Sunday, July 14, 2024
Lenovo

5 ພຶດຕິກຳ ທີ່ເປັນບັນຫາ ເຮັດໃຫ້ຄອມພິວເຕີຊ້າ

ປິໃໝ່ແລ້ວ ເຮົາຕ້ອງປ່ຽນພຶດຕິກຳໃໝ່, ເຊິ່ງມື້ນີ້ ເຮົາຈະມາແນະນຳ 5 ພຶດຕິກຳທີ່ຫຼາຍຄົນມັກເຮັດໂດຍທີ່ບໍ່ຮູ້ໂຕ ເຊິ່ງຈະເຮັດໃຫ້ຄອມພິວເຕີຂອງເຈົ້າຊ້າລົງ ມາຮູ້ຈັກບັນຫາ ແລະ ປັບແກ້ໄປນໍາກັນ ດີກວ່າເຮົາເອົາເງິນໄປຊື້ຄອມໃໝ່.

1. ໃຊ້ໂປແກຣມຫຼາຍເກີນໄປ.

ຫາກໃຊ້ຄອມພິວເຕີໄປດົນໆ ຫຼາຍຄົນອາດຈະຫຼົງໄປຕິດຕັ້ງໂປແກຣມໄວ້ໃນເຄື່ອງຫຼາຍ 10 ໂປແກຣມ ແບບທີ່ບໍ່ໄດ້ໃຊ້ງານ ຫຼື ບາງໂປແກຣມເຮົາກໍອາດຈະລືມໄປເລີຍວ່າ ເຮົາລົງໄວ້ໃນເຄື່ອງ ເພາະບັນຫາທີ່ໃຫຍ່ທີ່ສຸດ ແມ່ນມາຈາກໂປແກຣມທີ່ຕັ້ງຄ່າໃຫ້ຕົວເອງເຮັດວຽກໃນເບື່ອງຫຼັງແບບອັດຕະໂນມັດ ເຊິ່ງໝາຍຄວາມວ່າມັນຈະກິນ RAM ຈົນເຮັດໃຫ້ເຄື່ອງຊ້າ ເຖິງວ່າຈະບໍ່ເຄີຍເປີດໃຊ້ງານກໍຕາມ.

ຫາກເຈົ້າມັກຕິດຕັ້ງແອັບໃໝ່ໆທີ່ບໍ່ໄດ້ໃຊ້ງານ ເຮົາແນະນຳໃຫ້ລຶບແອັບອອກເປັນການດີທີ່ສຸດ ເພາະຈະບໍ່ເຮັດໃຫ້ ມີການເຮັດວຽກທີ່ຊ້ອນທັບກັນຫຼາຍແອັບ.

2. ບໍ່ເຄີຍ Reboot ເຄື່ອງ.

ຫຼາຍຄົນມັກຈະເປີດຄອມຄ້າງໄວ້ ເພາະຈະໄດ້ກັບມາເຮັດວຽກຕໍ່ຈາກທີ່ຄ້າງໄວ້ຢ່າງໄວ ແລະ ງ່າຍ, ແຕ່ນີ້ຈະເປັນຄວາມຜິດພາດທີ່ອາດຈະສົ່ງຜົນກະທົບໃຫ້ຄອມພິວເຕີຂອງເຈົ້າເຮັດວຽກຊ້າລົງໄດ້.

ການເປີດ-ປິດເຄື່ອງເປັນປະຈຳເປັນສິ່ງສຳຄັນ ເພາະປະໂຫຍດຈາກການເປີດ-ປິດເຄື່ອງໃໝ່ ຄືການລ້າງໜ່ວຍຄວາມຈຳ RAM  ເຊິ່ງສາມາດແກ້ໄຂປັນຫາດ້ານປະສິດທິພາບ ຫຼື ຄອມຊ້າໄດ້.

3. ຄລິກແບບບໍ່ຄິດ.

