ຄວາມຄຽດເກີດຂຶ້ນໄດ້ຫຼາຍສາເຫດ ເຊັ່ນ ການເຮັດວຽກ, ສະພາບແວດລ້ອມ, ບັນຫາໃນຄອບຄົວ, ສະພາບເສດຖະກິດ, ການເງິນ, ບັນສາສຸຂະພາບ, ບັນຫາທາງສັງຄົມ ແລະການເມືອງ. ສິ່ງທີ່ຄວນຮູ້ ກໍຄື ຄວາມຄຽດ ເປັນບໍ່ເກີດຂອງໂຣກຫຼາຍຊະນິດ ເຊັ່ນ ຄວາມດັນເລືອດ, ໂຣກຫົວໃຈ, ມະເຮັງ ແລະໂຣກອື່ນໆ.
ຜູ້ຊາຍບາງກຸ່ມ ມັກຜ່ອນຄາຍຄວາມຄຽດດ້ວຍການດື່ມສິ່ງມຶນເມົາ, ສູບຢາ, ທ່ຽວຫຼິ້ນ; ຜູ້ຍິງບາງຄົນ ກໍຜ່ອນຄາຍຄວາມຕຶງຄຽດແບບນິ້ຄືກັນ. ສະນັ້ນ ເຮົາລອງມາຊ່ວຍກັນຫາວິທີຄາຍຄຽດແບບປະຢັດ ແລະໄດ້ຜົນດີ ດັ່ງຕໍ່ໄປນີ້:
- ຄິດໃນທາງບວກ: ເກືອບ 90%ຂອງຄວາມຕຶງຄຽດ ເກີດຈາກຄວາມຄິດໃນດ້ານລົບ ແລ້ວພາເຮັດໃຫ້ບໍ່ສະບາຍໃຈ. ໃນທາງກົງກັນຂ້າມ ຖ້າເຮົາພະຍາຍາມປັບທັດສະນະຄະຕິເບິ່ງໂລກໃນແງ່ບວກ, ເຊື່ອໝັ້ນໃນການເຮັດຄວາມດີ, ບໍ່ມີສິ່ງໃດທີ່ແກ້ໄຂບໍ່ໄດ້ ຖ້າເຮົາຕັ້ງໃຈ ແລະພະຍາຍາມທີ່ຈະແກ້ໄຂ ຄວາມຕຶງຄຽດ ກໍຈະຫຼຸດລົງ ແລ້ວເຮົາກໍຈະສະບາຍໃຈຂຶ້ນ.
- ຮູ້ຈັກຜ່ອນຄາຍ: ບາງເວລາຂອງການເຮັດວຽກ ເຮົາອາດມີວຽກຮີບດ່ວນ ຫຼື ເຄັ່ງຄຽດຫຼາຍຢ່າງ, ຈົ່ງພະຍາຍາຍາມຜ່ອນຄາຍໃຫ້ສະໝອງໄດ້ຢຸດພັກແດ່ ໂດຍຫັນຄວາມສົນໃຈໄປຫາສິ່ງອື່ນ, ລະສາຍຕາຈາກໜ້າຈໍຄອມພິວເຕີ່ທີ່ນັ່ງຈ້ອງມາເຄິ່ງມື້ ແລ້ວເບິ່ງທ້ອງຟ້າ ຫຼື ຕົ້ນໄມ້ສີຂຽວແດ່, ຍ່າງອອກໄປຫານຳ້ມາດື່ມ ເພື່ອໃຫ້ຮູ້ສຶກສົດຊື່ນ ແລະຫຼຸດຄວາມອິດເມື່ອຍ ເມື່ອກັບມາເຮັດວຽກຕໍ່ ຈະຊ່ວຍໃຫ້ເຮັດວຽກໄດ້ດີຂຶ້ນໂດຍບໍ່ຄຽດຈົນເກີນໄປ.
- ຫຼຸດຜ່ອນຄວາມຫຍຸ້ງຍາກ ເພື່ອຊ່ວຍໃນການຕັດສິນໃຈ: ຄົນເຮົາຕຳແໜ່ງຍິ່ງສູງ ຄວາມຕຶງຄຽດກໍສູງຕາມໄປນຳ ເພາະໜ້າທີ່ຄວາມຮັບຜິດຊອບຫຼາຍຂຶ້ນ ຕ້ອງຕັດສິນໃຈເກືອບທຸກເລື່ອງ ຊຶ່ງບາງເລື່ອງອາດກາຍເປັນສິ່ງເສຍຫາຍໄດ້. ດັ່ງນັ້ນ ການຮູ້ຈັກຜ່ອນຄາຍຄວາມຫຍຸ້ງຍາກ ດ້ວຍການໄປອອກກຳລັງກາຍ ຫຼື ຫາເວລາພັກຜ່ອນເບິ່ງເດີ່ນຫຍ້າ ຫຼື ຕົ້ນໃນອ້ອມຮອບເຮືອນ ເພື່ອໃຫ້ຄາຍຄຽດຈາກວຽກ ຫຼື ອອກຈາກການຟັງຂ່າວທີ່ຕຶງຄຽດ ມາຟັງເພງເບົາໆຈະຊ່ວຍໃຫ້ຈິດໃຈສະຫງົບ ແລ້ວຈະເຮັດໃຫ້ການຕັດສິນໃຈໃນເລື່ອງຕ່າງໆ ເປັນໄປດ້ວຍດີ.
- ຍິ້ມເອົາໄວ້: ເມື່ອໃດກໍຕາມທີ່ຮູ້ສຶກເຄັ່ງຄຽດ ໃຫ້ພະຍາຍາມຍິ້ມເອົາໄວ້ ເພາະເມື່ອເຮົາຍິ້ມ ຄວາມຮູ້ສຶກຈະດີຂຶ້ນ, ຈະຍິ້ມກັບເພື່ອນຮ່ວມງານ ຫຼື ຍິ້ມກັບຄົນທີ່ເຮົາພົບເຫັນ ຊຶ່ງບາງຄັ້ງບໍ່ຈຳເປັນຕ້ອງຮູ້ຈັກກັນມາກ່ອນກໍສາມາດຍິ້ມໃຫ້ກັນໄດ້.
- ມີສະຕິຢູ່ສະເໝີ: ເຮັດວຽກ ຫຼື ຮັບຟັງທຸກເລື່ອງຢ່າງມີສະຕິ ໃນທີ່ສຸດຈະພົບທາງແກ້ໄຂ ໂດຍບໍ່ຕ້ອງຜ່ານຄວາມຄຽດ. ຫຼາຍຄົນຄຽດເພາະຢາກເປັນແບບທີ່ຄົນອື່ນເປັນ, ຢາກຮັ່ງຢາກມີ, ຢາກໄດ້ຄືແບບທີ່ເຂົາໄດ້, ເຮັດໃຫ້ໂຕເອງຄຽດທີ່ຕ້ອງພະຍາຍາມທຸກວິຖີທາງເພື່ອໃຫ້ໄດ້ແບບຄົນອື່ນ.