ພິທີບາສີສູ່ຂວັນ ກໍແມ່ນວັດທະນະທໍາຮີດຄອງປະເພນີຂອງລາວ ທີ່ສືບທອດກັນມາແຕ່ບັນພະບູລຸດ, ເຊິ່ງພິທີດັ່ງກ່າວ ຈະປະກອບເຂົ້າໃນງານບຸນ ຫລື ເທດສະການສໍາຄັນຕ່າງໆ ທາງພຸດທະສາສະໜາ ເຊັ່ນ: ງານບຸນປີໃໝ່, ງານບຸນບ້ານ, ຂຶ້ນເຮືອນໃໝ່, ແຂກບ້ານແຂກເມືອງມາຢ້ຽມຢາມ ແລະ ອື່ນໆ ກໍໄດ້ຈັດພິທີບາສີສູ່ຂວັນຜູກຂໍ່ຕໍ່ແຂນ ເພື່ອເປັນສິລິມຸງຄຸນ, ເຊິ່ງມັນໄດ້ກາຍເປັນວັດທະ ນະທຳ ແລະ ວິຖີຊີວິດຂອງຄົນເຮົາຈົນເຖິງປັດຈຸບັນ.
ພິທີບາສີສູ່ຂວັນຊ້າງ ກໍເປັນອີກກິດຈະກໍາໜຶ່ງ ທີ່ມີຄວາມໝາຍຄວາມສຳຄັນ ໃນງານມະຫະກໍາບຸນຊ້າງປະຈໍາປີ ເພື່ອເປັນສິລິມຸງຄຸນໃຫ້ແກ່ຊ້າງ. ນອກຈາກນັ້ນ, ຍັງເປັນການສົ່ງເສີມຮີດຄອງປະເພນີ ທີ່ເປັນເອກະລັກ ໃນວິທີການດໍາລົງຊີວິດຂອງປະຊາຊົນລາວບັນດາເຜົ່າ ຕິດພັນກັບຊ້າງມາແຕ່ບູຮານນະການ ແລະ ເພື່ອໃຫ້ຄົນເຮົາຮັບຮູ້ກ່ຽວກັບຊ້າງຫລາຍຂຶ້ນ. ໃນງານສູ່ຂວັນຊ້າງ ຈະປະກອບມີ: ພາຂວັນ (ໝາກເບັງໃຫຍ່), ໝໍພອນ, ທຽນ 1 ຄູ່, ຝ້າຍຜູກແຂນ, ອ້ອຍ, ກ້ວຍ ແລະ ອື່ນໆ ປະກອບເຂົ້າໃນພິທີດັ່ງກ່າວ.
ທີ່ມາ: ຂປລ
