ການປະຕິບັດ ບັນດານິຕິກຳ ຕ້ານພະຍາດໂຄວິດ-19 ແມ່ນພັນທະ ແລະ ໜ້າທີ່ຂອງທຸກຄົນໃນສັງຄົມ

ໃນໂອກາດຖະແຫລງຕໍ່ພີ່ນ້ອງປະຊາຊົນລາວບັນດາເຜົ່າ ວັນທີ 15 ເມສາ 2020 ຜ່ານມາ, ທ່ານ ທອງລຸນ ສີສຸລິດ ນາຍົກລັດຖະມົນຕີ ໄດ້ກ່າວວ່າ:

ການຕື່ນຕົວປະຕິບັດບັນດານິຕິກຳທີ່ປະກາດໃຊ້ມາແລ້ວ ແລະ ອາດປະກາດໃຊ້ເພີ່ມອີກ ຕາມສະຖານະການທີ່ຜັນແປໃນເວລາຕໍ່ໜ້າຢ່າງເຂັ້ມງວດເຄັ່ງຄັດ, ແມ່ນພັນທະ, ໜ້າທີ່ ຄວາມຮັບຜິດຊອບຂອງທຸກພາກສ່ວນ, ທຸກການຈັດຕັ້ງ, ບຸກຄົນ ແລະ ນິຕິບຸກຄົນ ເພື່ອປ້ອງກັນຕົນເອງ, ປ້ອງກັນຄອບຄົວ, ຍາດພີ່ນ້ອງທີ່ຕົນຮັກ, ປ້ອງກັນຄົນອື່ນໃນສັງຄົມ ໃນການຕັດວົງຈອນການລະບາດ;

ຕ້ອງຖືສະເໝີວ່າພວກເຮົາທຸກໆຄົນບໍ່ວ່າໃຫຍ່ ຫລື ນ້ອຍ, ທຸກເພດທຸກໄວ, ທຸກຊັ້ນວັນນະ ລ້ວນແຕ່ມີຄວາມສ່ຽງເທົ່າທຽມກັນທີ່ຈະຕິດເຊື້ອຈາກພະຍາດທີ່ຮ້າຍແຮງນີ້ໄດ້ ທຸກເວລາ;

ການປະຕິບັດເຂັ້ມງວດຂອງແຕ່ລະຄົນມັນເປັນການຊ່ວຍພັກ, ຊ່ວຍລັດ, ຊ່ວຍແບ່ງເບົາການເປັນພາລະຂອງຄະນະສະເພາະກິດ ແລະ ແພດໝໍຂອງພວກເຮົາ ທີ່ກໍາລັງເຮັດວຽກດ້ວຍຄວາມອິດເມື່ອຍ ແລະ ເຕັມໄປດ້ວຍຄວາມສ່ຽງ, ຊ່ວຍແບ່ງເບົາພາລະຂອງສັງຄົມ ແລະ ຊ່ວຍກອບກູ້ເອົາຊີວິດຂອງປະຊາຊົນເຮົາທັງທາງກົງ ແລະ ທາງອ້ອມ.

ທ່ານນາຍົກລັດຖະມົນຕີ ຍັງໄດ້ເນັ້ນອີກວ່າ: ລັດຖະບານ ຊາບດີເຖິງຄວາມປ່ຽນແປງວິຖີຊີວິດຂອງສັງຄົມເຮົາ ທີ່ເກີດຂຶ້ນຢ່າງກະທັນຫັນແບບນີ້ ມັນເປັນສິ່ງທີ່ບໍ່ເພິ່ງປາຖະໜາ ທັ້ງໆທີ່ປະຊາຊົນເຮົາ ຄວນມີເສລີພາບໃນການດຳລົງຊີວິດ, ການເຄື່ອນໄຫວໄປມາຫາສູ່ກັນແບບບໍ່ຈຳກັດໃດໆ, ກະທົບເຖິງທຸລະກິດທຸກລະດັບ ໃນການທຳມາຫາກິນ, ແຕ່ມື້ນີ້ ພວກເຮົາພັດຖືກຈຳກັດ,

ນີ້ແຫລະຄືພວກເຮົາພວມຢູ່ໃນສະຖານະການທີ່ບໍ່ເປັນປົກກະຕິ ຂອງສະພາບການທີ່ເກີດຂຶ້ນ, ແຕ່ມັນພັດຮຽກຮ້ອງໃຫ້ທຸກຄົນຕ້ອງໄດ້ເສຍສະຫລະ, ເສຍສະຫລະເພື່ອຕົນເອງ, ເພື່ອຄວາມສະຫງົບສຸກຂອງສັງຄົມ ແລະ ເສຍສະຫລະເພື່ອສະຖຽນລະພາບ ແລະ ຄວາມໝັ້ນຄົງ ຂອງປະເທດຊາດເຮົາ,

ຖ້າພວກເຮົາພ້ອມກັນ ຜ່ານພົ້ນໄລຍະວິກິດນີ້ໄປໄດ້ ຄວາມຜາສຸກຮ່ວມກັນໃນວົງຄະນະຍາດແຫ່ງຊາດ ຂອງພວກເຮົາ, ຂອງຄອບຄົວເຮົາ ຈະກັບຄືນມາອີກຄັ້ງຢ່າງແນ່ນອນ.

ແຫຼ່ງຂໍ້ມູນ: ຂປລ