ປາຍຝົນຕົ້ນໜາວ ເປັນອີກໄລຍະໜຶ່ງທີ່ນຳພາໂຣກໄພໄຂ້ເຈັບມາສູ່ຄົນເຮົາ ເມື່ອເລີ່ມມີອາກາດໜາວເຂົ້າມາ ກໍເຮັດໃຫ້ຮ່າງກາຍຂອງເຮົາປັບຕົວບໍ່ທັນ ແລະ ສົ່ງຜົນໃຫ້ບໍ່ສະບາຍໄດ້ງ່າຍ ເຊິ່ງໂຣກທີ່ມາພ້ອມກັບລະດູໜາວ ຈະມີໂຣກໃດນັ້ນ ໄປເບິ່ງກັນເລີຍ:
- ໄຂ້ຫວັດ: ຖືເປັນໂຣກພື້ນຖານ ທີ່ເປັນໄດ້ທຸກລະດູການ ແຕ່ລະດູໜາວອາດຈະເປັນໄດ້ງ່າຍກວ່າປົກກະຕິເຖິງ 2 ເທົ່າ ເຊິ່ງໄຂ້ຫວັດເກີດຈາກເຊື້ອໄວຣັສ ທີ່ເຮັດໃຫ້ເກີດໂຣກ ໃນລະບົບຫາຍໃຈ ເຊິ່ງອາການຂອງຜູ້ປ່ວຍມັກຈະມີອາການຄັນດັງ, ມີນ້ຳມູກໄຫຼອອກມາ, ໄອ, ຈາມ, ເຈັບຄໍ ຈາກນັ້ນຈະເລີ່ມມີໄຂ້ , ໜາວສັ່ນ, ເຈັບຫົວ ແລະ ປວດຕາມຕົນໂຕ.
ວິທີປິ່ນປົວ: ເປັນໄຂ້ຫວັດຄວນພັກຜ່ອນໃຫ້ພຽງພໍ, ດື່ມນ້ຳຫຼາຍໆ, ເຊັດຕົວທຸກຊົ່ວໂມງ, ກິນຢາຫຼຸດໄຂ້, ຢາດີໄອ, ຢາຫຼຸດນ້ຳມູກໄຫຼ ແຕ່ຖ້າມີໄຂ້ຂຶ້ນສູງ ຕິດຕໍ່ກັນດົນ ຄວນໄປພົບແພດດ່ວນ ເພື່ອຕິດຕາມອາການໃຫ້ລະອຽດ.
- ໄຂ້ຫວັດໃຫຍ່: ມີອາການຄ້າຍຄື ໄຂ້ຫວັດທຳມະດາ ແຕ່ຮຸນແຮງກວ່າ ຫາກປ່ອຍໄວ້ຈົນມີອາການແຊກຊ້ອນ ອາດເຮັດໃຫ້ເສຍຊີວິດໄດ້, ໄຂ້ຫວັດໃຫຍ່ ເກີດຈາກການຕິດເຊື້ອໄວຣັສ “ອິນຟລູເອນຊາ” (Influenza virus) ທາງລະບົບຫາຍໃຈ ຢ່າງໄວວາ ເຮັດໃຫ້ມີອາການໜາວສັ່ນ, ໄຂ້ຂຶ້ນສູງ, ເຈັບຄໍ, ປວດເມື່ອຍກ້າມຊີ້ນ ແລະ ເຈັບຫົວຢ່າງຮຸນແຮງ ແລະ ອາດເຮັດໃຫ້ມີອາການປຸ້ນທ້ອງປວດຮາກ.
