ຫຼວງພະບາງ, ສປປ ລາວ – ເມື່ອບໍ່ດົນມານີ້ ບໍລິສັດ ຫຼວງພະບາງ ພາວເວີ ຈໍາກັດ (LPCL) ເຊິ່ງເປັນ ບໍລິສັດຮ່ວມຂອງ ບໍລິສັດ ຊີເຄ ພາວເວີ ຈຳກັດ (ມະຫາຊົນ) ຜູ້ດຳເນີນ ໂຄງການໄຟຟ້າພະລັງນ້ຳ ຫຼວງພະບາງ ໄດ້ມອບເຄື່ອງມື ແລະ ອຸປະກອນການແພດ ລວມມູນຄ່າກວ່າ 800 ລ້ານກີບ ໃຫ້ແກ່ ໂຮງໝໍແຂວງຫຼວງພະບາງ ເພື່ອເສີມສັກກະຍະພາບ ການໃຫ້ບໍລິການທາງການແພດ ແລະ ສະໜັບສະໜູນການເຂົ້າເຖິງບໍລິການສຸຂະພາບທີ່ມີຄຸນນະພາບຂອງປະຊາຊົນໃນພື້ນທີ່.
ໂດຍອຸປະກອນທີ່ມອບປະກອບດ້ວຍ 3 ລາຍການ ໄດ້ແກ່: ເຄື່ອງວັດອັດຕາການເຕັ້ນຫົວໃຈຂອງເດັກນ້ອຍໃນທ້ອງ, ຊຸດເຄື່ອງມືສຳລັບການຜ່າຕັດຕ່ອມທອນຊິລ ແລະ ເຄື່ອງກວດວິເຄາະທາງພູມຄຸ້ມກັນວິທະຍາ.
ໃນໂອກາດນີ້ ທ່ານ ກິດພົດ ສະຣະສົມຊັບ, ຮອງກໍາມະການຜູ້ຈັດການ ຝ່າຍກໍ່ສ້າງ ບໍລິສັດ ຫຼວງພະບາງ ພາວເວີ ຈຳກັດ ເປັນຜູ້ຕາງໜ້າ ບໍລິສັດໃນການສົ່ງມອບໃຫ້ແກ່ ທ່ານ ພູວະນາ ອະນຸລັກຄຳ, ຜູ້ອໍານວຍການ ໂຮງໝໍແຂວງຫຼວງພະບາງ.
ການສະໜັບສະໜູນຄັ້ງນີ້, ເປັນສ່ວນໜຶ່ງຂອງການດຳເນີນງານຂອງ LPCL ໃນການສົ່ງເສີມຄຸນນະພາບຊີວິດຂອງຊຸມຊົນໃນພື້ນທີ່ ໂດຍມຸ່ງເສີມຄວາມພ້ອມຂອງໂຮງໝໍໃນການໃຫ້ບໍລິການ, ກວດວິນິດໄສ ແລະ ປິ່ນປົວຜູ້ປ່ວຍໄດ້ຢ່າງມີປະສິດທິພາບຫຼາຍຂຶ້ນ, ຕະຫຼອດຈົນຮອດການຊ່ວຍຂະຫຍາຍໂອກາດໃຫ້ປະຊາຊົນສາມາດເຂົ້າເຖິງບໍລິການທາງການແພດທີ່ມີຄຸນນະພາບໄດ້ຢ່າງທົ່ວເຖິງຫຼາຍຂຶ້ນ ສອດຄ່ອງກັບເປົ້າໝາຍການພັດທະນາທີ່ຍືນຍົງທີ 3 (SDG 3) ດ້ານການມີສຸຂະພາບ ແລະ ຄວາມເປັນຢູ່ທີ່ດີ.