ຄວາມຕຶງຄຽດ ຈາກການເຮັດວຽກມາເໝິດມື້ ຫຼາຍຄົນອາດບໍ່ສາມາດຖິ້ມໄປໄດ້ງ່າຍໆ ເຖິງແມ່ນວ່າ ຈະເໝິດເວລາຂອງການເຮັດວຽກໄປແລ້ວກໍຕາມ, ແຕ່ຫຼາຍຄົນກໍຍັງເອົາມານອນຄິດຢູ່ເຮືອນ ຄິດແລ້ວຄິດອີກ ຈົນເຮັດໃຫ້ນອນບໍ່ຫຼັບ. ສະນັ້ນ ລອງໃຊ້ 5 ວິທີຕໍ່ໄປນີ້ເບິ່ງເດີ.
- ຍ່າງຫຼິ້ນ: ທ່ານບໍ່ຈຳເປັນຕ້ອງອອກກຳລັງກາຍໜັກໆ ກ່ອນເຂົ້ານອນ ຈຶ່ງຈະຢຸດຄວາມຫງຸດຫງິດໄດ້ ພຽງແຕ່ຍ່າງຫຼິ້ນຢູ່ສວນສາທາລະນະ ຫຼື ຍ່າງຫຼິ້ນທຳມະດາຢູ່ເດີ່ນເຮືອນ ເບິ່ງນັ້ນເບິ່ງນີ້ໄປ ກ່ອນເຂົ້ານອນ ກໍຈະຊ່ວຍຫຼຸດຄວາມຕຶງຄຽດທີ່ມີຢູ່ໃນສະໝອງໄດ້.
- ຂຽນເລື່ອງບໍ່ດີ ລົງໃສ່ປຶ້ມ: ກ່ອນເຂົ້ານອນປະມານ 10 ນາທີ ລອງຈັບເອົາບິກ ແລະ ປຶ້ມຂຶ້ນມາຈົດ ຫຼື ຂຽນເຫດການ ແລະ ເລື່ອງລາວທີ່ບໍ່ດີ ທີ່ທ່ານພົບພໍ້ມາໃນມື້ນັ້ນໆ ລອງເບິ່ງ ເຖິງແມ່ນວ່າ ການຂຽນບັນຍາຍຄວາມຮູ້ສຶກທີ່ເກີດຂຶ້ນ ຈະບໍ່ໄດ້ຊ່ວຍແກ້ໄຂບັນຫາຕ່າງໆ ໄດ້ ແຕ່ຢ່າງໜ້ອຍກໍຍັງຊ່ວຍໃຫ້ທ່ານໄດ້ລະບາຍ, ໄດ້ຮຽບຮຽງລຳດັບຄວາມຄິດ, ທົບທວນເຖິງບັນຫາທີ່ເກີດຂຶ້ນ ແລະ ເປັນການບອກວ່າ ເຮົາຈະວາງບັນຫາໄວ້ໃນປຶ້ມຫົວນີ້ , ຕອນນີ້ເຖິງເວລາຕ້ອງປ່ອຍວາງແລ້ວ ເລື່ອງອື່ນໆ ຈຶ່ງຄ່ອຍມາເລີ່ມຕົ້ນກັນໃໝ່ເມື່ອຕື່ນຂຶ້ນມາໃນເຊົ້າມື້ອື່ນ.
