ກຽມຈັດງານ ເທດສະການ “ຫຸ່ນເຟືອງ” ຄັ້ງທຳອິດໃນ ນະຄອນຫຼວງ.

ຊາວນະຄອນຫຼວງ ວຽງຈັນ ກຽມທ່ຽວຊົມງານເທດສະການ “ຫຸ່ນເຟືອງທົ່ງນາແຊງບ້ານນາ” ເຊີ່ງຈະຈັດຂຶ້ນຄັ້ງທຳອິດຢູ່ບ້ານ ໜອງບົວທອງເໜືອ, ເມືອງ ຈັນທະບູລີ, ນະຄອນຫຼວງ ວຽງຈັນ ໃນລະຫວ່າງວັນທີ 21-29 ມີນາ 2022 ໂດຍຈະມີຫຼາຍກິດຈະກໍາເພື່ອທ່ຽວຊົມ.

ທ່ານ ນາງ ວົງຈັນ ບົວແພງ ຮອງຜູ້ຈັດການ ໂຮງແຮມລາວເທວ, ທັງເປັນຜູ້ຮັບຜິດຊອບການຈັດງານຄັ້ງນີ້ ກ່າວວ່າ: ຈຸດປະສົງຂອງການຈັດງານໃນຄັ້ງນີ້ ເພື່ອເປັນການສົ່ງເສີມການທ່ອງທ່ຽວພາຍໃນນະຄອນຫຼວງ ວຽງຈັນ ຫຼື ລາວທ່ຽວລາວ ໃຫ້ກັບມາມີບັນຍາກາດຄຶກຄື້ນອີກຄັ້ງໜຶ່ງ, ນອກຈາກນີ້ ຍັງເປັນການສົ່ງເສີມທຸລະກິດຊຸມຊົນ ໃຫ້ມີບ່ອນຊື້-ບ່ອນຂາຍ ຂອງປະຊາຊົນພາຍໃນເມືອງ ຈັນທະບູລີ ກໍຄື ນະຄອນຫຼວງ ວຽງຈັນ.

ພາຍໃນງານ ແມ່ນຈະຈັດໃຫ້ມີຫຼາກຫຼາຍກິດຈະກໍາ ເຊັ່ນ: ການຖ່າຍຮູບກັບຫຸ່ນເຟືອງທີ່ເປັນສັດຫຼາຍປະເພດ ຄື: ຄວາຍ, ຊ້າງ, ສິງ, ເສືອ ແລະ ລິງ ການຂາຍສິນຄ້າຕ່າງໆ ຂອງປະຊາຊົນ, ລວມທັງຜູ້ປະກອບການທີ່ນໍາມາວາງສະແດງຂາຍພາຍໃນງານ.

ການຈັດງານໃນຄັ້ງນີ້ ຈະປະຕິບັດຄຽງຄູ່ກັບມາດຕະການປ້ອງກັນພະຍາດ ໂຄວິດ-19 ຢ່າງເຂັ້ມງວດ ແລະ ຖືເປັນຄັ້ງທໍາອິດ ທີ່ຈັດງານເທສະການຫຸ່ນເຟືອງທົ່ງນາແຊງບ້ານນາ ຢູ່ ນະຄອນຫຼວງວຽງຈັນ, ຖ້າຫາກໄດ້ຮັບຜົນດີຈະສືບຕໍ່ຈັດຂຶ້ນທຸກໆປີ ເພື່ອເປັນສ່ວນໜຶ່ງໃນການຊຸກຍູ້ສົ່ງເສີມການທ່ອງທ່ຽວພາຍໃນ ເມືອງ ຈັນທະບູລີ ໃຫ້ມີບັນຍາກາດຄຶກຄື້ນມ່ວນຊື່ນ.