ໃນຍຸກທີ່ມີ ໄວຣັສກະຈາຍເຕັມອິນເຕີເນັດ ເຮົາຕ້ອງລະວັງໃຫ້ຫຼາຍໆເມື່ອຄລິກລິ້ງ ແປກໆໃນໂລກອອນລາຍ ຮູ້ໄວ້ເລີຍວ່າເວັບໄຊຈຳນວນຫຼາຍ ເປັນຈຸດທີ່ວາງລະເບີດຂອງເນື້ອຫາທີ່ເປັນອັນຕະລາຍເຊັ່ນ: ປຸ່ມດາວໂຫຼດປອມ, ໂຄສະນາຂະໜາດໃຫຍ່ທີ່ນໍາໄປສູ່ເວັບໄຊທີ່ບໍ່ປອດໄພ ແລະ ອາດສ້າງບັນຫາໃຫ້ກັບຄອທພິວເຕີຕາມມາໄດ້, ໂດຍສະເພາະ ໂປແກຣມເຖື່ອນທີ່ມາພ້ອມກັບໄວຣັສ ຍິ່ງອັນຕະລາຍ.

ທາງທີ່ດີ ຄວນມີສະຕິທຸກຄັ້ງທີ່ໃຊ້ງານ ກ່ອນຈະຕິດຕັ້ງໂປແກຣມຫຍັງ ໃຫ້ໃຊ້ເວລາໃນການຢືນຢັນວ່າ ໂປແກຣມດັ່ງກ່າວມີໄວຣັສບໍ່, ເປັນເອກະສານອັນຕະລາຍບໍ່, ເຊິ່ງວິທີນີ້ ກໍຈະເປັນໜຶ່ງຊ່ອງທາງທີ່ຈະຊ່ວຍປ້ອງກັນໃຫ້ຄອມພິວເຕີປອດໄພ, ແຕ່ທາງທີ່ດີທີ່ສຸດ ຄວນເປີດ Firewall ລະບົບຄວາມປອດໄພທີ່ມາກັບຄອມພິວເຕີໄວ້ຕະຫຼອດເວລາ.

4. ບໍ່ໃສ່ໃຈເບິ່ງແຍງ.

ເຖິງວ່າ Windows ຈະມີການອັບເດດເພື່ອແກ້ໄຂບັນຫາຕ່າງໆ ທີ່ເກີດຂຶ້ນກັບລະບົບຢູ່ຫຼາຍຄັ້ງ ແຕ່ກໍຍັງບໍ່ສົມບູນເທົ່າທີ່ຄວນ, ເພາະໃນຂະນະທີ່ຄອມພິວເຕີເຮັດວຽກ ລະບົບຈະສ້າງໄຟລ໌ທີ່ຈຳເປັນໃນຊ່ວງເວລາສັ້ນໆ ແຕ່ຖ້າເຮົາປ່ອຍໃຫ້ໄຟລ໌ເຫຼົ່ານີ້ງອກອອກມາເປັນຈຳນວນຫຼາຍ ກໍຈະເຮັດໃຫ້ຄອມຊ້າໄດ້.

ສະນັ້ນ, ເຮົາຄວນເພີ່ມພື້ນທີ່ວ່າງອັດຕະໂນມັດ ຫຼື ຄົ້ນຫາ Disk Cleanup ໃນ Start menu ເພື່ອລ້າງຂໍ້ມູນ ແລະ ເຮົາຄວນສະແກນໄວຣັສເປັນປະຈຳ ເຖິງວ່າຈະມີກຳນົດສະແກນໄວຮັສຕາມລະບົບແລ້ວກໍຕາມ.

5. ມັກຄິດໄປເອງ.

ເປັນເລື່ອງປົກກະຕິ ທີ່ເຈົ້າມັກຈະຄິດໄປເອງວ່າ ຄອມມັນຊ້າ ແຕ່ໃນຄວາມເປັນຈິງ ຫາກເຈົ້າມີບັນຫາດ້ານຄວາມໄວເມື່ອໃຊ້ງານເວັບໄຊ, ສະຕຣີມເພງ ຫຼື ກິດຈະກຳອື່ນໆ ຄວາມໄວຄອມພິວເຕີຂອງເຈົ້າ ອາດຫຼຸດລົງ, ບັນຫານີ້ ອາດຈະເກີດຍ້ອນການເຊື່ອມຕໍ່ອິນເຕີເນັດຂອງເຈົ້າກໍເປັນໄດ້.

ເຖິງວ່າຈະເປັນຄອມພິວເຕີທີ່ແຮງທີ່ສຸດ ທາງທີດີຄວນເບິ່ງແຍງຄອມຢູ່ເປັນປະຈຳ ແລະ ຕ້ອງໃສ່ໃຈປະສິດທິພາບຂອງອິນເຕີເນັດ ທີ່ໃຊ້ນໍາ ເພາະມັນກ່ຽວຂ້ອງຢ່າງຫຼີກຫຼ່ຽງບໍ່ໄດ້.

