ການຖືພາ ແລະການລ້ຽງລູກ ຖືເປັນຄວາມຮັບຜິດຊອບທີ່ຍິ່ງໃຫຍ່ສຳລັບຄົນທີ່ເປັນພໍ່ແມ່ ຍິ່ງໃກ້ຈະເກີດ ຍິ່ງຕ້ອງກຽມໂຕໃຫ້ພ້ອມກັບການລ້ຽງລູກ ແລະ ການໃຊ້ຊີວິດ ເມື່ອມີລູກນ້ອຍ. ດັ່ງນັ້ນ ກ່ອນທີ່ແມ່ຈະໃຫ້ກຳເນີດລູກ ແມ່ຄວນກະກຽມສິ່ງຕ່າງໆໃຫ້ພ້ອມດັ່ງນີ້:
- ເຂົ້າອົບຮົມການເປັນແມ່ທີ່ທາງໂຮງໝໍຈັດໃຫ້: ຖ້າເປັນໄປໄດ້ ແລະມີເວລາ ແມ່ຄວນໄດ້ຮັບການອົບຮົມການເປັນແມ່ຈາກເລື່ອງເຫຼົ່ານີ້ ເຊັ່ນ ອົບຮົມເລື່ອງການເກີດລູກ, ການໃຫ້ນົມລູກ ແລະການລ້ຽງລູກ ຊຶ່ງ 3 ເລື່ອງນີ້ ຖືເປັນພື້ນຖານທີ່ສຳຄັນສຳລັບແມ່ມືໃໝ່. ສະນັ້ນ ຖ້າມີເວລາລອງເຂົ້າອົບຮົມລອງເບິ່ງຈະດີກວ່າ.
- ສຶກສາກ່ຽວກັບເລື່ອງສຸຂະພາບເບື້ອງຕົ້ນຂອງເດັກ: ສິ່ງທີ່ແມ່ຄວນສຶກສາເອົາໄວ້ ເຊັ່ນ ການສັກຢາວັກຊິນ, ອາການເຈັບປ່ວຍພື້ນຖານຂອງເດັກເກີດໃໝ່, ການເຮັດປະກັນຊີວິດ ແລະ ປະກັນສຸຂະພາບໃຫ້ລູກ, ອາການຜິດປົກກະຕິຕ່າງໆ ທີ່ຕ້ອງໄປພົບແພດ ແລະ ອື່ນໆ.
- ການຢູ່ກິນໃນເຮືອນສຳລັບລູກ: ແນ່ນອນວ່າ ເດັກຍ່ອມມີເຄື່ອງຂອງໃຊ້ສຳລັບເດັກທີ່ແຍກອອກຈາກຜູ້ໃຫຍ່ ເຊັ່ນ ເຄື່ອງນຸ່ງຫົ່ມ, ຜະລິດຕະພັນທຳຄວາມສະອາດຮ່າງກາຍ ແລະ ອຸປະກອນການນອນສຳລັບລູກ ຊຶ່ງສິ່ງເຫຼົ່ານີ້ ແມ່ຕ້ອງກະກຽມໄວ້ກ່ອນທີ່ລູກຈະເກີດ.
- ກຽມເຄື່ອງຂອງຈຳເປັນທີ່ຕ້ອງໃຊ້ໃນມື້ເກີດ: ສິ່ງຂອງຈຳເປັນຕ່າງໆ ທີ່ຕ້ອງກຽມໄປໂຮງໝໍ ເວລາໄປເກີດມີ ຜ້າຕູ້ມລູກ, ເສື້ອຜ້າ, ຖົງຕີນ, ຖົງມື, ຜ້າອ້ອມ, ໝວກ, ຢາສະຜົມ, ຄີມອາບນຳ້ ແລະ ເອກະສານຕ່າງໆ ທີ່ຈຳເປັນ.
- ວາງແຜນກຽມໂຕສຳລັບມື້ເກີດ: ຄວນວາງແຜນກຽມໂຕສຳລັບມື້ເກີດໃຫ້ດີ ເຊັ່ນ ລົດທີ່ຈະໃຊ້ໄປເກີດ, ຄົນທີ່ພາໄປເກີດ, ເບີໂທສຸກເສີນ ເຊັ່ນ ເບີໂທທ່ານໝໍ, ພະຍາບານ ແລະ ເບີໂທຄົນໃນຄອບຄົວ.