ມື້ພັກຍາວ ເປັນຊ່ວງເວລາແຫ່ງຄວາມສຸກ ເຊິ່ງຫຼັງຈາກທີ່ໄດ້ຢຸດຫຼິ້ນບຸນປີໃໝ່ລາວ ກັນຢ່າງເຕັມທີ່ແລ້ວ ກໍຮອດເວລາທີ່ທຸກຄົນຕ້ອງກັບມາເຮັດວຽກ, ແນ່ນອນວ່າຄົງບໍ່ມີໃຜຢາກມີມື້ເຮັດວຽກມື້ທຳອິດດ້ວຍຄວາມວຸ້ນວາຍ ພາໃຫ້ອາລົມເສຍຈົນເສຍວຽກເສຍງານກັນ ຈຶ່ງຂໍແນະນຳວິທີຮັບມືກັບມື້ເຮັດວຽກມື້ທຳອິດຫຼັງພັກດົນເຮັດໃຫ້ທຸກຄົນໄດ້ພ້ອມສຳລັບການເລີ່ມວຽກມື້ທຳອິດຢ່າງມີຄຸນນະພາບແບບງ່າຍທີ່ໃຜໆ ກໍເຮັດໄດ້.
- ພັກຜ່ອນໃຫ້ພຽງພໍ: ໃນຊ່ວງມື້ພັກຍາວ ເຈົ້າອາດຈະນອນບໍ່ເປັນເວລາອາດຈະນອນເດີກຈົນເຮັດໃຫ້ຮ່າງກາຍຂອງເຈົ້າເສຍສົມດຸນ ເຈົ້າອາດຈະຕ້ອງໃຊ້ເວລາກັບໂຕເອງຢ່າງໜ້ອຍ 1 ມື້ເພື່ອຈັດເວລາໃນການຢຸດພັກຜ່ອນໃຫ້ເປັນລະບົບ ນອນໃນຊ່ວງເວລາທີ່ເໝາະສົມ ນອນໄວຂຶ້ນຢ່າງໜ້ອຍເຄິ່ງຊົ່ວໂມງ ແລະ ຕື່ນໃຫ້ເຊົ້າຂຶ້ນກວ່າເກົ່າເລັກນ້ອຍ ຮ່າງກາຍຈະໄດ້ຮູ້ສຶກບໍ່ອ່ອນເພຍຈົນເກີນໄປໃນລະຫວາງເຮັດວຽກ.
- ວາງແຜນການກັບມາໃຫ້ດີ: ແນ່ນອນວ່າ ເທດສະການພັກດົນແບບນີ້ ໝູ່ເພື່ອນທີ່ຮ່ວມທາງ ທັງຕອນໄປ ແລະ ຕອນກັບນັ້ນ ຈະແໜ້ນໜາເປັນພິເສດ ຫຼາຍເສັ້ນທາງທີ່ຜູ້ຄົນມັກທ່ຽວອາດແອອັດດ້ວຍລົດຕິດຫຼາຍ ດັ່ງນັ້ນ, ການວາງແຜນກັບບ້ານກັບຫໍພັກທີ່ດີ ຈະຊ່ວຍໃນເລື່ອງຂອງເວລາ ແລະ ຍັງເຮັດໃຫ້ເຮົາເຫຼືອເວລາໄດ້ພັກຜ່ອນຈາກການເດີນທາງໄດ້ອີກດ້ວຍ ສ່ວນໃຜທີ່ຈຳເປັນຕ້ອງເດີນທາງກັບຈາກຕ່າງແຂວງ ທີ່ເປັນແຫຼ່ງທ່ອງທ່ຽວຍອດນິຍົມ ລອງຫາມື້ກັບທີ່ໄວກວ່າຄົນອື່ນໆ ຫຼື ຫາກສະດວກລາພັກເພີ່ມໄດ້ໃຫ້ແນະນຳວ່າ ໃຫ້ຢູ່ທ່ຽວຕໍ່ ແລະ ຄ່ອຍກັບຫຼັງໝູ່ນັ້ນກໍບໍ່ແມ່ນເລື່ອງເສຍຫາຍ.
- ຈັດລຳດັບຄວາມສຳຄັນຂອງວຽກທີ່ຕ້ອງເຮັດ: ການກັບມາເຮັດວຽກມື້ທຳອິດນັ້ນອາດໝາຍເຖິງການສະສາງວຽກທີ່ຍັງຄ້າງຄາ ພ້ອມກັບຮັບວຽກທີ່ໄດ້ຮັບມອບໝາຍໃໝ່ຫາກເປັນແບບນັ້ນເມື່ອໄປຮອດໂຕະເຮັດວຽກໃນຕອນເຊົ້າ ເຈົ້າຄວນໄລ່ລຳດັບຂອງວຽກທີ່ຕ້ອງເຮັດໃຫ້ແລ້ວໃນມື້ນີ້ ໂດຍເລີ່ມຈາກວຽກງ່າຍໆ ທີ່ສຸດກ່ອນເພື່ອເປັນກຳລັງໃຈທີ່ຈະເຮັດໃຫ້ເຈົ້າເຮັດວຽກຕໍ່ໆ ໄປໄດ້ໝົດມື້.
