ໃນປີ 2022 ນີ້ເມືອງ ພູວົງ, ແຂວງ ອັດຕະປື ໄດ້ກໍານົດເປົ້າໝາຍໃນການລົງທຶນຂອງລັດ 10 ໂຄງການ, ໃນນີ້ ເປັນໂຄງການສືບຕໍ່ມີ 8 ໂຄງການ ແລະ ໂຄງການສະເໜີໃໝ່ມີ 2 ໂຄງການ.
ທ່ານ ທິດສະຫວັນ ໄຊຍະແສງ, ຮອງເຈົ້າເມືອງ ພູວົງ ໄດ້ລາຍງານແຜນພັດທະນາ ເສດຖະກິດ-ສັງຄົມ ປີ 2022 ຕໍ່ກອງປະຊຸມຄະນະບໍລິຫານງານພັກເມືອງ ຄັ້ງທີ 6 ສະໄໝທີ 5 ໃນເມື່ອບໍ່ດົນຜ່ານມາ ນີ້ວ່າ: ໃນປີ 2022 ເມືອງ ພູວົງ ຈະສຸມໃສ່ບັນດາໂຄງການສົມທົບທຶນ,ໂຄງການຊ່ວຍເຫຼືອຈາກຕ່າງປະເທດ, ໂຄງການສືບຕໍ່ທີ່ບໍ່ທັນສຳເລັດ ໃຫ້ສຳເລັດ ແລະ ນຳໃຊ້ໄດ້ໄວ, ການແກ້ໄຂໜີ້ສິນຜ່ານມາ, ສຳລັບໂຄງການໃໝ່ຕ້ອງມີການເລືອກເຟັ້ນ ເພື່ອກຳຈັດໂຄງການໃໝ່ບໍ່ໃຫ້ມີຫຼາຍເກີນຄວາມສາມາດຂອງງົບປະມານ ທີ່ຈະພາໃຫ້ເກີດມີໜີ້ສິນໃນອະນາຄົດ.
ສຳລັບແຜນລົງທຶນຂອງ ລັດ ປະຈຳປີ 2022 ໃນ 3 ບ້ວງ ມີທັງໝົດ 10 ໂຄງການ, ໃນນີ້ ໄດ້ມີການຈັດສັນທຶນໃສ່ ຄື: ບ້ວງທຶນປົກກະຕິ ໃນໂຄງການສືບຕໍ່ ມີ 3 ໂຄງການ ມູນຄ່າ 2 ຕື້ກວ່າກີບ ແລະ ໂຄງການສະເໜີໃໝ່ 1 ໂຄງການ ມູນຄ່າ 3 ຕື້ກວ່າກີບ, ບ້ວງທຶນພັດທະນາຊົນນະບົດ ແລະ ລຶບລ້າງຄວາມທຸກຍາກ ໃນໂຄງການສຶບຕໍ່ ມີ 1 ໂຄງການ, ທຶນມູນຄ່າ 626 ລ້ານກວ່າກີບ, ບ້ວງທຶນຟື້ນຟູໄພພິບັດ ມີ 6 ໂຄງການ ມູນຄ່າລວມ 1 ຕື້ກວ່າກີບ, ໂຄງການສືບຕໍ່ຊຳລະ ມີ 5 ໂຄງການ ມູນຄ່າ 662 ລ້ານກວ່າກີບ ແລະ ໂຄງການສະເໜີໃໝ່ 1 ໂຄງການ ມູນຄ່າ 449 ລ້ານກວ່າກີບ.
ພ້ອມນີ້ ຍັງໄດ້ມີໂຄງການສົ່ງເສີມວິຊາການ ແລະ ໂຄງການກໍ່ສ້າງ ທີ່ທາງເມືອງໄດ້ມີການຈັດສັນບູລິມະສິດ ເພື່ອຈັດຕັ້ງປະຕິບັດ ໂດຍໃຊ້ງົບປະມານຈາກແຂວງ, ງົບປະມານພັດທະນາທ້ອງຖິ່ນ, ງົບປະມານຊ່ວຍເຫຼືອທາງການ ເພື່ອການພັດທະນາ ແລະ ການລົງທຶນພາກເອກະຊົນຈຳນວນ 116 ໂຄງການ ມູນຄ່າ 36 ຕື້ກວ່າກີບ.
ທ່ານຮອງເຈົ້າເມືອງ ລາຍງານໃຫ້ຮູ້ຕື່ມວ່າ: ໃນປີ 2021 ຜ່ານມາການລົງທຶນຂອງລັດ ຢູ່ເມືອງ ພູວົງ ໄດ້ສຸມໃສ່ 142 ໂຄງການ ມູນຄ່າອະນຸມັດໃນປີ ມູນຄ່າ ເກືອບ 2 ຕື້ກີບ, ໂດຍມີໂຄງການສືບຕໍໍ່ 14 ໂຄງການ ມູນຄ່າຊຳລະໃນປີ 2021 ມີ 1 ຕື້ກວ່າກີບ, ໂຄງການສະເໜີໃໝ່ 1 ໂຄງການ ມູນຄ່າ 195 ລ້ານກີບ ບ້ວງໄພພິບັດ, ໂຄງການສົ່ງເສີມວິຊາການ 127 ໂຄງການ ມູນຄ່າ 573 ລ້ານກີບ.
ນອກນີ້ ຍັງມີງົບປະມານບ້ວງພັດທະນາທ້ອງຖິ່ນ ທີ່ແຂວງອະນຸມັດໃຫ້ ພ້ອມລາຍຮັບທີ່ເມືອງຊອກຄົ້ນໄດ້ໃນມູນຄ່າ 1 ຕື້ 566 ລ້ານກີບ ແລະ ໄດ້ໃຊ້ຈ່າຍຂົ້າໃນການພັດທະນາທ້ອງຖິ່ນໃນ ມູນຄ່າ 1 ຕື້ 340 ລ້ານກວ່າກີບ. ທຶນຊ່ວຍເຫຼືອທາງການເພື່ອການພັດທະນາ ໄດ້ສຸມໃສ່ 3 ຂະແໜງການ ຄື: ກະສິກຳ, ສາທາ ແລະ ສຶກສາ ມີ 1 ໂຄງການ ມູນຄ່າ 4 ຕື້ 760 ລ້ານກວ່າກີບ ປັດຈຸບັນ ໃຊ້ງົບປະມານແລ້ວ 867 ລ້ານກວ່າກີບ. ທຶນປ່ອຍກູ້ຂອງທະນະຄານ ໄດ້ສຸມໃສ່ 3ໂຄງການ ມີ 24 ຄອບຄົວ ມູນຄ່າ 1 ຕື້ 115 ລ້ານກວ່າກີບ, ປະຕິບັດໄດ້ 23 ຄອບຄົວ ມູນຄ່າ 965 ລ້ານກີບ. ການລົງທຶນຂອງປະຊາຊົນ ໄດ້ສຸມໃສ່ 10 ບ້ານ ມີສະມາຊິກ 1 ພັນກວ່າຄົນ ລວມຍອດຝາກ 1 ຕື້ 336 ລ້ານກວ່າກີບ ຍອດກູ້ 831 ລ້ານກວ່າກີບ ແລະ ເງິນສົມທົບ 100 ລ້ານກວ່າກີບ.
ຂ່າວ: ວັດທະນາ