ການຈັດງານດັ່ງກ່າວນອກຈາກຈະເປັນການສະເຫຼີມ-ສະຫຼອງບຸນປີໃໝ່ຍີ່ປຸ່ນແລ້ວ ຍັງເປັນເວທີສະແດງສິປະວັດທະນະທຳຂອງປະເທດຍີ່ປຸ່ນໂດຍຜ່ານການຮ້ອງເພງ, ການເຕັ້ນ ຈາກສະໂມສອນນິຮົງຄຣັບ ແລະການຫຼິ້ນກີລາອາກິໂດ້ ຈາກສະໂມສອນກີລາອາກິໂດ້ ທີ່ເປັນສິລະປະການຕໍ່ສູ້ແບບໜຶ່ງຂອງປະເທດຍີ່ປຸ່ນ, ພ້ອມກັນນັ້ນ ຜູ້ເຂົ້າຮ່ວມຍັງຈະໄດ້ເລາະຊົມການວາງສະແດງຂອງຮ້ານຄ້າຕ່າງໆທີ່ໄດ້ມາວາງສະແດງກວ່າ 30 ຮ້ານ.
ພິເສດໃນປີນີ້ຍັງມີກິດຈະກໍາການແຕ່ງຊຸດ ຍຸກະຕະ (ຊຸດປະຈຳຊາດຂອງປະເທດຍີ່ປຸ່ນ) ແລະຊຸດປະຈໍາຊາດ-ຊຸດຊົນເຜົ່າລາວ ແລະມີບ້ານຜີສິງຈຳລອງ ເພື່ອໃຫ້ບັນດາທ່ານແຂກທີ່ມາຮ່ວມງານໄດ້ຮັບຊົມ.
ເນື່ອງໃນໂອກາດບຸນປີໃໝ່ຍີ່ປຸ່ນ ສະຖາບັນພັດທະນາຊັບພະຍາກອນມະນຸດ ລາວ-ຍີ່ປຸ່ນ(ສລຍ) ໄດ້ຈັດງານສະເຫຼີມ-ສະຫຼອງບຸນປີໃໝ່ຍີ່ປຸ່ນປະຈຳປີ 2020 ທີ່ສະຖາບັນດັ່ງກ່າວ.
ໂດຍການເຂົ້າຮ່ວມຂອງທ່ານ ສຈ. ປອ. ສົມສີ ຍໍພັນໄຊ ອະທິການບໍດີ ມະຫາວິທະຍາໄລແຫ່ງຊາດ ພ້ອມດ້ວຍທ່ານ Keizo TAKEWAKA ເອກອັກຄະລັດຖະທູດ ຍີ່ປຸ່ນປະຈຳ ສປປ ລາວ, ມີທ່ານຜູ້ອຳນວຍການ ສລຍ, ຜູ້ຕ່າງໜ້າຈາກອົງການໄຈກາ ປະຈຳລາວ, ແຂກທີ່ຖືກເຊີນ, ພະນັກງານ, ຄູ-ອາຈານ, ນ້ອງໆນັກຮຽນ-ນັກສຶກສາ ແລະຄົນທົ່ວໄປ ເຂົ້າຮ່ວມ.
ໂອກາດດັ່ງກ່າວ, ທ່ານ ສຈ. ປອ. ສົມສີ ຍໍພັນໄຊ ໄດ້ກ່າວໃນພິທີວ່າ ໃນງານບຸນປີໃໝ່ຍີ່ປຸ່ນມື້ນີ້ ຜູ້ເຂົ້າຮ່ວມຈະໄດ້ຮັບຊົມ ແລະເຂົ້າຮ່ວມກິດຈະກຳທີ່ເປັນເອກະລັກ ໃນງານບຸນປີໃໝ່ຍີ່ປຸ່ນ ພ້ອມທັງຮັບຊົມການສະແດງສິລະປະວັດທະນະທຳອັນດີງາມຂອງສອງຊາດ ພ້ອມທັງສະແດງໃຫ້ເຫັນຄວາມສາມາດຂອງບັນດານ້ອງນັກສຶກສາ ແລະນັກທຸລະກິດທີ່ຢູ່ໃນເຄືອຂ່າຍນັກສຶກສາ ແລະສຳມະນາກອນໃນຫຼັກສູດຕ່າງໆຂອງສະຖາບັນພັດທະນາຊັບພະຍາກອນມະນຸດລາວ-ຍີ່ປຸ່ນ.
ບັນດາຫ້າງຮ້ານທີ່ເຂົ້າຮ່ວມການວາງສະແດງໃນມື້ນີ້ກໍລ້ວນແລ້ວແຕ່ເປັນເຄືອຂ່າຍຂອງສະຖາບັນ. ດັ່ງນັ້ນ, ຂ້າພະເຈົ້າເຊື່ອໝັ້ນວ່າ ງານບຸນຄັ້ງນີ້ຈະເປັນການເສີມສ້າງມິດຕະພາບລະຫວ່າງ ປະຊາຊົນສອງຊາດພ້ອມທັງເປັນການສ້າງ ຄວາມປະທັບໃຈ ແລະຮັດແໜ້ນຄວາມສາມັກຄີ. ການຈັດງານດັ່ງກ່າວແມ່ນໄດ້ດຳເນີນໄປເປັນເວລາ 2 ວັນ, ວັນທີ 10-11 ມັງກອນ 2020 ທີ່ຜ່ານມານັ້ນເອງ.
ແຫຼ່ງຂໍ້ມູນ: ມະຫາວິທະຍາໄລແຫ່ງຊາດ