ອາກາດເລີ່ມໜາວແລ້ວ ຫຼາຍທ່ານຄົງມີບັນຫາກ່ຽວກັບຜິວ ບໍ່ວ່າຈະເປັນ ຜິວແຫ້ງ, ຜິວແຕກ, ຜິວລອກ ໂດຍສະເພາະແມ່ນຜິວໜ້າຂອງສາວໆ ເຊິ່ງເຮັດໃຫ້ເກີດຜົນເສຍຕໍ່ຜິວ ແລະ ອາດເຮັດໃຫ້ເຮົາບໍ່ມີຄວາມໝັ້ນໃຈໃນໂຕເອງ ເວລາທີ່ອອກໄປຂ້າງນອກ ດັ່ງນັ້ນ, ເຮົາມີວິທີຊ່ວຍຫຼຸດບັນຫາ ຜິວລອກ ໃນ ໜ້າໜາວມາຝາກກັນ ເຊິ່ງມີວິດັ່ງຕໍ່ໄປນີ້:
- ຫວ້ານຫາງແຂ້: ຫວ້ານຫາງແຂ້ຖືເປັນສະໝຸນໄພທີ່ຊ່ວຍໃນເລື່ອງຂອງການບຳລຸງຜິວໃຫ້ນຽນນຸ່ມຊຸ່ມຊື່ນ ໄດ້ດີທີ່ສຸດ ໂດຍສະເພາະສາວໆ ທີ່ມີບັນຫາໜ້າລອກ ຈົນເຮັດໃຫ້ແສບແດງໃນຍາວໜາວແບບນີ້ ຮັບຮອງສູດນີ້ຊ່ວຍໄດ້ແນ່ນອນ. ວິທີ ກໍຄື ພຽງແຕ່ນຳເອົາຫວ້ານຫາງແຂ້ມາປອກເປືອກອອກເອົາແຕ່ວຸ້ນໃສໆ ແລ້ວນຳໄປລ້າງໃຫ້ສະອາດ, ຈາກນັ້ນນຳໄປບົດໃຫ້ລະອຽດ ແລ້ວນນຳມານວດໆ ໃສ່ໜ້າໃຫ້ທົ່ວ ພອກປະໄວ້ປະມານ 20-30 ນາທີ ແລ້ວລ້າງອອກ. ເມື່ອໝັກແລ້ວ ຈະຮູ້ສຶກໄດ້ທັນທີເລີຍວ່າ ຜິວນຽນນຸ່ມຊຸ່ມຊື່ນຂຶ້ນ ແລະ ຖ້າເຮັດເປັນປະຈຳອາທິດລະ 1-2 ຄັ້ງ ບັນຫາໜ້າລອກ ເປັນຂຸຍທີ່ແສບແດງນັ້ນຈະຫາຍໄປ.
- ໝາກເຫຼັ່ນ+ໝາກແຕງ+ນົມສົດ: ນຳເອົາໝາກເຫຼ່ນ 1 ໜ່ວຍ, ໝາກແຕງ 1 ໜ່ວຍ ແລະນົມສົດ 1/2 ຖ້ວຍ ມາປັ່ນເຂົ້າໃສ່ກັນໃຫ້ມຸ່ນໆ ຈົນເປັນເນື້ອດຽວ, ຈາກນັ້ນໃຫ້ນຳມາໝັກໜ້າປະໄວ້ 20-30 ນາທີ ເມື່ອສຳເລັດແລ້ວ ໃຫ້ລ້າງໜ້າດ້ວຍນ້ຳເຢັນທີ່ສະອາດ. ໝາກເຫຼັ່ນ ຈະເຮັດໃຫ້ຜິວໜ້າຂອງສາວໆ ໃສຂຶ້ນ ພ້ອມທັງໃຫ້ຄວາມຊຸ່ມຊື່ນຂຶ້ນມາຈາກໝາກແຕງ ແລະນົມສົດ. ຖ້າສາວໆ ເຮັດເລື້ອຍໆ ຜິວໜ້າຈະນຽນນຸ່ມ ແລະ ມີນ້ຳມີນວນ.