- ໄປວຽກໃຫ້ໄວກວ່າປົກກະຕິ: ຫຼັງຈາກພັກດົນແນ່ນອນວ່າຜູ້ຄົນກັບມາເຮັດວຽກເດີນທາງຕາງທ້ອງຖະໜົນຈະເຮັດໃຫ້ລົດຕິດຫຼຼາຍ ຖ້າເປັນໄປໄດ້ຄວນອອກໃຫ້ໄວກວ່າປົກກະຕິທີ່ເຄີຍອອກປະມານ 30 ນາທີ ຈະຊ່ວຍໃຫ້ໄປຮອດບ່ອນເຮັດວຽກໄດ້ໄວຂຶ້ນ ແລະ ບໍ່ຮູ້ສຶກໃຈຮ້າຍ, ເມື່ອຮອດບ່ອນເຮັດວຽກໄວ ກໍຈະຊ່ວຍຕັ້ງສະຕິໃນການເຮັດວຽກໄດ້ໄວຂຶ້ນ ເຊິ່ງອາດຈະກິນເຂົ້າເຊົ້າກ່ອນຈາກນັ້ນກໍເລີ່ມລົງມືເຮັດຕາມທີ່ກຽມເອົາໄວ້.
- ກວດວ່າມີວຽກທີ່ເຮັດຄ້າງຢູູ່ບໍ່: ຫຼັງຈາກເຕີມພະລັງກັນເຕັມທີ່ແລ້ວ ຫາກພໍມີເວລາວ່າງໃຫ້ລອງຄິດຍ້ອນໄປເບິ່ງວ່າຍັງມີວຽກຫຍັງຕົກຄ້າງຢູ່ແດ່ ຈະໄດ້ກຽມຕົວວາງແຜນຮັບມືໄດ້ຖືກ ເພາະບາງເທື່ອວຽກທີ່ຄ້າງຢູ່ອາດເປັນວຽກທີ່ເລັ່ງດ່ວນທີ່ຕ້ອງລຸຍ ຕັ້ງແຕ່ມື້ທຳອິດທີ່ເປີດວຽກຈະໄດ້ພໍມີເວລາໃຫ້ໄດ້ກຽມຕົວກຽມໃຈເຮັດວຽກກັນຢ່າງເຕັມທີ່.
- ເກັບບັນຍາກາດຈາກການທ່ອງທ່ຽວມານຳ: ການນຳຂອງທີ່ລະນຶກ ຈາກສະຖານທີ່ທ່ອງທ່ຽວໄປບ່ອນເຮັດວຽກນຳ ຈະຊ່ວຍໃຫ້ຮູ້ສຶກສຸກໃຈຄິດຮອດຕອນໄປທ່ຽວຢ່າງມີຄວາມສຸກ ຄືມື້ທີ່ໄປທ່ຽວຜ່ານມາ ຈະຊ່ວຍສ້າງແຮງບັນດານໃຈກ່ອນເລີ່ມວຽກໄດ້.
- ຢ່າເຮັດໃຫ້ເສຍບັນຍາກາດການເຮັດວຽກ: ການກັບມາເຮັດວຽກມື້ທຳອິດບໍ່ຄວານເຮັດໃຫ້ມື້ນີ້ທັງມື້ໝົດໄປກັບເລື່ອງອື່ນ ນອກຈາກວຽກທີ່ຖ້າຢູູ່ ຫຼື ທຳລາຍບັນຍາກາດໃນການເຮັດວຽກດ້ວຍການເອົາແຕ່ແບ່ງປັນປະສົບການ ການທ່ອງທ່ຽວໃນເວລາເຮັດວຽກເຊິ່ງອາດເຮັດໃຫ້ໝູ່ຮ່ວມງານບໍ່ມີຄວາມສຸກ ແລະ ຫົວໜ້າບໍ່ພໍໃຈໄດ້.
- ເລີ່ມເຮັດວຽກດ້ວຍມູມມອງໃໝ່ໆ: ບາງຄົນ ຫຼັງກັບຈາກບ່ອນພັກຜ່ອນ ມັກຈະມີຄວາມຄິດດີໆ ກັບມາ ຈາກປະສົບການຕອນໄປທ່ຽວ ເຊິ່ງບາງເທື່ອອາດເກີດຂຶ້ນໄດ້ດ້ວຍການຊົມວິວທິວທັດ ຫຼື ຫຼັງຈາກທີ່ໄດ້ພັກຜ່ອນເຕັມທີ່ ແລະ ນີ້ຄືເທັກນິກທີ່ຫຼາຍຄົນຂໍເວລາ ຖ້າເລີ່ມໂຄງການໃໝ່ຫຼັງກັບຈາກມື້ພັກຍາວ.
