ທິດທາງໜ້າທີ່ລວມ ແລະ ຄາດໝາຍໃຫຍ່ສໍາລັບໄລຍະແຕ່ປີ 2016-2020 ທີ່ກອງປະຊຸມໃຫຍ່ ຄັ້ງທີ X ຂອງພັກ ໄດ້ວາງໄວ້, ນອກຈາກຄາດໝາຍດ້ານເສດຖະກິດ ແລ້ວ; ຄາດໝາຍດ້ານສັງຄົມ ແລະ ສິ່ງແວດລ້ອມ ກໍ່ແມ່ນຄາດໝາຍສຳຄັນທີ່ທົ່ວພັກ, ທົ່ວລັດ, ທົ່ວກຳລັງປະກອບອາວຸດ ແລະ ທົ່ວປວງຊົນລາວບັນດາເຜົ່າຈະຕ້ອງປະ ກອບສ່ວນຕັ້ງໜ້າເຮັດໃຫ້ສຳເລັດຜົນ.
ມະຕິ X ຂອງພັກ ໄດ້ເວົ້າແຈ້ງ: ເມື່ອຮອດປີ 2020, ຄາດຄະເນຈະມີກໍາລັງແຮງງານທັງໝົດປະມານ 4,41 ລ້ານຄົນ, ໃນນັ້ນກໍາລັງແຮງງານໃນຂະແໜງກະສິກໍາ ປະມານ 2,8 ລ້ານຄົນ, ຂະແໜງອຸດສາຫະກໍາປະ ມານ 0,56 ລ້ານຄົນ ແລະ ຂະແໜງບໍລິການ ປະມານ 1,05 ລ້ານຄົນ. ອັດຕາສ່ວນຄວາມທຸກຍາກໃຫ້ຫລຸດລົງຕໍ່າກວ່າ 10% ຂອງປະຊາກອນທັງໝົດໃນປີ2020. ອັດຕາຄວາມຮູ້ໜັງສື ຂອງປະຊາຊົນໃນເກນອາຍຸ 15 ປີຂຶ້ນໄປ ໃຫ້ໄດ້ 95%. ອັດຕາການເສຍຊີວິດຂອງເດັກຕໍ່າກວ່າ1 ປີໃຫ້ຫລຸດລົງມາຢູ່ 30/1.000 ຂອງເດັກເກີດມີຊີວິດ. ອັດຕາການຊົມໃຊ້ນໍ້າສະອາດຂອງປະຊາຊົນ ໃຫ້ບັນລຸໄດ້ 90%,ອັດຕາສ່ວນການເສຍຊີວິດ ຂອງແມ່ ໃຫ້ຫລຸດລົງມາປະມານ 200/100.000 ຂອງອັດຕາເດັກເກີດມີຊີວິດ. ຫລຸດອັດຕາສ່ວນຂອງເດັກນ້ອຍລຸ່ມ 5 ປີ ທີ່ມີນໍ້າໜັກ ຕໍ່າກວ່າມາດຕະຖານໃຫ້ໄດ້ 15% ແລະ ເດັກນ້ອຍທີ່ເຕ້ຍໃຫ້ໄດ້ 28%.
ສໍາລັບຄາດໝາຍດ້ານສິ່ງແວດລ້ອມ ແມ່ນສໍາຫລວດ ແລະ ຂຶ້ນທະບຽນອອກໃບຕາດິນໃນຂອບເຂດທົ່ວປະເທດໃຫ້ໄດ້ 4 ແສນຕອນ. ສ້າງແຜນຄຸ້ມຄອງສິ່ງແວດລ້ອມ ແບບຮອບດ້ານຢູ່ຂັ້ນແຂວງ ແລະ ເມືອງໃຫ້ໄດ້ຢ່າງໜ້ອຍ 50% ຂອງແຂວງທີ່ໄດ້ຮັບຮອງແລ້ວ. ສູ້ຊົນຈັດສັນ, ກໍານົດເຂດ, ຟື້ນຟູ ແລະ ຂະຫຍາຍເນື້ອທີ່ປ່າໄມ້ໃຫ້ໄດ້ 70% ຂອງເນື້ອທີ່ທົ່ວປະເທດ ໂດຍຟື້ນຟູປ່າໄມ້ດ້ວຍທໍາມະຊາດ ໃຫ້ໄດ້ 1,5 ລ້ານເຮັກຕາ ແລະ ປູກໄມ້ໃຫ້ໄດ້ 35 ພັນເຮັກຕາ.
ເພື່ອສືບຕໍ່ເຮັດສຳເລັດບັນດາຄາດໝາຍດັ່ງກ່າວ, ມັນຮຽກຮ້ອງການປະກອບສ່ວນຢ່າງຕັ້ງໜ້າຂອງທຸກກຳລັງແຮງຂອງທົ່ວສັງຄົມ, ປີ 2019 ນີ້ ກໍ່ເປັນອີກປີໜຶ່ງທີ່ພວກ ເຮົາຕ້ອງພ້ອມກັນສູ້ຊົນຈັດຕັ້ງປະຕິບັດບັນດາຄາດໝາຍດ້ານສັງຄົມ ແລະສິ່ງແວດລ້ອມໃຫ້ສຳເລັດຜົນເປັນກ້າວໆ.
ທີ່ມາ: ໜັງສືພິມ ປະຊາຊົນ
Hits: 22