ວິທີປິ່ນປົວ: ການປິ່ນປົວຄ້າຍຄືກັບ ໂຣກໄຂ້ຫວັດທຳມະດາ ຄວນດື່ມນ້ຳໃຫ້ຫຼາຍໆ ເພື່ອຫຼຸດອຸນຫະພູມຂອງຮ່າງກາຍ, ເຊັດໂຕທຸກຊົ່ວໂມງ, ກິນຢາຕາມອາການ ແລະ ມີຢາຕ້ານໄວຣັສໄຂ້ຫວັດໃຫຍ່ ແຕ່ບໍ່ຈຳເປັນສຳລັບທຸກຄົນ, ຖ້າກິນຢາຫຼຸດໄຂ້ແລ້ວອາການບໍ່ດີຂຶ້ນ ແນະນຳໃຫ້ໄປພົບໝໍທັນທີ.
- ໂຣກປອດບວມ: ຄືພາວະປອດອັກເສບ ຈາກເຊື້ອແບັກທີເຣຍ ຫຼື ເຊື້ອໄວຣັສ ຈົນເຮັດໃຫ້ມີໜອງ ແລະ ມີສານປົນເປື້ອນພາຍໃນຖົງລົມ, ຜູ້ປ່ວຍມັກມີອາການ ຄື: ໄອ, ຈາມ, ມີຂີ້ກະເທີ, ແໜ້ນໜ້າເອິກ ຈົນຫາຍໃຈບໍ່ອອກ, ຄັນດັງ, ໜາວສັ່ນ, ມີໄຂ້ສູງຕິດຕໍ່ກັນຫຼາຍກວ່າ 2 ມື້, ປອດບວມ ມັກພົບຫຼັງຈາກການເປັນໄຂ້ຫວັດຊຳເຮື້ອ ແລະ ຜູ້ປ່ວຍໂຣກຫອບຫືດ, ປອດບວມ ມັກພົບໃນກຸ້ມຜູ້ສູງອາຍຸ ແລະ ເດັກນ້ອຍອາຍຸລະຫວ່າງ 5-10 ປີ.
ວິທີປິ່ນປົວ: ຫາກມີອາການຄ້າຍຄືເປັນປອດບວມ ຄວນໄປພົບໝໍໃຫ້ໄວທີ່ສຸດ ແລະ ຫາກໝໍວິນິດໄສວ່າ ມີອາການປອດບວມແລ້ວ ຈະໃຫ້ກິນຢາຕ້ານເຊື້ອ ຄວບຄູ່ກັບຢາຫຼຸດໄຂ້, ຢາລະລາຍຂີ້ກະເທີ່ ແລະ ຢາຂະຫຍາຍຫຼອດລົມ ພ້ອມແນະນຳໃຫ້ຜູ້ປ່ວຍດື່ມນ້ຳຫຼາຍໆ ເພາະນ້ຳຈະຊ່ວຍລະລາຍຂີ້ກະເທີ່ໄດ້.
- ໂຣກຫັດ: ເປັນໂຣກທີ່ເກີດຈາກເຊື້ອໄວຣັສ ເປັນໂຣກທີ່ເກີດຂຶ້ນຫຼາຍກັບເດັກນ້ອຍ ອາການຂອງໂຣກນີ້ ຈະຄ້າຍກັບໄຂ້ຫວັດ ຄື: ມີໄຂ້, ມີນ້ຳມູກ, ໄອແຫ້ງຕະຫຼອດເວລາ, ຕາ ແລະ ດັງແດງ ໂດຍມັກມີໄຂ້ສູງປະມານ 3-4 ມື້ຕິດຕໍ່ກັນ, ຈາກນັ້ນ ຈຶ່ງຂຶ້ນຜື່ນແດງ ຕາມຮ່າງກາຍ ໂດຍຜື່ນຈະຄ່ອຍໆ ໃຫຍ່ຂຶ້ນ ແລະ ມີສີເຂັ້ມຂຶ້ນ, ອາການທີ່ສັງເກດໄດ້ວ່າຈະເປັນໂຣກຫັດ ຄື: ຜູ້ປ່ວຍມັກມີຕຸ່ມໃສໆ ຂຶ້ນໃນປາກ, ຜົ້ງແກ້ມ, ກາມແຂ້ວ ເຊິ່ງເປັນຕຸ່ມທີ່ເກີດສະເພາະໃນໂຣກຫັດເທົ່ານັ້ນ, ຫຼັງຈາກຜື່ນອອກປະມານ 2-3 ມື້ ອາການກໍຈະດີຂຶ້ນເລື້ອຍໆ ແລະ ຫາຍໃຈໄດ້ເອງ, ແຕ່ສິ່ງທີ່ຕ້ອງລະວັງຄື ໂຣກແຊກຊ້ອນ ເຊັ່ນ: ປອດບວມ, ຖອກທ້ອງ, ສະໝອງອັກເສບ ເປັນຕົ້ນ, ໂຮກຫັດ ຈະຕິດຕໍ່ທາງລົມຫາຍໃຈ, ໄອ, ຈາມ ກຸ່ມສ່ຽງທີ່ຈະຕິດໂຣກນີ້ຄື ເດັກອາຍຸລະຫວ່າງ 5-9 ປີ.
