ທ່ານ ພັນຄໍາ ວິພາວັນ ນາຍົກລັດຖະມົນຕີ ໄດ້ກ່າວໃນກອງປະຊຸມສະໄໝສາມັນເທື່ອທີ 4 ຂອງສະພາແຫ່ງຊາດ ຊຸດທີ IX ວ່າຈະເລັ່ງແກ້ບັນຫາ 4 ຢ່າງຄື: ແກ້ໄຂບັນຫາເກັບລາຍຮັບໃຫ້ໄດ້ຕາມແຜນ, ຕ້ານການຮົ່ວໄຫຼຂອງງົບປະມານຂອງລັດ, ແກ້ໄຂປັນຫາໜີ້ສິນທີ່ລັດຖະບານກໍ່ໄວ້ ແລະ ຄຸມອັດຕາການແລກປ່ຽນ ບໍ່ເຮັດໃຫ້ເງິນກີບເຟີ້. ເຊິ່ງປັດຈຸບັນ ໃນເດືອນ ພະຈິກ ສປປ ລາວ ຍັງມີອັດຕາເງິນເຟີ້ທີ່ເພີ່ມຂຶ້ນສູງເຖິງ 38,46%.
ໃນປີ 2023 ລັດຖະບານ ຈະເລັ່ງແກ້ໄຂສະພາບຄວາມບອບບາງດ້ານເສດຖະກິດມະຫາພາກ ໃຫ້ກັບສູ່ສະພາບປົກກະຕິໂດຍໄວ 4 ດ້ານຄື:
- ສຸມໃສ່ການເກັບລາຍຮັບໃຫ້ໄດ້ຕາມແຜນການ ຫຼື ໃຫ້ເກີນແຜນເປັນປີທີ 3 ຕິດຕໍ່ກັນ ເພື່ອມີເງິນມາແກ້ໄຂ ບັນຫາ, ໂດຍຊຸກຍູ້ໃຫ້ມີຖານລາຍຮັບໃໝ່ ແລະ ຍູ້ແຮງການຫັນການເກັບລາຍຮັບເປັນທັນສະໄໝ ໃຫ້ແຂງແຮງ ແລະ ປະກົດຜົນເປັນຈິງຫຼາຍກວ່າເກົ່າ.
- ສຸມໃສ່ສືບຕໍ່ປະຕິບັດບັນດານິຕິກຳທີ່ລັດຖະບານວາງອອກ ທີ່ກ່ຽວກັບການເພີ່ມທະວີການຄຸ້ມຄອງ ແລະ ຕ້ານການ ຮົ່ວໄຫຼຂອງລາຍຮັບງົບປະມານລັດ, ການປະຢັດ ແລະ ຕ້ານການຟູມເຟືອຍ, ການນໍາໃຊ້ລົດຂອງລັດ ແລະ ອື່ນໆ ໃຫ້ ເຂັ້ມງວດ ແລະ ເປັນຮູບປະທຳຫຼາຍຂຶ້ນ.
- ສຸມໃສ່ສືບຕໍ່ແກ້ໄຂໜີ້ສິນສາທາລະນະ ໂດຍສະເພາະໜີ້ສິນຕໍ່ຕ່າງປະເທດ, ບໍ່ໃຫ້ຕົກເຂົ້າສູ່ສະພາບທີ່ບໍ່ສາມາດຊຳລະ ໜີ້ໄດ້, ຄົ້ນຄວ້າ ແລະ ຈັດສັນແຫຼ່ງທຶນເພື່ອມາແກ້ໄຂໜີ້ສິນການລົງທຶນຂອງລັດ ເພື່ອຊ່ວຍຜູ້ຮັບ ເໝົາໂຄງການສາມາດສືບຕໍ່ດຳເນີນທຸລະກິດໄດ້. ນອກນັ້ນ ກໍ່ຈະໄດ້ມີການປັບປຸງປະສິດທິຜົນຂອງການລົງທຶນ ຂອງລັດໃຫ້ດີຂຶ້ນ, ຢຸດການຈັດສັນທຶນໃສ່ໂຄງການໃໝ່ທີ່ບໍ່ມີປະສິດທິຜົນ ແລະ ສຸມໃສ່ໂຄງການລົງທຶນເພື່ອແກ້ໄຂ ຄວາມທຸກຍາກຂອງປະຊາຊົນ ເປັນບູລິມະສິດ.
- ສຸມໃສ່ສືບຕໍ່ເອົາໃຈໃສ່ເປັນພິເສດ ຕໍ່ການຄຸ້ມຄອງອັດຕາແລກປ່ຽນເງິນຕາ, ລາຄາສິນຄ້າ, ປະລິມານເງິນ ແລະ ອັດຕາເງິນເຟີ້ ໃຫ້ຢູ່ໃນລະດັບທີ່ສາມາດຄວບຄຸມໄດ້. ພ້ອມກັນນັ້ນ, ຈະສືບຕໍ່ສຸມໃສ່ແກ້ໄຂບັນຫາການສະໜອງນໍ້າມັນເຊື້ອໄຟໃຫ້ເປັນປົກກະຕິ ດ້ວຍການນຳໃຊ້ມາດຕະການຕ່າງໆ ໂດຍຖືເອົາມາດຕະການເສດຖະກິດ ແລະ ຕາມກົນ ໄກຕະຫຼາດເປັນຕົ້ນຕໍ ໄປຄຽງຄູ່ກັບການສ້າງມາດຕະການແກ້ໄຂໃນໄລຍະກາງ ແລະ ຍາວ.
ເຖິງຢ່າງໃດກໍຕາມ ບັນຫາຫຼັກໆທີ່ປະຊາຊົນໃຫ້ຄວາມສົນໃຈ ແລະ ຢາກໃຫ້ແກ້ໄຂໂດຍໄວ ຄືບັນຫາເງິນເຟີ້ ເພາະມັນກະທົບກັບເສດຖະກິດຫຼາຍໆຢ່າງຂອງປະຊາຊົນ ເຊິ່ງຕາມການລາຍງານຂອງ ສູນສະຖິຕິແຫ່ງຊາດ ໃຫ້ຮູ້ວ່າ: ອັດຕາເງິນເຟີ້ ພາຍໃນ 11 ເດືອນ ປີ 2022 ໂດຍນັບຕັ້ງແຕ່ ເດືອນມັງກອນ ຫາ ພະຈິກ 2022 ແມ່ນໄດ້ເພີ່ມຂຶ້ນ ແລະ ຫຼ້າສຸດໃນເດືອນພະຈິກ ຜ່ານມາແມ່ນເພີ່ມຂຶ້ນ 38,46%.
ທີ່ມາ: ກອງປະຊຸມ ສະໄຫມສາມັນ ເທື່ອທີ່ 4 ຂອງສະພາແຫ່ງຊາດ ຊຸດທີ IX ແລະ ສູນສະຖິຕິແຫ່ງຊາດ.