ການຈັດເກັບລາຍຮັບງົບປະມານຂອງ ນະຄອນຫຼວງວຽງຈັນ (ນວ) ໃນປີນີ້ ປະຕິບັດໄດ້ທັງໝົດ 1.155 ຕື້ກີບ ເທົ່າກັບ 94,54% ຂອງແຜນການປີ ໂດຍລາຍຮັບສ່ວນໃຫຍ່ມາຈາກ ສ່ວຍສາອາກອນ ປະຕິບັດໄດ້ 1.079 ຕື້ກີບ, ຂະນະທີ່ ຄາດໝາຍລາຍຮັບປີ 2019 ທີ່ກະຊວງການເງິນຈະມອບໃຫ້ໃນເບື້ອງຕົ້ນແມ່ນ 1.357 ຕື້ກີບ ທຽບໃສ່ແຜນປີ 2018 ແມ່ນເພີ່ມຂຶ້ນ 11,4% ເປັນເງິນ 134,96 ຕື້ກີບ.
ທ່ານ ຄໍາພັນ ມາລາບັນດິດ ຫົວໜ້າພະແນກການເງິນ ນວ ໄດ້ລາຍງານຕໍ່ກອງປະຊຸມສະໄໝສາມັນເທື່ອທີ VI ຂອງສະພາປະຊາຊົນ ນະຄອນຫຼວງວຽງຈັນ ຊຸດທີ 1 ເມື່ອວັນທີ 25 ທັນວາ ວ່າ: ການຈັດຕັ້ງປະຕິບັດແຜນງົບປະມານຂອງ ນະຄອນຫຼວງວຽງຈັນ ໃນປີ 2018 ເຫັນວ່າເພີ່ມຂຶ້ນຖ້າທຽບໃສ່ໄລຍະດຽວກັນຂອງປີ 2017, ຊຶ່ງຄາດໝາຍລາຍຮັບງົບປະມານປະຈໍາປີ 2018 ທີ່ກະຊວງການເງິນແຈ້ງໃຫ້ຈັດຕັ້ງປະຕິບັດແມ່ນ 1.222 ຕື້ກີບ, ຜ່ານການຈັດຕັ້ງປະຕິບັດຕົວຈິງມາຮອດວັນທີ 20 ທັນວາ 2018 ໄດ້ທັງໝົດ 1.155 ຕື້ກີບ ເທົ່າກັບ 94,54% ຂອງແຜນການປີ ຖ້າທຽບໃສ່ໄລຍະດຽວກັນຂອງປີຜ່ານມາເພີ່ມຂຶ້ນ 34,01% ເປັນເງິນ 293,36 ຕື້ກີບ, ຄາດຄະເນໝົດປີນີ້ ຈະສາມາດປະຕິບັດໄດ້ຕາມແຜນ ຫຼື ລື່ນແຜນການ, ໃນນັ້ນ ສ່ວຍສາອາກອນປະຕິບັດໄດ້ 1.079 ຕື້ກີບ ເທົ່າກັບ 93,30% ຂອງແຜນການ, ຊັບສິນຂອງລັດ ປະຕິບັດໄດ້ 75,48 ຕື້ກີບ ເທົ່າກັບ 116,13% ຂອງແຜນການ, ລັດວິສາຫະກິດ) ປະຕິບັດໄດ້ 875,99 ລ້ານກີບ ເທົ່າກັບ 138,37% ຂອງແຜນການ (ແຜນການ 633,10 ລ້ານກີບ. ສໍາລັບລາຍຮັບພູດສູງການ ປະຕິບັດໄດ້ 2.793 ຕື້ກີບ ເທົ່າກັບ 83,94% ຂອງແຜນການ (ແຜນການ 3.327 ຕື້ກີບ)
ສະເພາະ ດ້ານລາຍຈ່າຍ ນວ ໄດ້ຮັບຕົວເລກແຈ້ງຈ່າຍ ຈາກກະຊວງການເງິນ ຈໍານວນ 641,62 ຕື້ກີບ, ຜ່ານອະນຸມັດລາຍຈ່າຍ ມາຮອດວັນທີ 20 ທັນວາ 2018 ແມ່ນມີທັງໝົດ 620,17 ຕື້ກີບ ເທົ່າກັບ 96,66% ຂອງແຜນການປີ. ນອກຈາກນີ້ ພາກລາຍຈ່າຍ ໃນປີນີ້ ໄດ້ມີຕົວເລກຈ່າຍທີ່ກະຊວງການເງິນ ອວ່າຍໃຫ້ຊໍາລະໜີ້ລົງທຶນ (ກອງທຶນທາງ) ໃຫ້ນະຄອນຫຼວງວຽງຈັນ ຈໍານວນ 10,08 ຕື້ກີບ, ປະຈຸບັນປະຕິບັດໄດ້ ຈໍານວນ 7,71 ຕື້ກີບ.
ນອກຈາກນີ້ ທ່ານຫົວໜ້າພະແນກການເງິນ ນວ ຍັງໄດ້ລາຍງານ ທິດທາງແຜນການໃນປີ 2019 ໃຫ້ຮູ້ເຖິງຄາດໝາຍລາຍຮັບທີ່ກະຊວງການເງິນຈະແຈ້ງໃຫ້ໃນເບື້ອງຕົ້ນແມ່ນ 1.357 ຕື້ກີບ ທຽບໃສ່ແຜນປີ 2018 ແມ່ນເພີ່ມຂຶ້ນ 11,4% ເປັນເງິນ 134,96 ຕື້ກີບ ໃນນີ້ ລາຍຮັບສ່ວຍສາອາກອນ 1.293 ຕື້ກີບ ເພີ່ມຂຶ້ນ 11,78%, ຊັບສິນຂອງລັດ 63,67 ຕື້ກີບ ຫຼຸດລົງ 2,05% ທຽບໃສ່ປີ 2018, ສ່ວນລັດວິສາຫະກິດຍັງຄົງທີ່. ສໍາລັບດ້ານລາຍຈ່າຍ ຄາດໝາຍກະຊວງການເງິນແຈ້ງໃຫ້ໃນເບື້ອງຕົ້ນ ແມ່ນມີປະມານ 533,77 ຕື້ກີບ (ບໍ່ລວມລາຍຈ່າຍພາກການລົງທຶນ).
