ໜັງສືພິມ The Seattle Times ຂອງສະຫະລັດ ອາເມຣິກາ ລາຍງານວ່າ ຄົນທີ່ບໍ່ໄດ້ຮັບການພັກຜ່ອນດ້ວຍການນອນຢ່າງເຕັມອີ່ມນັ້ນ ມີໂອກາດເປັນເບົາຫວານສູງທີ່ສຸດ ເພາະວ່າການອຶດນອນນັ້ນ ເຮັດໃຫ້ຮ່າງກາຍໃຊ້ອິນຊູລິນໄດ້ໜ້ອຍ. ນອກນັ້ນ ການອຶດນອນ ຍັງເຮັດໃຫ້ເຖົ້າກ່ອນໄວ, ຄວາມຈໍາເສື່ອມ ແລະ ສ່ຽງຕໍ່ການອິດເມື່ອຍອ່ອນເພຍ.
ນັກວິທະຍາສາດ ໄດ້ເຮັດການທົດລອງອາສາສະຫມັກຫນຸ່ມສາວ ດ້ວຍການໃຫ້ນອນ ມື້ລະ 4 ຊົ່ວໂມງ ເປັນເວລາ 6 ຄືນ.ເມື່ອເຈາະເລືອດອາສາສະຫມັກເຫລົ່ານັ້ນ ພົບວ່າ ລະດັບນໍ້າຕານໃນເລືອດເພີ່ມຂຶ້ນສູງ ຊຶ່ງເກືອບຈະເປັນຄືຄົນເປັນເບົາຫວານ.
ນັກວິໄຈ ຍັງພົບວ່າການອຶດນອນ ພາໃຫ້ເປັນໂຣກອ້ວນ ໂດຍກ່ຽວຂ້ອງກັບຮໍໂມນເລັ່ງການເຕີບໃຫຍ່ ຊຶ່ງເຮັດໃຫ້ຮໍໂມນນີ້ໄຫລອອກມາຫນ້ອຍ ເຮັດໃຫ້ຢາກອາຫານຫລາຍຂຶ້ນ. ນອກນັ້ນ ຍັງສົ່ງຜົນຕໍ່ຮໍໂມນເລັບຕິນ ຊຶ່ງເປັນຮໍໂມນທີ່ສື່ສານກັບລະບົບປະສາດ ວ່າຄວນຈະອີ່ມໄວ ຫລື ຊ້າສໍ່າໃດ.
ການນອນບໍ່ອີ່ມ ຍັງສົ່ງຜົນເສຍຕໍ່ເມັດເລືອດຂາວ ແລະ ກົນໄກການຕອບສະຫນອງພູມຄຸ້ມກັນຂອງຮ່າງກາຍເຮັດໃຫ້ເຈັບປ່ວຍງ່າຍ.ໃນເວລາດຽວກັນ ກໍ່ເພີ່ມຄວາມສ່ຽງຕໍ່ໂຣກມະເຮັງ ໂດຍສະເພາະແມ່ນມະເຮັງເຕົ້ານົມ.