ ໄດ້ຝ່າວິກິດມາໄດ້ແລ້ວ ຈາກເຫດການທີ່ຄ່າເງິນບາດອ່ອນ ໃນຊ່ວງທີ່ປະເທດໄທ ພົບກັບວິກິດເສດຖະກິດຕົ້ມຍຳກຸ້ງ ເຊ່ນດຽວກັບ ປະເທດເກົາຫຼີ ໃນຊ່ວງໃກ້ໆກັນ ທັ້ງສອງປະເທດກໍ່ຜ່ານຊ່ວງນັ້ນໄດ້ຈາກການເພິ່ມຮາຍຮັບເຂົ້າປະເທດດ້ວຍການທ່ອງທ່ຽວເປັນຫຼັກ.
ປະເທດລາວເຮົາເຊ່ນກັນ ຜູ້ຂຽນບົດຄວາມຢາກເຊິນຊວນໃຫ້ ລາວທ່ຽວລາວກ່ອນ ລົດການທ່ອງທ່ຽວຕ່າງປະເທດລົງ ເພື່ອຊ່ວຍໃຫ້ເຮົາສາມາດຝ່າຟັນວິກິດໄປພ້ອມໆກັນໄດ້.
ບົດຄວາມໂດຍ ອ.ມະລິວັນ ວໍລະເດດ
ແຫຼ່ງຂໍ້ມູນ: AeroLaos