ວິທີປິ່ນປົວ : ໂຣກຫັດ ບໍ່ແມ່ນໂຣກທີ່ຮ້າຍແຮງ ແຕ່ຍັງບໍ່ມີຢາທີ່ຮັກສາໂດຍກົງ ຈຶ່ງຕ້ອງຮັກສາຕາມອາການເຊັ່ນ: ກິນຢາລົດໄຂ້, ດື່ມນ້ຳຫຼາຍໆ ແລະຜັກຜ່ອນໃຫ້ພຽງພໍ, ອາການຕ່າງໆຈະບັນເທົາລົງເອງ ແຕ່ຫາກມີພາວະແຊກຊ້ອນອື່ນໆເຊັ່ນ: ຫາຍໃຈສັ່ນ, ເຈັບທີ່ໜ້າເອິກຄະນະຫາຍໃຈ, ຊັກ ຄວນຮີບໄປຫາໝໍໂດຍດ່ວນ.
- ໂຣກຖອກທ້ອງ: ເປັນໂຣກທີ່ມາພ້ອມກັບລະດູໜາວ ສ່ວນໃຫຍ່ມີສາເຫດມາຈາກ ການຕິດເຊື້ອ “ໄວຣັສໂຣຕ້າ” (Rotavirus) ມັກພົບໃນເດັກນ້ອຍອາຍຸຕ່ຳກວ່າ 5 ປີ, ໂດຍກຸ່ມທີ່ພົບຫຼາຍທີ່ສຸດຄື ເດັກນ້ອຍອາຍຸ 6-12 ເດືອນ ເພາະເດັກນ້ອຍໄວນີ້ ມີພູມຕ້ານທານຕ່ຳ ແລະ ມັກມີພືດຕິກຳ ຈັບສິ່ງຂອງເຂົ້າປາກ ເຊິ່ງຈະເພີ່ມໂອກາດໃຫ້ເຊື້ອເຂົ້າສູ່ຮ່າງກາຍໄດ້ງ່າຍຂຶ້ນ, ອາການຄື: ມີໄຂ້, ຖ່າຍແຫຼວ ແລະ ຮາກຢ່າງໜັກ ຈົນອາດເຮັດໃຫ້ເກີດພາວະຂາດນ້ຳຮຸ້ນແຮງ ເຖິງຂັ້ນຊ໊ອກ ຫຼື ເສຍຊີວິດ, ດັ່ງນັ້ນ ຫາກຜູ້ປ່ວຍມີອາການຕາມທີ່ກ່າວມາ ຄວນພົບໝໍໃຫ້ໄວທີ່ສຸດ ເພາະຫາກປ່ອຍຖີ້ມໄວ້ ອາດເປັນອັນຕະລາຍເຖິງຊີວິດໄດ້.
