ນັກຈິດບຳບັດ ເວີຈີເນຍ ຊາເທຍ ຊາວອາເມຣິກາ ໄດ້ກ່າວໄວ້ວ່າ: “ການກອດກັນ ມື້ລະ 4 ຄັ້ງ ເພື່ອການດຳລົງຊີວິດ, ກອດກັນ ມື້ລະ 8 ຄັ້ງ ເພື່ອການດຳເນີນຊີວິດ ແລະ ກອດກັນ ມື້ລະ 12 ຄັ້ງ ເພື່ອການຈະເລີນເຕີບໃຫຍ່”.
ປະໂຫຍດດັ່ງກ່າວນີ້ ສະແດງໃຫ້ເຫັນວ່າ “ການກອດ” ບໍ່ພຽງແຕ່ສະແດງຄວາມຮັກເທົ່ານັ້ນ ແຕ່ຍັງມີຜົນດີຕໍ່ສຸຂະພາບ ປ້ອງກັນການເກີດໂຣກຮ້າຍ ເຊັ່ນ ໂຣກຫົວໃຈ ແລະ ພາວະຊຶມເສົ້າ ເພາະການກອດຈະຊ່ວຍເພີ່ມປະລິມານ ຮີໂມໂກນບິນ ເຊິ່ງເປັນສ່ວນປະກອບໃນເມັດເລືອດແດງໃນເລືອດ ເຮັດໃຫ້ການລຳລຽງຂອງ ອອກຊີເຈນ ໄປຍັງຈຸລັງຕ່າງໆ ທົ່ວຮ່າງກາຍດີຂຶ້ນ, ຊ່ວຍຫຼຸດຄວາມສ່ຽງຂອງ ໂຣກຫົວໃຈ ເພາະຊ່ວຍເພີ່ມລະດັບ ຮໍໂມນ ອ໊ອກຊີທອກຊິນ (Oxytocin) ເຊິ່ງເປັນຮໍໂມນແຫ່ງຄວາມຮັກ ສົ່ງຜົນໃຫ້ຄວາມດັນເລືອດຫຼຸດລົງ, ຊ່ວຍຫຼຸດການຫຼັ່ງຮໍໂມນ ຄໍຕິຊອນ ເຊິ່ງເປັນຮໍໂມນ ທີ່ກໍ່ໃຫ້ເກີດຄວາມຄຽດ ແລະ ການກອດຄົນຮັກ ສະໝອງຈະຫຼັ່ງສານ ໂດປາມີນ (Dopamine) ທີ່ກໍ່ໃຫ້ເກີດຄວາມສຸກ, ຄວາມເພິ່ງພໍໃຈ, ຄວາມສົດໃສ ລວມທັງສານແຫ່ງຄວາມສຸກໂຕອື່ນໆ ເຊັ່ນ ສານເອນໂດຟິນ (Endorphin) ແລະ ເຊໂຣໂທນິນ (Serotonin).
ການກອດມີຜົນດີຕໍ່ເດັກທີ່ສຸດ ເພາະສາມາດເພີ່ມ EQ ໄດ້ ໂດຍສະເພາະໃນເດັກທີ່ຫາກໍເກີດ ທີ່ໄດ້ຮັບການລ້ຽງລູກດ້ວຍນົມແມ່, ການອູ້ມກອດ ຂະນະທີ່ໃຫ້ນົມລູກ ຈະຊ່ວຍເພີ່ມຄວາມອົບອຸ່ນ ແລະສານສຳພັນຄວາມຮັກຫຼາຍຂຶ້ນ.
ການກອດສາມາດເຮັດໄດ້ທັງຄອບຄົວ ເພາະຊ່ວຍຫຼຸດຊ່ອງວ່າງລະຫວ່າງຄອບຄົວ, ຕື່ມເຕັມຄວາມຮັກ, ສ້າງຄວາມໄວ້ວາງໃຈ, ໃຫ້ຄວາມຮູ້ສຶກໝັ້ນຄົງ, ການຄຸ້ມຄອງ, ສ້າງຄວາມປອດໄພໃຫ້ແກ່ກັນ ແລະ ມີຄຸນຄ່າຫຼາຍສຳລັບການໃຊ້ຊີວິດ ໂດຍສະເພາະໃນເດັກ ແລະ ຜູ້ສູງອາຍຸ ເຊິ່ງຕ້ອງອາໄສຄວາມຮັກຈາກຄົນທີ່ຢູ່ອ້ອມຂ້າງ.
Hits: 0
