ພຣະສ່ຽງທວາຍ ທີ່ປະດິດສະຖານຢູ່ທີ່ ຫໍພຣະໄສຍາດ ວັດຊຽງທອງ ນະຄອນຫລວງພຣະບາງ ເປັນພຣະເກົ່າແກ່ອີກອົງຫນຶ່ງ ທີ່ຜູ້ຄົນທັງຫລາຍໄດ້ສຳຜັດ ແລະຍົກຍໍຂຶ້ນເປັນປະຈຳ ພຣະອົງນີ້ເປັນເນື້ອທອງສຳຣິດ ສີອອກທອງນາກ ເປັນພຣະປັດເຈກພຣະພຸດທະເຈົ້າ ປະດິດສະຖານຢູ່ຫໍພຣະໄສຍາດຂອງວັດຊຽງທອງ ເມື່ອກ່ອນແມ່ນເອົາໄວ້ຫໍແຫ່ງນີ້ເປັນປະຈຳ ເມື່ອຫລາຍປີຜ່ານມາທາງວັດແມ່ນໄດ້ຂຶ້ນເກັບຮັກສາໄວ້ ແຕ່ຈະອາຣາດທະນາລົງມາໃຫ້ພຸດທະບໍຣິສັດທັງຫລາຍໄດ້ຍົກຍໍ ສ່ຽງທວາຍ ໃນຍາມທີ່ມີພິທີອາຣາດທະນາພຣະເຈົ້າໝ່ານລົງຫົດສົງພ້ອມ
ປີນີ້ ທາງວັດຊຽງທອງ ເພິ່ນກໍ່ໄດ້ນຳລົງມາໃຫ້ຍາມໂຍມທັງຫລາຍໄດ້ຂາບໄຫວ້ບູຊາແລະຍົກສ່ຽງ ໃນລະຫວ່າງວັນທີ 22-26 ເມສາ 2026 ທີ່ຜ່ານມານີ້ ແລະອາຣາດທະນາຂຶ້ນປະດິດສະຖານເກັບໄວ້ປີຫນ້າ ຈຶ່ງອັນເຊີນນຳລົງມາພ້ອມພຣະເຈົົ້າໝ່ານອີກຄັ້ງ.
ຫລວງພຣະບາງ ມີສະຖານທີ່ ທີ່ເປັນສະຖານທີ່ຂອງພຣະປັດເຈກພຣະພຸດທະເຈົ້າປະດິດສະຖານຢູ່ຄື : ພຣະປັດເຈກພຣະພຸດທະເຈົ້າ ເປັນຮູບປັ້ນ ແມ່ນຕັ້ງຢູ່ແຄມນ້ຳຂອງ ເຂດບ້ານຄົກພຸ ເມືອງຈອມເພັດ ແຂວງຫລວງພຣະບາງ ເຊິ່ງພໍ່ແມ່ປະຊາຊົນເຂດຖິ່ນບໍລິເວນນັ້ນ ເຊັ່ນ : ບ້ານລາດຫານ ບ້ານຄົກຂ້າມ ເມື່ອກ່ອນແຖວນີ້ແມ່ນຂຶ້ນກັບຫລວງພຣະບາງ ແຕ່ເມື່ອ 30-40 ປີຜ່ານມາໄດ້ໄປຂຶ້ນກັບອຸດົມໄຊ ແລ້ວ ປະຊາຊົນແຖວນັ້ນແມ່ນນັບຖືເປັນທີ່ສຸດ.
ເພາະທຸກໆປີ ຂອງມື້ຂຶ້ນ 14 ຄ່ຳ ເດືອນ 6 ເພັງ ປະຊາຊົນເຂດຖິ່ນນັ້ນແມ່ນຈະໄດ້ຮ່ວມກັນເຮັດພິທີ ໄປສົງນໍ້າພຣະພຸທທະຮູບ ປັຈເຈກະພຸດທະເຈົ້າແລ້ວ ຫລັງຈາກຫົດສົງແລ້ວຝົນຟ້າຊົນລະທານກໍ່ຈະຕົກນຳຄວາມຊຸ່ມຊື່ນມາສູ່ແຜ່ນດິນທຸກຄັ້ງໄປ.
ການບູຊາທີ່ຄວນບູຊານັ້ນໝາຍເຖິງ ການຍົກຍ້ອງ, ເຊີດຊູ, ຍົກສູງບຸກຄົນທີ່ຄວນໄດ້ຮັບຄວາມເຄົາລົບນັບຖື.
