ຍອມຮັບວ່າ ໃນປັດຈຸບັນໄວໜຸ່ມລາວສ່ວນຫຼາຍໃຫ້ຄວາມສົນໃຈຕໍ່ສຽງດົນຕີ ທັງມີແນວຄິດ, ການປະດິດແຕ່ງທີ່ຫຼາກຫຼາຍ, ທັນສະໄໝ ແລະ ເປີດກວ້າງຂຶ້ນ; ແຕ່ຖ້າຖາມເຖິງສິລະປິນ ຄ້າຍເພງ ຫຼື ນັກຮ້ອງແທ້ໆ ເກືອບນັບໄດ້ເລີຍວ່າມີຈັກຄົນ, ມີຈັກຄ້າຍ ເພາະຫຍັງຈຶ່ງເປັນແບບນັ້ນ? ອາດຈະເປັນຍ້ອນຫຼາຍຄົນຍັງຄິດວ່າ ດົນຕີເປັນພຽງງານອາດີເຣກ ຫຼິ້ນແຕ່ໃນຍາມວ່າງ ເຮັດມັນເພາະມັກ ແຕ່ກໍຍັງຫາລາຍໄດ້ໃຫ້ຕົນເອງບໍ່ໄດ້ ຫຼື ອີກຢ່າງໜຶ່ງອາດເປັນເພາະເຮົາຍັງຂາດການສະໜັບສະໜູນ ແລະ ຍົກສູງດ້ານດົນຕີບໍ?
ໃນຍຸກທີ່ທຸກຄົນສາມາດເຂົ້າເຖິງສື່ມີເດຍໄດ້ງ່າຍດາຍພຽງປາຍນິ້ວ, ສາມາດເບິ່ງຊົມຜົນງານຂອງໃຜກໍໄດ້ທີ່ຕົນເອງມັກໃນໂລກນີ້ຜ່ານທາງອິນເຕີເນັດ ແລະ ແພັດຟອມຕ່າງໆ ແລະ ນີ້ກໍຖືເປັນຊ່ອງທາງທີດີໃນການສ້າງຕົວຕົນ, ຜົນງານດ້ານດົນຕີອອກສູ່ສາຍຕາມວນຊົນໄດ້.
ເຮົາລອງມາເບິ່ງ ຜົນດີຂອງດົນຕີນຳກັນວ່າ ມັນເປັນຫຼາຍກວ່າງານອາດີເຣກແບບໃດ?
- ດົນຕີປຽບເໝືອນເພື່ອນແທ້: ບໍ່ວ່າຍາມທຸກ, ເສົ້າ, ເຫງົາໃຈ ຫຼາຍຄົນກໍມັກຈະມີສຽງເພງ ສຽງດົນຕີຢູ່ເປັນໝູ່ເພື່ອນ ຫຼາຍຄົນກໍເລືອກທີ່ຈະສື່ສານທຸກອາລົມນັ້ນອອກມາຜ່ານເນື້ອຮ້ອງ ທຳນອງເພງຕ່າງໆ.
- ດົນຕີສາມາດເປັນເຄື່ອງມືສື່ສານໄດ້: ຫຼາຍຄົນທີ່ມັກໃຊ້ເພງເພື່ອເປັນຕົວແທນຄວາມຮູ້ສຶກ ຫຼື ສິ່ງທີ່ຢາກສື່ສານກັບຄົນອື່ນ, ໃຊ້ດົນຕີເພື່ອບອກເລົ່າອາລົມ ຄວາມຮູ້ສຶກໃຫ້ຄົນອື່ນຮັບຮູ້, ໃຊ້ດົນຕີເພື່ອສົ່ງຕໍ່ຄວາມຮັກ ຫຼື ຄວາມຮູ້ສຶກດີໆ ແບບນີ້ກໍມີຫຼາຍ.
- ດົນຕີຊ່ວຍເສີມສ້າງຈິນຕະນາການ ແລະ ຄວາມຄິດສ້າງສັນ: ເພີ່ມສຳມະທິ ປົດປ່ອຍຕົນເອງຜ່ານອາລົມສູນທະລີໄດ້ດີ.
ດົນຕີ ມັກຈະມອບຄວາມສຸກໃຫ້ທັງຜູ້ສ້າງ ແລະ ຜູ້ຟັງສະເໝີ ບໍ່ວ່າຍຸກສະໄໝໃດກໍຕາມ ຍິ່ງປັດຈຸບັນດົນຕີແມ່ນໄຮ້ພົມແດນແລ້ວ ໄວໜຸ່ມຍຸກໃໝ່ສາມາດສ້າງສັນຜົນງານອອກມາທີ່ດີ ແລະ ແປກໃໝ່ ເຊື່ອວ່າຈະເຮັດໃຫ້ວົງການເພງ ຫຼື ສຽງດົນຕີຂອງລາວເຮົາກ້າວໄກ ແລະ ເປັນທີ່ຮູ້ຈັກໄປທົ່ວໂລກໃນອະນາຄົດ ເຊິ່ງມັນຕ້ອງເລີ່ມຈາກເຮົາຊ່ວຍກັນພັກດັນ ສົ່ງເສີມ ແລະ ສ້າງສັນຜົນງານອອກມາ ໃຫ້ສຽງດົນຕີນີ້ ເປັນຫຼາຍກວ່າ ງານອະດີເຣກ ແຕ່ສາມາດເປັນອາຊີບ, ສ້າງຊື່ສຽງ, ເງິນຄຳ ແລະ ພາບພົດທີ່ດີໃຫ້ແກ່ຕົນເອງ, ຄອບຄົວ ລວມເຖິງປະເທດຊາດໄດ້.