- ອາບນ້ຳເພື່ອລ້າງຈິດໃຈ: ນ້ຳເປັນໂຕຊ່ວຍບຳບັດສຸຂະພາບຈິດໄດ້ດີ, ຖ້າພົບເລື່ອງໜັກໆ ມາເໝິດມື້ ລອງໃຫ້ເວລາກັບການອາບນ້ຳໃຫ້ຫຼາຍຂຶ້ນ ໂດຍໃຫ້ນ້ຳໄຫຼຜ່ານໂຕແບບຊ້າໆ, ສາຍນ້ຳທີ່ຄ່ອຍໆ ໄຫຼຜ່ານຮ່າງກາຍ ຈະຊ່ວຍຫຼຸດ ອຸນຫະພູມ ຄວາມຕຶງຄຽດໃນໂຕຂອງທ່ານ ແລະ ຍັງໄດ້ປະໂຫຍດຄູນສອງ ຖ້າຫາກທ່ານອາບນ້ຳອຸ່ນ ເພາະວ່າ ທ່ານຈະຮູ້ສຶກສະບາຍ, ຜ່ອນຄາຍ, ເຮັດໃຫ້ຫຼັບດີ, ບໍ່ຈຳເປັນຕ້ອງນອນກ່າຍໜ້າຜາກຄິດເຖິງເລື່ອງຕ່າງໆ ທີ່ພົບມາໃນໝົດມື້ ຫຼື ຖ້າເຮືອນໃຜຫາກມີອ່າງອາບນ້ຳ ກໍລົງໄປແຊ່ໝົດໂຕ ແລ້ວຢອດນ້ຳມັນຫອມລະເຫີຍລົງໄປໃນອ່າງອາບນ້ຳ ໃຫ້ກິ່ນຫອມໆ ກໍຈະຊ່ວຍໃຫ້ທ່ານຮູ້ສຶກຜ່ອນຄາຍ ຈົນລືມເລື່ອງຄວາມຄຽດໄປໄດ້ເລີຍ.
- ສູດມົນ: ຕອນຍັງນ້ອຍໆ ພໍ່ແມ່ເຄີຍສອນໃຫ້ເຮົາສູດມົນກ່ອນນອນ ຊຶ່ງຕອນນັ້ນກໍເຮັດໄດ້ດີ ໂດຍບໍ່ຄິດເຖິງສິ່ງໃດ, ເມື່ອໃຫຍ່ຂຶ້ນມາກໍເຊົາເຮັດ. ແຕ່ແນະນຳໃຫ້ທ່ານກັບໄປສູດມົນກ່ອນເຂົ້ານອນຄືນອີກ ຫຼື ຈະນັ່ງສະມາທິ ກໍໄດ້. ການສູດມົນ ແລະ ນັ່ງສະມາທິປະມານ 10-15 ນາທີ ຂຶ້ນໄປ ຈະຊ່ວຍຢຸດຄວາມກັງວົນຂອງສະໝອງ, ຮ່າງ ກາຍຈະຫຼັ່ງສານ ເຊໂຣໂທນິນ ອອກມາ ເຮົາຈະຮູ້ສຶກນິ້ງສະຫງົບ, ຜ່ອນຄາຍອາລົມ ແລະ ເຮັດໃຫ້ນອນຫຼັບໄດ້ດີຂຶ້ນ.
- ກອດຄົນຂ້າງກາຍ: ການສຳຜັດດ້ວຍການກອດ ເປັນວິທີຜ່ອນຄາຍຄວາມຄຽດທີ່ເຮັດໄດ້ງ່າຍ ແລະ ໄດ້ຜົນແນ່ນອນ ເພາະການກອດແຕ່ລະຄັ້ງ ຮ່າງກາຍຈະເກີດຂະບວນການຕ່າງໆ ເຊັ່ນ ຫົວໃຈເຕັ້ນໄວຂຶ້ນ, ເລືອດລົມສູບສີດ, ຮູ້ສຶກອາລົມດີ, ເຮັດໃຫ້ສະໝອງຄິດແຕ່ເລື່ອງດີໆ ແລະ ມີພະລັງຂຶ້ນມາ ຈາກການໃຫ້ກຳລັງໃຈຂອງຄົນທີ່ເຮົາຮັກ. ນອກຈາກນີ້ ການກອດຍັງຊ່ວຍກະຕຸ້ນໃຫ້ສະໝອງຫຼັ່ງສານແຫ່ງຄວາມສຸກອອກມາຫຼາຍຂຶ້ນ ລວມທັງ ເອັນໂດຟິນ (Endorphin) ແລະ ເຊໂຣໂທນິນ (Serotonin) ທີ່ເຮັດໃຫ້ເຮົາມີຄວາມສຸກ, ເພິ່ງພໍໃຈ, ຮູ້ສຶກຍິນດີ ຈົນລືມຄວາມທຸກໄປເລີຍ.