ແຂວງຫຼວງນໍ້າທາ ເປັນອີກແຂວງໜຶ່ງທີ່ມີແຫຼ່ງທ່ອງທ່ຽວທາງທຳມະຊາດ, ວັດທະນະທຳ ທີ່ຕິດພັນກັບຊີວິດການເປັນຢູ່ ແລະ ຮີດຄອງປະເພນີທີ່ປະຊາຊົນມີສ່ວນຮ່ວມ, ດ້ວຍເຫດນີ້ ຈຶ່ງເຮັດໃຫ້ແຂວງຫຼວງນຳທາໄດ້ຮັບ 2 ລາງວັນມາດຕະຖານອາຊຽນຄື: “ຫ້ອງນໍ້າສາທາລະນະສະອາດອາຊຽນ” ແລະ ອີກລາງວັນໜຶ່ງແມ່ນ “ວົງຈອນເສັ້ນທາງທ່ອງທ່ຽວປະຈົນໄພຊຸມຊົນບ້ານນາລັນເໜືອ (Nalan Trail)”, ເມືອງຫຼວງນໍ້າທາ ທີ່ໄດ້ຮັບລາງວັນການທ່ອງທ່ຽວແບບປະຊາຊົນມີສ່ວນຮ່ວມມາດຕະຖານອາຊຽນ ຮອບທີ II ທີ່ ກອງປະຊຸມລັດຖະມົນຕີທ່ອງທ່ຽວອາຊຽນ ຄັ້ງທີ 28 ລະຫວ່າງວັນທີ 19-20 ມັງກອນ 2025, ປະເທດມາເລເຊຍ.
ລາງວັນອັນຊົງກຽດນີ້ ມັນສ່ອງແສງເຖິງຄວາມມຸ້ງໝາຍອັນສໍາຄັນ ແລະ ພິເສດ ຂອງວົງຈອນເສັ້ນທາງທ່ອງທ່ຽວປະຈົນໄພຊຸມຊົນບ້ານນາລັນເໜືອ ຕໍ່ກັບການທ່ອງທ່ຽວແບບຍືນຍົງ ລວມທັງການປົົກປັກຮັກສາມໍລະດົກທໍາມະຊາດ ເຂດປ່າສະຫງວນແຫ່ງຊາດນໍ້າຫ້າ.
ວົງຈອນເສັ້ນທາງທ່ອງທ່ຽວປະຈົນໄພຊຸມຊົນບ້ານນາລັນເໜືອ ຕັ້ງຢູ່ໃນເຂດພື້ນທີ່ປ່າສະຫງວນແຫ່ງຊາດຫ້າ ມໍລະດົກອາຊຽນ ມີ 6 ບ້ານທີ່ມີສ່ວນຮ່ວມ ຄື: ບ້ານຈະເລີນສຸກ, ບ້ານທ່າແສ່, ບ້ານນາລັນເໜືອ, ບ້ານນາໂຮມ, ບ້ານນໍ້າລື ແລະ ບ້ານຫ້ວຍເລືອດ. ເສັ້ນທາງດັ່ງກ່າວ ໄດ້ສະໜອງປະສົບການທີ່ເປັນເອກະລັກ ແລະ ດູດດື່ມ ສຳລັບຜູ້ທີ່ຮັກມັກທຳມະຊາດ ແລະ ວັດທະນະທຳ. ນັກທ່ອງທ່ຽວສາມາດເຂົ້າຮ່ວມກິດຈະກຳຕ່າງໆ, ລວມທັງການຍ່າງປ່າ, ຕັ້ງແຄ້ມ, ຂີ່ເຮືອຢາງລ່ອງຕາມແມ່ນ້ຳຫ້າ-ນໍ້າທາ ທີ່ປະຈົນໄພ ແລະ ງຽບສະຫງົບ. ກິດຈະກໍາເຫຼົ່ານີ້ແມ່ນໄດ້ຖືກອອກແບບມາ ເພື່ອສະໜອງຄວາມຕ້ອງການຢ່າງໃກ້ຊິດ ກັບຄວາມສວຍສົດງົດງາມທາງດ້ານທໍາມະຊາດ ແລະ ຊີວະນາໆພັນຂອງປ່າສະຫງວນແຫ່ງຊາດນໍ້າຫ້າ.
ອີກຈຸດເດັ່ນໜຶ່ງທີ່ຜູ້ມາຢ້ຽມຢາມຈະໄດ້ຮັບ ຈາກປະສົບການຂອງວົງຈອນເສັ້ນທາງທ່ອງທ່ຽວປະຈົນໄພຊຸມຊົນບ້ານນາລັນເໜືອ ແມ່ນໂອກາດທີ່ໄດ້ພົບປະບ້ານຊົນເຜົ່າຂະມຸ. ນັກທ່ອງທ່ຽວສາມາດດູດດື່ມກັບບັນດາມໍລະດົກວັດທະນະທຳອັນລ້ຳຄ່າຂອງເຂົາເຈົ້າ, ເຊິ່ງເປັນຜູ້ທີ່ສືບທອດ ປົກປັກຮັກສາຮີດຄອງປະເພນີ ແລະ ວິທີການດຳລົງຊີວິດຂອງຕົນ. ການພັດທະນາການທອ່ງທ່ຽວແບບປະຊາຊົນມີສ່ວນຮ່ວມ ຢູ່ເຂດດັ່ງກ່າວ ແມ່ນການຊຸກຍູ້ໃຫ້ມີຄວາມເຂົ້າໃຈ ແລະ ຄວາມຮັບຮູ້ຢ່າງເລິກເຊິ່ງ ໃນການອະນຸລັກຮັກສາວັດທະນະທໍາທ້ອງຖິ່ນ ໃຫ້ມີຄວາມຍືນຍົງ ແລະ ສ້າງຄວາມປະທັບໃຈໃຫ້ແກ້ຜູ້ມາຢ້ຽມຢາມ.
