ເລີ່ມປາຍຝົນຕົ້ນໜາວ ເຊິ່ງເປັນອີກໄລຍະໜຶ່ງທີ່ຫຼາຍຄົນມັກເລີ່ມມີອາການເຈັບເປັນ ອັນເນື່ອງມາຈາກທີ່ຮ່າງກາຍຂອງເຮົາປັບຕົວບໍ່ທັນ ແລະ ສົ່ງຜົນໃຫ້ບໍ່ສະບາຍໄດ້ງ່າຍ ເຊິ່ງໂຣກທີ່ຫຼາຍຄົນມັກເປັນ ແລະ ໃກ້ໂຕເຮົາທີ່ສຸດນັ້ນກໍຄື “ໄຂ້” ແຕ່ອາການຂອງແຕ່ລະຄົນຕ່າງກັນອອກໄປ ບາງຄົນອາດເປັນແປບດຽວເຊົາ ຫຼື ບາງຄົນເປັນ 2 ອາທິດກໍຍັງບໍ່ເຊົາ ເຊິ່ງສາເຫດມາຈາກຫຼາຍປັດໄຈ ໜຶ່ງໃນນັ້ນກໍອາດຈະເປັນໄຂ້ຫວັດໃຫຍ່ ທີ່ມີຄວາມຄ້າຍຄືກັນກັບ ໄຂ້ທຳມະດາ.
ໄຂ້ຫວັດທຳມະດາ ຖືເປັນໂຣກພື້ນຖານ ທີ່ເປັນໄດ້ທຸກລະດູການ ແຕ່ລະດູໜາວອາດຈະເປັນໄດ້ງ່າຍກວ່າປົກກະຕິເຖິງ 2 ເທົ່າ ເຊິ່ງໄຂ້ຫວັດເກີດຈາກເຊື້ອໄວຣັສ ທີ່ເຮັດໃຫ້ເກີດໂຣກ ໃນລະບົບຫາຍໃຈ ເຊິ່ງອາການຂອງຜູ້ປ່ວຍມັກຈະມີອາການຄັນດັງ, ມີນ້ຳມູກໄຫຼອອກມາ, ໄອ, ຈາມ, ເຈັບຄໍ ຈາກນັ້ນຈະເລີ່ມມີໄຂ້ , ໜາວສັ່ນ, ເຈັບຫົວ ແລະ ປວດຕາມຕົນໂຕ.
ໄຂ້ຫວັດໃຫຍ່ ຈະມີອາການຄ້າຍຄື ໄຂ້ຫວັດທຳມະດາ ແຕ່ຮຸນແຮງກວ່າ ຫາກປ່ອຍໄວ້ຈົນມີອາການແຊກຊ້ອນ ອາດເຮັດໃຫ້ເສຍຊີວິດໄດ້, ໄຂ້ຫວັດໃຫຍ່ ເກີດຈາກການຕິດເຊື້ອໄວຣັສ “ອິນຟລູເອນຊາ” (Influenza virus) ທາງລະບົບຫາຍໃຈ ຢ່າງໄວວາ ເຮັດໃຫ້ມີອາການໜາວສັ່ນ, ໄຂ້ຂຶ້ນສູງ, ເຈັບຄໍ, ປວດເມື່ອຍກ້າມຊີ້ນ ແລະ ເຈັບຫົວຢ່າງຮຸນແຮງ ແລະ ອາດເຮັດໃຫ້ມີອາການປຸ້ນທ້ອງປວດຮາກ.
ມື້ນີ້ເຮົາເລີຍຈະມາປຽບທຽບຄວາມແຕກຕ່າງລະຫວ່າງ ໄຂ້ຫວັດໃຫຍ່ ກັບ ໄຂ້ຫວັດທຳມະດາ ນໍາກັນ:
1. ອາການໄຂ້
ໄຂ້ຫວັດທຳມະດາ: ເປັນໄຂ້ຕໍ່າບໍ່ຮ້ອນຫຼາຍ ກິນຍາ 1-2 ກໍເຊົາ
ໄຂ້ຫວັດໃຫຍ່: ເປັນໄຂ້ສູງ ເປັນດົນກວ່າ 3-4 ມື້ຂຶ້ນໄປ
2. ປວດຫົວ
ໄຂ້ຫວັດທຳມະດາ: ປວດຫົວໜ້ອຍດຽວ ຫຼື ອາດບໍ່ປວດເລີຍ
ໄຂ້ຫວັດໃຫຍ່: ປວດຫົວຫຼາຍກວ່າປົກກະຕິ
3. ເມື່ອຍຕາມໂຕ
ໄຂ້ຫວັດທຳມະດາ: ເມື່ອຍໜ້ອຍດຽວ
ໄຂ້ຫວັດໃຫຍ່: ເມື່ອຍຫຼາຍ
4. ບໍ່ມີແຮງ
ໄຂ້ຫວັດທຳມະດາ: 1-2 ວັນກໍເຊົາ
ໄຂ້ຫວັດໃຫຍ່: ບໍ່ມີແຮງ ອາດໃຊ້ເວລາເປັນອາທິດ
5. ອາການໄອ
ໄຂ້ຫວັດທຳມະດາ: ໄອບໍ່ຫຼາຍ ໄອແຫ້ງ
ໄຂ້ຫວັດໃຫຍ່: ໄອໜັກ ໄອຕະຫຼອດ ແລະມີຂີ້ກະເທິ
6. ນໍ້າມູກ
ໄຂ້ຫວັດທຳມະດາ: ນໍ້າມູກໃສ ຫຼື ບໍ່ມີເລີຍ
ໄຂ້ຫວັດໃຫຍ່: ນໍ້າມູກຂຸ້ນ ໜຽວ
7. ເຈັບຄໍ
ໄຂ້ຫວັດທຳມະດາ: ເປັນແຕ່ຊ່ວງທຳອິດ
ໄຂ້ຫວັດໃຫຍ່: ອາດບໍ່ມີອາການເຈັບຄໍ ເພາະຈະມີສ່ວນໜ້ອຍເທົ່ານັ້ນທີ່ເປັນ
8. ການປ້ອງກັນ
ໄຂ້ຫວັດທຳມະດາ: ບໍ່ມີການປ້ອງກັນໂດຍກົງ ພຽງແຕ່ອອກກຳລັງກາຍຮັກສາສຸຂະພາບ
ໄຂ້ຫວັດໃຫຍ່: ສັກວັກຊີນປ້ອງກັນໄຂ້ຫວັດໃຫຍ່
ເຖິງຢ່າງໃດກໍຕາມ ວິທີການຫຼີກລ້ຽງການເປັນໄຂ້ຫວັດ ບໍ່ວ່າຈະເປັນຊະນິດໃດກໍຕາມ ຄືການຮັກສາສຸຂະພາບໃຫັແຂງແຮງຢູ່ຕະຫຼອດ ກິນອາຫານທີ່ມີປະໂຫຍດ ພັກຜ່ອນໃຫ້ພຽງພໍ ຖ້າມີອາການຮຸນແຮງ ທາງທີ່ດີທີ່ສຸດຄືການໄປພົບແພດໝໍ.