ເມື່ອກ່ອນຄົນທີ່ມີບັນຫາເລື່ອງສາຍຕາສ່ວນຫຼາຍກໍຈະເປັນກຸ່ມຄົນທີ່ສູງອາຍຸ ເພາະໃຊ້ສາຍຕາມາເປັນເວລາດົນນານ ອາດຈະມີອາການເຊື່ອມສະພາບຕາມການເວລາໄດ້.
ແຕ່ປັດຈຸບັນບໍ່ສະເພາະແຕ່ຜູ້ສູງໄວ ມັນເກີດຂຶ້ນກັບທຸກກຸ່ມອາຍຸ ບໍ່ວ່າຈະເປັນເດັກນ້ອຍ, ໄວໜຸ່ມ ລ້ວນແລ້ວແຕ່ປະສົບບັນຫາເລື່ອງສາຍຕາ ບາງຄົນກໍມີອາການສາຍຕາສັ້ນ, ສາຍຕາຍາວ, ສາຍຕາອຽງ, ປະສາດຕາເມື່ອຍລ້າ, ຕາແດງ, ຕາເປັນຕໍ້, ຈໍປະສາດຕາເຊື່ອມ ເຫຼົ່ານີ້ເປັນຕົ້ນ.
ປັດຈຸບັນ ອິນເຕີເນັດ ໂທລະສັບມືຖື ເຂົ້າມາມີອິດທິພົນຫຼາຍໃນການໃຊ້ຊີວິດໂດຍທີ່ບໍ່ສາມາດຫຼີກລ້ຽງໄດ້ ເຊິ່ງການທີ່ເຮົາຈັບຈ້ອງເບິ່ງຄອມພິວເຕີ ຫຼື ໂທລະສັບເປັນເວລາດົນນານກໍມັກຈະເຮັດໃຫ້ເຈັບປວດເບົາຕາ, ລະຄາຍເຄື່ອງ ແລະ ສົ່ງຜົນຕໍ່ການເສຍສາຍຕາໃນໄລຍະຍາວໄດ້.
ສະນັ້ນ, ເຮົາຕ້ອງໝັ່ນເອົາໃຈໃສ່ເບິ່ງແຍງຮັກສາ ແລະ ກິນອາຫານ ພ້ອມວິຕາມິນທີ່ເໝາະສົມເພື່ອບຳລຸງສາຍຕາໃຫ້ດີ. ການເບິ່ງແຍງຮັກສາສາຍຕາຂອງເຮົາກໍເຮັດໄດ້ຫຼາຍວິທີ ເລີ່ມຈາກຮັກສາພາຍນອກ ແລະ ພາຍໃນ ເຊັ່ນ:
- ການໃສ່ແວ່ນກັນແດດ: ຕ້ອງເປັນແວ່ນກັນແດດທີ່ສາມາດກັນແສງໄດ້ດີທັງແສງ ຢູວີເອ ແລະ ຢູວີບີ.
- ຫຼີກຫຼ່ຽງການສູບຢາ: ເພາະການສູບຢາຈະສົ່ງຜົນໃຫ້ໂລກຮ້າຍຕ່າງໆກ່ຽວກັບດວງຕາເປັນໜັກໄດ້ເຊັ່ນ: ຈໍປະສາດຕາເຊື່ອມ
- ພັກສາຍຕາ: ທຸກເທື່ອທີ່ຕ້ອງໄດ້ໂຟກັສ ຫຼື ເບິ່ງສິ່ງໃດເປັນເວລາດົນ ຕ້ອງພະຍາຍາມຫາຊ່ວງພັກສາຍຕາ ບໍ່ຈຶ້ງຢູ່ກັບສິ່ງນັ້ນຫຼາຍເກີນໄປບໍ່ວ່າຈະເປັນ ການເບິ່ງໜ້າຈໍໂທລະສັບ, ຄອມພິວເຕີ, ການຍິບເສື້ອຜ້າ ຫຼື ການອ່ານໜັງສືກໍຕາມ ເພາະຈະເຮັດໃຫ້ຕາລະຄາຍເຄື່ອງ, ເມື່ອຍລ້າໄດ້ ອາດຈະພັກສາຍຕາໃນທຸກໆ 20 ນາທີ
- ການອອກກຳລັງກາຍ: ເຖິງການອອກກຳລັງກາຍຈະບໍ່ໄດ້ສົ່ງຜົນດີຕໍ່ລະບົບສາຍຕາໂດຍກົງແຕ່ ການອອກກຳລັງການຈະຊ່ວຍໃຫ້ເລືອດໄຫຼວຽນດີ, ລະບົບພູມຄຸ້ມກັນພະຍາດຕ່າງໆດີຂຶ້ນ ກໍຈະຊ່ວຍຫຼຸດແນວໂນ້ມຂອງໂລກທີ່ຈະເກີດຂຶ້ນກັບດວງຕາໄດ້ເຊັ່ນກັນ.
- ຮັກສາທຳຄວາມສະອາດດວງຕາເຮົາເປັນປະຈຳ: ເມື່ອມີສິງເປິເປື້ອນເຂົ້າໄປກໍຕ້ອງລ້າງທຳຄວາມສະອາດໃຫ້ດີ ໂດຍສະເພາະຄົນທີ່ໃສ້ຄອນແທັກເລນຍິ່ງຕ້ອງໄດ້ເອົາໃຈໃສ່ໃຫ້ຫຼາຍຂຶ້ນ ໃສ່ນໍ້າຢາຍອດຕາທຸກຄັ້ງທີ່ຮູ້ສຶກວ່າຕາແຫ້ງ.
ນອກນັ້ນ, ຕ້ອງໄດ້ກິນພວກວິຕາມິນຕ່າງໆເພື່ອບຳລຸງຮ່າງກາຍເພີ່ມເຕີມເຊັ່ນ: ວິຕາມິນເອ, ວິຕາມິນອີ ແລະ ວິຕາມິນຊີ, ກົດໄຂມັນໂອເມກາ 3, ແຮ່ທາດສັງກາສີ ແລະ ສານແຄໂຣທີນອຍ ເຫຼົ່ານີ້ເປັນຕົ້ນ.