ສ່ວນການບູຊາຄົນທີ່ຄວນບູຊານັ້ນໝາຍເຖິງການເລືອກຍົກຍ້ອງຄົນທີ່ສົມຄວນຍົກຍ້ອງນັ້ນເອງ,
ປະໂຫຍດທີ່ຈະໄດ້ຮັບກໍ່ຄືມີຄວາມສຸກໃຈແກ່ຜູ້ບູຊາ, ສ່ວນຜູ້ຖືກບູຊານັ້ນກໍ່ມີຄວາມປີຕິໃຈຈາກການທີ່ຕົນເອງເປັນຄົນທີ່ມີຄົນນັບຖືນັ້ນເປັນແຮງສົ່ງໃຫ້ພັດທະນາຄວາມສາມາດຂອງຕົວເອງໃຫ້ດີຂຶ້ນເລື້ອຍໆ.
ພຣະພຸດທະເຈົ້າ ໄດ້ແບ່ງຄົນທີ່ສົມຄວນແກ່ການບູຊາໄວ້ຫຼາຍປະເພດດັ່ງນີ້ ຄື :
1 ພຣະສັມມາສັມພຸດທະເຈົ້າ (ຜູ້ທີ່ຕັດສະຮູ້ດ້ວຍຕົນເອງແລ້ວສາມາດເຜີຍແຜ່ໄດ້).
2 ພຣະປັດເຈກພຣະພຸດທະເຈົ້າ (ມີຄວາມຮູ້ເທົ່າພຣະສັມມາສັມພຸດທະເຈົ້າທຸກຢ່າງ, ແຕ່ສະແດງທັມບໍ່ເປັນ).
3 ພຣະທັມ (ໝາຍເຖິງທັມມະທີ່ພຣະສັມມາສັມພຸດທະເຈົ້າໄດ້ສະແດງໄວ້ດີແລ້ວ).
4 ພຣະສົງ (ຜູ້ທີ່ບວດໃນທັມ,ວິນັຍຂອງພຣະສັມມາສັມພຸດທະເຈົ້າ).
5 ພຣະອະຣິຍະເຈົ້າ (ໝາຍເຖິງຜູ້ທີ່ເຂົ້າເຖິງ ພູມພຣະອໍຣະຫັນ, ພຣະອະນາຄາມີ, ພຣະສັກກິນາຄາມີ ແລະ ພຣະໂສດາບັນ ) ທັງໝົດທັງທີ່ຄອງເພດສະມານະ-ພຣາມ ຫຼື ຄາຣະວາດ).
6 ຜູ້ນຳທີ່ມີຄວາມເປັນທັມ.
7 ພໍ່ ແລະ ແມ່ທີ່ດີ (ສ່ວນພໍ່ແມ່ທີ່ບໍ່ດີນັ້ນຄວນໄດ້ຮັບພຽງຄວາມກະຕັນຍູເທົ່ານັ້ນບໍ່ຄວນບູຊາ).
8 ຄູອາຈາຣຍ໌ທີ່ພຽບພ້ອມດ້ວຍຄວາມຮູ້, ຄວາມສາມາດ ແລະ ຄຸນສົມບັດຂອງຄູທັງເຈັດປະການ.
9 ຜູ້ທີ່ມີບຸນຄຸນທີ່ປະພຶດຕົວດີ (ສ່ວນຜູ້ມີບຸນຄຸນທີ່ປະພຶດຕົວບໍ່ດີນັ້ນຄວນໄດ້ຮັບພຽງການຮູ້ຄຸນ, ບໍ່ຄວນບູຊາ).
ການບູຊານັ້ນພຣະພຸດທະເຈົ້າໄດ້ແບ່ງອອກເປັນ 4 ຢ່າງຄື:
1 ປັກຄະຫະ (ບູຊາດ້ວຍການກ່າວຄຳຍົກຍ້ອງ,ສັນລະເສີນຄຸນຄວາມດີຕ່າງໆ).
2 ສັກກາຣະ ຫຼື ອາມິດຕະບູຊາ (ຄືການບູຊາດ້ວຍສິ່ງຂອງເຊັ່ນ ດອກໄມ່ ທູບທຽນເປັນຕົ້ນ…).
3 ສັມມານະ (ບູຊາດ້ວຍຄວາມເຫຼື້ອມໃສ,ນັບຖື).
4 ປະຕິບັດບູຊາ (ຄືການຝຶກຕົວໃຫ້ເປັນຜູ້ມີສິນ, ສະມາທິ ແລະ ປັນຍາຕາມແນວແຖວຂອງພຣະສັມມາສັມພຸດທະເຈົ້າ ໄດ້ແນະນຳໄວ້ນັ້ນເອງ).
ທີ່ມາ: ນະຄອນຫຼວງພຣະບາງ
ພາບຈາກ: Houmphet Manisouk