ນີ້ແມ່ນອູບທີ່ມີລັກສະນະໂຄງສ້າງຮູບຮ່າງແບບນິຍົມສ້າງໃນພະມ້າ ແຕ່ມີຍອດແບບລາວ ຄົນທັງຫຼາຍທີ່ເປັນຄົນພື້ນເມືອງຈຶ່ງເອີ້ນວ່າ “ອູບໝ່ານ” ( ຄົນທ້ອງຖິ່ນເອີ້ນຄົນພະມ້າໃນເມື່ອກ່ອນວ່າໝ່ານ ) ເມື່ອມີການຄົ້ນພົບພຣະເຈົ້າແບບຫ້າມຍາດ ທີ່ຢູ່ໃນອູບໝ່ານນີ້ ຈຶ່ງໃສ່ຊື່ວ່າ “ພຣະໝ່ານ” ຈົນມາຮອດທຸກມື້ນີ້.
ລັກສະນະພຸດທະສິລະປະພຣະເຈົ້າໝ່ານນັ້ນ, ກໍເປັນພຸດທະສິລະປະແບບລາວເຮົາ ຮອດຍາມບຸນປີໃໝ່ລາວ ຫຼັງຈາກມີພິທີອັນເຊີນພຣະບາງລົງຫົດສົງແລະ ອັນເຊີນຂຶ້ນສູ່ຫໍ່ພຣະບາງແລ້ວ ຊາວບ້ານຊາວເມືອງກໍອັນເຊີນ “ພຣະໝ່ານ” ລົງຫົດສົງ ເພື່ອເປັນສິຣິມຸງຄຸນແກ່ຜູ້ຄົນ ບ້ານເມືອງ ໃຫ້ຢູ່ເຢັນເປັນສຸກ, ພືດພັນທັນຍາຫານ ງອກງາມສົມບູນ ປັດເປົ້າໝອກຄວັນໃນລະດູຈູດໄຮ່ໃຫ້ຜ່ອນຄາຍໄປ.