ດອຍກາວ ເປັນອີກສະຖານທີ່ທ່ອງທ່ຽວແຫ່ງໜຶ່ງຂອງເມືອງ ໄຊສະຖານ, ແຂວງ ໄຊຍະບູລີ ທີ່ສາມາດດຶງດູດ ນັກທ່ອງທ່ຽວ ມາທ່ຽວຊົມໄດ້ ໂດຍສະເພາະແມ່ນໃນລະດູໜາວຈະມີນັກທ່ອງທ່ຽວເຂົ້າມາຢ້ຽມຢາມຫຼາຍກວ່າລະດູອື່ນໆ ເນື່ອງຈາກວ່າມີອາກາດດີ, ມີທະເລໝອກໃຫ້ຊົມ, ໄດ້ສຳພັດກັບອາກາດໜາວເຢັນ, ຊົມຕາເວັນຂຶ້ນໃນຕອນເຊົ້າ ແລະ ຊົມຕາເວັນຕົກໃນຕອນຄ້ອຍຄ່ຳຍາມແລງ.
ນອກຈາກ ຈະມີອາກາດ ແລະ ທຳມະຊາດ ເປັນຈຸດດຶງດູດໃຫ້ນັກທ່ອງທ່ຽວ ປັດຈຸບັນ ທາງເມືອງ ໄຊສະຖານ ຍັງໄດ້ມີການປັບ ປຸງ ກໍ່ສ້າງເຮືອນຍາວ ທີ່ເປັນເອກະລັກ ຂອງເຜົ່າໄປຣ ທີ່ໄດ້ອາໄສຢູ່ດອຍກາວແຫ່ງນີ້, ເພື່ອໃຫ້ນັກທ່ອງທ່ຽວໄດ້ຮຽນຮູ້ ວັດທະນະທຳຊົນເຜົ່າດັ່ງກ່າວ ແລະ ຍັງໄດ້ສ້າງຫ້ອງນ້ຳ, ປຸກຕູບນ້ອຍ, ສ້າງສາລາພັກຜ່ອນ ໄວ້ໃຫ້ນັກທ່ອງທ່ຽວ ທີ່ເຂົ້າມາ ທ່ຽວຊົມດອຍກາວອີກດ້ວຍ.
ສຳລັບການເດີນທາງ ຈາກເມືອງພຽງ ໄປຫາ ດອຍກາວ, ເມືອງ ໄຊສະຖານ ແມ່ນຕ້ອງຜ່ານເທດສະບານແຂວງ ໄຊຍະບູລີ ໄປທາງທິດເໜືອ ໄລຍະທາງ 95 ກິໂລແມັດ, ໃຊ້ເວລາ 3 ຊົ່ວໂມງ (ສຳລັບລົດຈັກ) ສ່ວນລົດໃຫຍ່ອາດຈະໃຊ້ເວລາ ດົນກວ່າເລັກນ້ອຍ.
ເຖິງແມ່ນວ່າການເດີນທາງຈະຍາວໄກ ແຕ່ຕະຫຼອດການເດີນທາງ ທ່ານຈະໄດ້ສຳຜັດກັບທິວທັດທຳມະຊາດທີ່ສວຍງາມ, ສ່ວນນັກທ່ອງທ່ຽວທ່ານໃດທີ່ມັກຄວາມຕື່ນເຕັ້ນ, ມັກທຳມະຊາດ, ວິຖີຊີວິດແບບພື້ນບ້ານ ຕ້ອງລອງໄປສຳຜັດ ແລະ ສູດອາກາດບໍລິສຸດ ທີ່ ດອຍກາວ ກັນແລ້ວ.
Hits: 6
