ນ້ຳຕົກຕາດນ້ຳແຈ ເຊິ່ງຕັ້ງຢູ່ ບ້ານ ທ່າມື່ນ, ເມືອງແບງ, ແຂວງ ອຸດົມໄຊ ຕັ້ງຢູ່ທາງທິດຕາເວັນອອກຂອງ ບ້ານ ທ່າມື່ນ ເປັນນ້ຳຕົກຕາດ ທີ່ມີຄວາມສວຍງາມ ບໍ່ແພ້ນ້ຳຕົກແຫ່ງອື່ນໆ ພາຍໃນແຂວງ, ແຕ່ສະພາບເສັ້ນທາງການເຂົ້າເຖິງແມ່ນຍັງມີຄວາມຫຍຸ້ງຍາກຢູ່.
ເສັ້ນທາງເຂົ້າໄປຫາຕາດຍາວປະມານ 4 ກິໂລແມັດ, ເປັນເສັ້ນທາງທີ່ຍັງບໍ່ໄດ້ຍົກລະດັບ ຢາມຝົນແມ່ນລຳບາກໃນການເດີນທາງ. ສຳລັບທ່າແຮງດ້ານການທ່ອງທ່ຽວ ເຖິງວ່າ ນ້ຳຕົກຕາດ ແຫ່ງນີ້ ຈະເປັນຕາດຂະໜາດນ້ອຍ ແຕ່ກໍມີຄວາມສວຍງາມ ແລະ ມີປ່າໄມ້ໃຫຍ່ປົກຫຸ້ມຢູ່ບໍລິເວນຕາດ, ລັກສະນະຂອງຕາດ ປະກອບດ້ວຍສອງພັກ, ພັກທີໜຶ່ງສູງປະມານ 7 ແມັດ, ພັກທີສອງສູງປະມານ 8 ແມັດ, ໃນປີ 2007 ໄດ້ຮັບການຊ່ວຍເຫຼືອທະລຸເສັ້ນທາງ ຈາກ ບ້ານທ່າມື່ນ ເຂົ້າໄປຫານ້ຳຕົກຕາດແລ້ວປະມານ 3 ກິ ໂລແມັດ.
ສຳລັບປະຫວັດຂອງຕາດແຫ່ງນີ້ ຕາມການບອກເລົ່າຂອງເຖົ້າແກ່ວ່າ ຕາດນ້ຳແຈ ເປັນຕາດທ່ອນກາງຂອງເງືອກໃນປາງກ່ອນ, ສ່ວນທ່ອນຫົວ ຕົກຢູ່ຫົວນ້ຳຫາວໃກ້ຊາຍແດນ ເມືອງງາ ແລະ ທ່ອນຫາງຕົກຢູ່ ຫົວນ້ຳແມດ (ບ້ານນາແມດ) ຍ້ອນການຂ້າຟັນລັນແທງລະຫວ່າງມະນຸດ ກັບ ເງືອກ ສາເຫດແມ່ນຍາດຜູ້ສາວມາເປັນເມຍ ແລະ ສາເຫດທີ່ສອງ ທີ່ເອີ້ນກັນ ຕາດນ້ຳແຈ ຍ້ອນເປັນທ່ອນໂຮມຊຸມນຸມກິນແຈ (ໝ້ຽງ) ຂອງຄົນສະໄໝກ່ອນ
ແຫຼ່ງຂໍ້ມູນຈາກ: ຂະແໜງທ່ອງທ່ຽວ ແຂວງ ອຸດົມໄຊ.