- ນ້ຳເຜິ້ງ+ໄຂ່ແດງ: ສຳລັບສາວໆ ທີ່ມີບັນຫາໜ້າລອກເປັນຂຸຍ ບໍ່ຕ້ອງກັງວົນໃຈ ພຽງແຕ່ນຳເອົານ້ຳເຜິ້ງ 1 ບ່ວງ ແລະ ໄຂ່ແດງ 1 ໜ່ວຍ ມາປະສົມເຂົ້າກັນ ແລ້ວນຳມາໝັກໜ້າປະໄວ້ 10-15 ນາທີ ແລ້ວລ້າງອອກ, ຈາກໜ້າທີ່ລອກເປັນຂຸຍ ເມື່ອເບິ່ງແລ້ວຈະນຽນນຸ່ມຊຸ່ມຊື່ນຂຶ້ນມາທັນທີ. ຖ້າເຮັດເລື້ອຍໆ ຈະຊ່ວຍໃຫ້ໜ້າອ່ອນເຍົາລົງອີກດ້ວຍ.
- ໝາກແຕງ+ໂຢເກິດ: ນຳເອົາໝາກແຕງ 1 ໜ່ວຍມາປອກເປືອກລ້າງໃຫ້ສະອາດ ແລ້ວຊອຍເປັນປ່ຽງ ຈາກນັ້ນນຳໄປປະສົມກັບໂຢເກິດຣົດທຳມະຊາດ 2 ບ່ວງ ຄົນໃຫ້ເຂົ້າກັນ. ເມື່ອສຳເລັດແລ້ວ ໃຫ້ນຳມາໝັກໜ້າປະໄວ້ປະມານ 20-30 ນາທີ ແລ້ວລ້າງໜ້າໃຫ້ສະອາດດ້ວຍນ້ຳເຢັນ. ສູດນີ້ ຈະຊ່ວຍບຳລຸງໃຫ້ຜິວໜ້າມີຄວາມຊຸ່ມຊື່ນຫຼາຍຂຶ້ນ. ຖ້າໃຜທີ່ມີບັນຫາຜິວໜ້າແຫ້ງ ແລະລອກ ລວມທັງຜິວໜ້າມີຄວາມໝອງກ່ຳ ແລະ ຈຸດດ່າງດຳ ລອງເຮັດສູດນີ້ລອງເບິ່ງເດີ.
- ອະໂວກາໂດ+ນ້ຳເຜິ້ງ+ໂຢເກິດ: ນຳເອົາອະໂວກາໂດ 1 ໜ່ວຍ ມາຜ່າເຄິ່ງ, ຈາກນັ້ນຈົກເອົາແຕ່ນວນອະໂວກາໂດອອກມາປັ່ນລວມກັບນ້ຳເຜິ້ງ 2 ບ່ວງ ແລະໂຢເກິດຣົດທຳມະຊາດ 1/2 ຖ້ວຍ, ປັ່ນໃຫ້ເຂົ້າກັນຈົນເປັນເນື້ອດຽວ, ຈາກນັ້ນໃຫ້ນຳມາໝັກໜ້າປະໄວ້ 10-15 ນາທີ ແລ້ວລ້າງອອກ. ເຮັດແບບນີ້ ຕໍ່ເນື່ອງຢ່າງໜ້ອຍ 1-2 ຄັ້ງຕໍ່ອາທິດ ຈາກຜິວໜ້າທີ່ເຄີຍແຫ້ງ ແລະລອກ ຈະກາຍເປັນຜິວທີ່ນຽນນຸ່ມໜ້າສຳຜັດ, ຊ່ວຍເຮັດໃຫ້ຮູຂຸມຂົນຮັດເຂົ້າ ແລະຊ່ວຍຫຼຸດຮ່ອງຮອຍຕ່າງໆເທິງໃບໜ້າໄດ້ດີ.
- ກ້ວຍຫອມ+ນົມສົດ: ນຳເອົາກ້ວຍຫອມ 1 ໜ່ວຍ ປອກເປືອກອອກແລ້ວນຳໄປບົດໃຫ້ລະອຽດ, ຈາກນັ້ນປະສົມນົມສົດ 1/2 ຖ້ວຍລົງໄປ ຄົນໃຫ້ເຂົ້າກັນເປັນເນື້ອດຽວ ເມື່ອແລ້ວໆ ນຳມາໝັກໜ້າປະໄວ້ 15-20 ນາທີ ລ້າງໜ້າໃຫ້ສະອາດ. ສູດນີ້ ຈະຊ່ວຍເຕີມຄວາມຊຸ່ມຊື່ນໃຫ້ຜິວໄດ້ດີທີ່ສຸດ ເໝາະສຳລັບສາວໆທີ່ມີບັນຫາຜິວໜ້າລອກຕະຫຼອດ ລວມເຖິງຜິວແຫ້ງ ກໍຈະຊ່ວຍຟື້ນບຳລຸງຜິວໃຫ້ນຽນນຸ່ມ, ໃສ, ເຄັ່ງຕຶງ ແລະ ຮັດແໜ້ນຂຶ້ນ.