“ວັດສຸວັນນະຄີລີ” ທີ່ຕັ້ງຢູ່ ບ້ານຊຽງທອງ-ຄີລີ ຖະໜົນສັກກະລິນ, ຕິດກັບວັດປາກຄານ ຄໍາມຸງຄຸນ, ເປັນອີກວັດທີ່ຊາວໄທພວນ ຈາກຊຽງຂວາງ ເປັນຜູ້ສ້າງຂຶ້ນ ເພື່ອເປັນອະນຸສອນແກ່ກອງທັບຊາວພວນ ທີ່ສູ້ຮົບ ກັບກອງທັບຂອງພະມ້າ.
ໂດຍວັດຄີລີແຫ່ງນີ້ ເປັນວັດທີ່ມີສະຖາປັດຕະຍະກຳທີ່ສວຍງາມອີກວັດໜຶ່ງ ທີ່ມີສິລະປະແບບຊຽງຂວາງ, ພັດທະສິມຂອງວັດນີ້ ເປັນສິລະປະຕາມແບບສະບັບຂອງຊາວພວນຊຽງຂວາງ ໂດຍມີຮູບຊົງທີ່ຍັງຄົງຮັກສາລວດລາຍປະດັບປະດາແບບດັ້ງເດີມ, ຫຼັງຄາປະດັບດ້ວຍໂງແບບຫົວນາກ ທີ່ເຮັດດ້ວຍປະທາຍຕິດແກ້ວສີ, ບັນດາພື້ນຝາຜະໜັງຕ່າງໆ ປະດັບດ້ວຍດອກດວງທີ່ແກະສະຫຼັກ ພອກດ້ວຍຄຳປິວ ແລະ ຮູບແຕ້ມທີ່ບັນຍາຍເຖິງນິທານເວດສັນຕະລະຊາດົກ.
ໃຜທີ່ຍັງບໍ່ທັນໄດ້ໄປສັກກາລະບູຊາ ເມື່ອໄປຮອດຫຼວງພະບາງກໍສາມາດໄປໄດ້ ນອກຈາກຈະໄດ້ຮູ້ຈັກປະຫວັດຂອງວັດແຫ່ງນີ້ແລ້ວ ຍັງໄດ້ຊົມຄວາມງົດງາມຂອງສະຖາປັດຕະຍະກຳແບບຊາວພວນຊຽງຂວາງນຳອີກ.