ວິທີປິ່ນປົວ: ບັດຈຸບັນ ບໍ່ມີຢາປິ່ນປົວໂຣກນີ້ໂດຍກົງ ຈຶ່ງເຮັດໄດ້ແຕ່ປະຄັບປະຄອງ ອາການຂອງຜູ້ປ່ວຍໃຫ້ດີຂຶ້ນ ໂດຍໃຫ້ຜູ້ປ່ວຍ ໄດ້ຮັບສານລະລາຍເກືອແຮ່ຕະຫຼອດ ເພື່ອປ້ອງກັນການຂາດນ້ຳ ແຕ່ຫາກຜູ້ປ່ວຍດື່ມນ້ຳບໍ່ໄດ້ ຈຳເປັນຕ້ອງໄດ້ໃຫ້ນ້ຳເກືອທາງເສັ້ນເລືອດແທນ, ຄວນກິນອາຫານທີ່ອ່ອນໆ ແລະ ອາການ ຈະຄ່ອຍໆດີຂຶ້ນ.
- ໂຣກໄຂ້ອີ່ສຸກອີ່ໃສ: ມັກລະບາດໃນຊ່ວງປາຍລະດູໜາວຄືເດືອນ ທັນວາ ຫາ ເດືອນ ມີນາ ເປັນໂຣກທີ່ເກີດຈາກເຊື້ອໄວຮັສ “ວາຣິເຊລລາ” (Varicella virus) ຫຼື ໄວຣັສ (Human herpesvirus type 3) ຕິດຕໍ່ໄດ້ໂດຍການສຳພັດ ຕຸ່ມນ້ຳໃສໂດຍກົງ ຫຼື ການສຳພັດສິ່ງຂອງຂອງຜູ້ປ່ວຍເຊັ່ນ: ແກ້ວນ້ຳ, ຜ້າເຊັດໜ້າ, ເຊັດຕົວ, ຜ້າຫົ່ມ, ບ່ອນນອນ ຫຼື ສູບຫາຍໃຈເອົາລະອອງຂອງຕຸ່ມນ້ຳເຂົ້າໄປ ພົບຫຼາຍໃນເດັກນ້ອຍອາຍຸຕ່ຳກວ່າ 15 ປີ ອາການເບື້ອງຕົນຈະຄ້າຍໄຂ້ຫວັດໃຫຍ່ຄື: ຜູ້ປ່ວຍຈະມີໄຂ້ຕ່ຳ, ເບື່ອອາຫານ, ປວດເມື່ອຍຕາມຮ່າງກາຍ ແຕ່ຈະມີຜື່ນແດງ ຫຼື ຕຸ່ມນ້ຳໃສຂຶ້ນຕາມຮ່າງກາຍ ຫຼື ອາການຄັນ ຕໍ່ມາຈະກາຍເປັນໜອງ ຫຼັງຈາກນັ້ນຈະແຫ້ງ ແລະ ຕົກເກັດພາຍໃນ 5-10 ມື້ ແລະ ອາການໄຂ້ກໍຈະຄ່ອຍໆດີຂຶ້ນ.
ວິທີປິ່ນປົວ: ໄຂ້ອີ່ສຸກອີ່ໃສຕ້ອງປິ່ນປົວຕາມອາການ ຫາກມີໄຂ້ໃຫ້ກິນຢາຫຼຸດໄຂ້, ງົດການໃຊ້ສິ່ງຂອງຮ່ວມກັບຜູ້ອື່ນ ແລະ ຢຸດພັກຈົນກວ່າຈະປິ່ນປົວດີ, ຫ້າມແກະ ຫຼື ເກົາ ບໍລິເວນຕຸ່ມ ເພາະຈະເຮັດໃຫ້ອັກເສບ ແລະເປັນແຜເປັນໄດ້ ສ່ວນຫຼາຍຜູ້ປ່ວຍໂຣກນີ້ ບໍ່ຕ້ອງພົບໝໍກໍໄດ້ເພາະອາການບໍ່ຮຸນແຮງ, ບໍ່ມີໂຣກແຊັກຊ້ອນ ແລະອາການຈະບັນເທົາລົງເອງ.