ຫາກໃຜຍັງມີພຶດຕິກຳເຫຼົ່ານີ້ ຢູ່ລອງນໍາບັນຫາ ແລະ ວິທີເຫຼົ່ານີ້ໄປປັບໃຊ້ກັບຄອມຂອງທ່ານເບິ່ງວ່າຈະໃຊ້ໄດ້ບໍ່ ເພາະຫາກຄອມພິວເຕີມັນຊ້າ ເຮົາກໍບໍ່ຕ້ອງຈຳເປັນຊື້ເຄື່ອງໃໝ່ກໍໄດ້.

More from author

Related posts

ຂໍຂອບໃຈນຳຜູ້ສະໜັບສະໜູນ

Latest posts

ຊໍາຊຸງ ເປີດໂຕ Galaxy Z Fold6 ແລະ Z Flip6 ຍົກລະດັບ Galaxy Al ລຸ້ນໃໝ່ສໍາລັບໂທລະສັບໜ້າຈໍພັບ.

ຊໍາຊຸງລາວ ເປີດໂຕ Galaxy Z Fold6 ແລະ Z Flip6 ພ້ອມໂປຣໂມຊັນພິເສດສໍາລັບຜູ້ທີ່ສັ່ງຊື້ລ່ວງໜ້າທີ່ Galaxy Experience Space ນະຄອນຫຼວງວຽງຈັນ  ເປິດປະສົບການ Galaxy AI ລຸ້ນຫຼ້າສຸດສໍາລັບໂທລະສັບມືຖືໜ້າຈໍພັບ  ໃຫ້ຜູ້ເຂົ້າຮ່ວມງານໄດ້ສໍາຜັດການໃຊ້ງານໂທລະສັບມືຖືທີ່ທັນສະໄໝ  ຮ່ວມກັບໂມງ Galaxy Watch7 ແລະ ຫູຟັງ Galaxy Buds3/Galaxy Buds3 Pro ເຊິ່ງໄດ້ເປີດໂຕພອ້ມກັນໃນງານ Samsung Unpacked ທີ່ປາຣີ  (Paris) ປະເທດຝຣັ່ງ ໃນວັນທີ 10 ກໍລະກົດ 2024 ທີ່ຜ່ານມາ.

ສາຍການບິນ Vietjet ບັນລຸ​ຂໍ້​ຕົກລົງ ​ຍົກລະດັບ​ການ​ເຊື່ອມ​ຕໍ່​ການ​ຂົນ​ສົ່ງ​ທາງ​ອາກາດ ລະຫວ່າງ ສປປ ລາວ ແລະ ສສ ຫວຽດນາມ

(ນະຄອນຫຼວງວຽງຈັນ, ວັນທີ 11 ກໍລະກົດ 2024) - ກະຊວງໂຍທາທິການ ແລະ ຂົນສົ່ງປະຈຳ ສປປ ລາວ ແລະ ສາຍການບິນ Vietjet ປະກາດຂໍ້ຕົກລົງເພີ່ມທະວີການເຊື່ອມຕໍ່ການຂົນສົ່ງທາງອາກາດລະຫວ່າງ ປະເທດລາວ-ຫວຽດນາມ.

Sky Connections ໄດ້ຂະຫຍາຍ: ເສັ້ນທາງໃໝ່ຂອງສາຍການບິນ Vietjet ໃນທົ່ວປະເທດຈີນ ແລະ ເກົາຫຼີໃຕ້

(ນະຄອນຫຼວງວຽງຈັນ, ວັນທີ 08 ກໍລະກົດ 2024) –  ສາຍການບິນ Vietjet ໄດ້ສ້າງບາດກ້າວຄັ້ງໃໝ່ໃນການເຊື່ອມຕໍ່ສາຍການບິນຜ່ານ ພາກພື້ນອາຊີປາຊີຟິກ ດ້ວຍ​ການ​ເປີດ​ບໍລິການ​ໂດຍ​ກົງ​ແຫ່ງ​ທຳ​ອິດ ​ທີ່​ເຊື່ອມ​ຕໍ່​ ນະຄອນໂຮຈີ​ມິນ ​- Xi'an (ຈີນ) ​ແລະ ການ​ປະກາດ​ເສັ້ນທາງ Nha Trang - Daegu (ສ.​ເກົາຫຼີ),