ຄື້ນ FM 105,5MHZ ແລະ FM 98,8MHZ ຮ່ວມກັບສູນເລືອດແຫ່ງຊາດ ອົງການກາແດງລາວໄດ້ຈັດກິດຈະກຳຮັບບໍລິຈາກເລືອດ ໃນວັນທີ 16 ມັງກອນ 2019 ທີ່ສະຖານນີວິທະຍຸໂທລະພາບ ນະຄອນຫຼວງວຽງຈັນ ເພື່ອຂ່ຳນັບຕ້ອນຮັບວັນສ້າງຕັ້ງກອງທັບປະຊາຊົນລາວ ຄົບຮອບ 70 ປີ ພາຍໃຕ້ຫົວຂໍ້ “70 ປີມີໄຊໃຫ້ເລືອດໃຫ້ຊີວິດ”.

ຈຸດປະສົງຫຼັກທີ່ໄດ້ຮ່ວມບໍລິຈາກເລືອດຄັ້ງນີ້ ເປັນການຂ່ຳນັບວັນສ້າງຕັ້ງກອງທັບປະຊາຊົນລາວ ຄົບຮອບ 70 ປີ ທີ່ເຕັມໄປດ້ວຍອັນມີຄວາມໝາຍຄວາມສຳຄັນໄດ້ສະແດງໃຫ້ເຫັນການຊ່ວຍຊີວິດຄົນໃນ​ທົ່ວ​ປວງ​ຊົນ​ຊາດລາວ ​ພ້ອມທັງ​ເປັນ​ການ​ກຽມ​ຄວາມ​ພ້ອມ​ສະ­ໜອງ​ເລືອດ​ໃຫ້​ກັບ​ບັນ­ດາ​ຄົນ​ເຈັບ​ຕາມ​ໂຮງ­ໝໍ ແລະ ເປັນການສ້າງກຸສົນຈາລຶກບຸນຄຸນຄວາມງາມຂອງມະນຸດເຊິ່ງກັນ ແລະກັນ ການຮັບບໍລິຈາກເລືອດຄັ້ງນີ້ໂດຍເອົາແຕ່ຜູ້ທີ່ມີສຸຂະພາບແຂງແຮງ, ນອນພຽງພໍ 6 ຊົ່ວໂມງ ແລະ ມີອາຍຸ 17-60 ປີ,ນ້ຳໜັກ 45 ກິໂລຂຶ້ນໄປ ສຳລັບທ່ານໃຈບຸນທີ່ໄດ້ບໍລິຈາກແລ້ວນັ້ນແມ່ນຈະໄດ້ໃບຍ້ອງຍໍຈາກສູນເລືອດແຫ່ງຊາດ ອົງການກາແດງລາວ.