ຍ້ອນສະພາບແນວນັ້ນ ປີ 2024 ມີນັກທ່ອງທ່ຽວເຂົ້າມາຢ້ຽມຢາມບ້ານ ຫຼື ເຂົ້າຮ່ວມກິດຈະກໍາວົງຈອນເສັ້ນທາງທ່ອງທ່ຽວປະຈົນໄພຊຸມຊົນບ້ານນາລັນເໜືອ ຈໍານວນ 1.722 ເທື່ອຄົນ, ສາມາດສ້າງລາຍຮັບທາງກົງ-ທາງອ້ອມເຂົ້າ ບ້ານຕ່າງໆ ໃນວົງຈອນເສັ້ນທາງທ່ອງທ່ຽວດັ່ງກ່າວ 275.000 ກວ່າໂດລາສະຫະລັດ. ເຮັດໃຫ້ກາຍເປັນຈຸດສຸມ ຂອງການທ່ອງທ່ຽວແບບອະນຸລັກ ປະຊາຊົນມີສ່ວນຮ່ວມຢ່າງແທ້ຈິ່ງ ແລະ ເປັນການກະຕຸ້ນການພັດທະນາຊຸມຊົນ ໃຫ້ຫຼຸດພົ້ນອອກຈາກຄວາມທຸກຍາກ. ການພັດທະນາທ່ອງທ່ຽວເຂດດັ່ງກ່າວ ບໍ່ພຽງແຕ່ຊຸກຍູ້ເສດຖະກິດທ້ອງຖິ່ນເທົ່ານັ້ນ ມັນຍັງເປັນການສະໜັບສະໜູນຄວາດຄິດລີເລີ່ມ ແນໃສ່ອະນຸລັກຮັກສາແຫຼ່ງຊັບພະຍາກອນທຳມະຊາດ ແລະ ວັດທະນະທຳຂອງເຂດດັ່ງກ່າວອີກດ້ວຍ.
ລາງວັນການທ່ອງທ່ຽວແບບປະຊາຊົນມີສ່ວນຮ່ວມມາດຕະຖານອາຊຽນນີ້ ເປັນການຢັ້ງຢືນເຖິງຄວາມມານະພະຍາຍາມ ໃນການຮ່ວມມືຂອງຊຸມຊົນທ້ອງຖິ່ນ, ອຳນາດການປົກຄອງ, ຜູ້ປະກອບການທຸລະກິດທ່ອງທ່ຽວ ໃນການສົ່ງເສີມການທ່ອງທ່ຽວແບບຍືນຍົງ. ຍັງໄດ້ເນັ້ນເຖິງຄວາມສຳຄັນຂອງການຮັກສາເອກະລັກທາງດ້ານວັດທະນະທຳ ແລະ ຄວາມໝັ້ນຄົງດ້ານສິ່ງແວດລ້ອມ ພ້ອມທັງຍົກສູງຄຸນນະພາບຊີວິດຂອງປະຊາຊົນທ້ອງຖິ່ນ.
ພ້ອມດຽວກັນນີ້ ພະແນກຖະແຫຼງຂ່າວ, ວັດທະນະທໍາ ແລະ ທ່ອງທ່ຽວແຂວງຫຼວງນໍ້າທາ ຈະໄດ້ສືບຕໍ່ສຸມກໍາລັງແຮງ ພັດທະນາການທ່ອງທ່ຽວແບບອະນຸລັກປະຊາຊົນມີສ່ວນຮ່ວມ ໃຫ້ມີຄວາມຍືນຍົງ, ເປັນໜຶ່ງໃນຈຸດໝາຍປາຍທາງການທ່ອງທ່ຽວແບບອະນຸ ລັກຂອງອາຊຽນ, ເປັນແບບຢ່າງຂອງການທ່ອງທ່ຽວແບບປະຊາຊົນມີສ່ວນຮ່ວມ ທັງເປັນການອະນຸ ລັກຮັກສາວັດທະນະທໍາ, ລະບົບນິເວດວິທະຍາ ແລະ ການສ້າງປະສົບການອັນສົມບູນແບບ ໃຫ້ນັກທ່ອງທ່ຽວ ທັງພາຍໃນ ແລະ ທົ່ວໂລກ ທີ່ມາຢ້ຽມຢາມເຂດດັ່ງກ່າວ.
ໂດຍ: ສົມສະຫວາດ ນາມອິນທາ ຮອງຫົວໜ້າພະແນກ ຖວທ ແຂວງຫຼວງນໍ້າທາ.