ສູນວັດທະນະທຳ ແລະ ການສຶກສາ ພື້ນເມືອງ ລາວ-ຍີ່ປຸ່ນ ທີ່ຕັ້ງຢູ່ບ້ານ ໜອງທາໃຕ້, ເມືອງ ຈັນທະບຸລີ, ນະຄອນຫຼວງ ວຽງຈັນ ເປັນສູນການຮຽນຮູ້ກ່ຽວກັບວັດທະນະທຳຂອງລາວ ໂດຍສະເພາະແມ່ນການຮຽນຮູ້ທາງດ້ານທັກສະການຜະລິດຜ້າໄໝລາວ ແບບດັ້ງເດີມ ທີ່ສືບທອດກັນມາແຕ່ບູຮານນະການ ເຊິ່ງນຳໃຊ້ວັດຖຸດິບຈາກລາວໂດຍກົງ ແລະ ປອດສານພິດ ໂດຍສະເພາະແມ່ນການ ຍ້ອມສີທຳມະຊາດ.
ທ່ານ ຫານຊະນະ ສີສານ, ອະດີດປະທານສະມາຄົມຫັດຖະກຳລາວ, ເຈົ້າຂອງພິພິທະພັນຜ້າໄໝລາວ ກ່າວວ່າ: ພິພິທະພັນຜ້າໄໝລາວແຫ່ງນີ້ ສ້າງຕັ້ງຂຶ້ນໃນປີ 2003 ໂດຍເປັນທຸລະກິດສ່ວນຕົວຄອບຄົວ ມີເນື້ອທີ່ປະມານ 4 ໄລ່, ມີເຮືອນຮ້ານ ແລະ ບ່ອນສາທິດທຳການຜະລິດແຜ່ນແພ 5 ຫຼັງທີ່ເຮັດດ້ວຍໄມ້ເນື້ອແຂງ ຫຼັງຄາເຮັດດ້ວຍດິນຂໍ ແລະ ມີເຄື່ອງຫັຖະກຳແຜ່ນແພ, ເຄື່ອງຈັກສານ ແລະ ເຄື່ອງເກົ່າຂອງແກ່ຈຳນວນໜຶ່ງ.
ເມື່ອກ່ອນທີ່ບໍ່ມີພະຍາດ ໂຄວິດ-19 ເຂົ້າມາລະບາດນັ້ນ ມີແຂກນັກທ່ອງວທ່ຽວທັງພາຍໃນ ແລະ ຕ່າງປະເທດ ເຂົ້າມາຢ້ຽມຢາມໃນສູນດັ່ງກ່າວແຕ່ລະມື້ຫຼາຍຮ້ອຍຄົນ, ແຕ່ພາຍຫຼັງທີ່ ໂຄວິດ-19 ເຂົ້າມາ ນັກທ່ອງທ່ຽວກໍເລີ່ມຫຼຸດໜ້ອຍຖອຍລົງ.
ມາຮອດປັດຈຸບັນ ສູນແຫ່ງນີ້ໄດ້ເລີ່ມກັບມາເປີດບໍລິການໃຫ້ນັກທ່ອງທ່ຽວອີກຄັ້ງ ແລະ ກໍເລີ່ມມີນັກທ່ອງທ່ຽວເຂົ້າມາຢ້ຽມຢາມຫຼາຍຂຶ້ນ ໂດຍສະເພາະນັກທ່ອງທ່ຽວທີ່ຢາກມາສຶກສາຮຽນຮູ້ທັກສະກ່ຽວກັບການຜະລິດຜ້າໄໝ ບໍ່ວ່າຈະເປັນ ການຂຽນຝ້າຍ, ທໍໄໝ, ການຕ່ຳຫູກຕ່າງໆ ເປັນຕົ້ນ.
ທີ່ມາ: CRI