ເມື່ອຮອດວັນແຫ່ງຄວາມຮັກ 14 ກຸມພາ ຂອງທຸກໆປີ ບັນດາໜຸ່ມສາວ ແລະ ຄົນທີ່ມີຄູ່ແຕ່ງງານໄປແລ້ວຫຼາຍຄູ່ ຫຼາຍຄົນ ກໍກຳລັງກຽມເຊີໄພ້ຄົນຮັກດ້ວຍຂອງຂັວນຕ່າງໆ ແຕ່ຂອງຂັວນທີ່ເປັນຍອດນິຍົມໃນທຸກໆປີ ກໍຄົງບໍ່ພົ້ນດອກໄມ້ໂດຍສະເພາະແມ່ນດອກກຸຫຼາບທີ່ເປັນສື່ກາງແຫ່ງການບອກຮັກໄດ້ດີ.
ຈາກການສອບຖາມແມ່ຄ້າຂາຍດອກໄມ້ຢູ່ເຂດທາງໂຄ້ງວົງວຽນດົງປ່າລານ ໃຫ້ຮູ້ວ່າ: ລາຄາດອກໄມ້ ດອກສະເພາະແມ່ນດອກກຸຫຼາບລາຄາບໍ່ແຕກຕ່າງກັນຫຼາຍ ເຊິ່ງເລີ່ມຕົ້ນດອກລະ 20.000 – 40.000 ກີບ ຂຶ້ນຢູ່ກັບຂະໜາດ ແລະ ສີຂອງດອກກຸຫຼາບ, ແຕ່ຖ້າຈັດເປັນຊໍ່ລາຄາກໍເພີ່ມຂຶ້ນຕາມຈຳນວນດອກໄມ້ ແລະ ຄ່າຊໍ່ ເປັນຕົ້ນຖ້າຈັດເປັນຊໍ່ 9 ດອກບວກໃສ່ກັບຄ່າຊໍ່ລາຄາກໍປະມານ 250.000 ກີບຕໍ່ຊໍ່.
ນອກຈາກດອກກຸຫຼາບແລ້ວ ກໍຍັງມີດອກໄມ້ປະເພດອື່ນນຳອີກ ເຊັ່ນ ດອກທານຕາວັນ ເຊິ່ງຂາຍເລີ່ມຕົ້ນດອກລະ 30.000 – 35.000 ກີບ ຈັດເປັນຊໍ່ 3 ດອກບວກຊໍ່ ລາຄາ 100.000 ກີບຕໍ່ຊໍ່ ແລະ ກໍຍັງມີດອກລິ່ນລີ້ທີ່ມີລາຄາເລີ່ມຕົ້ນດອກລະ 100.000 ກີບ ຈັດເປັນຊໍ່ 5 ດອກ ລາຄາ 700.000 ກີບ. ສ່ວນໃຜທີ່ຢາກໄດ້ເປັນຊໍ່ເງິນ ເພິ່ນກໍມີຄ່າຊໍ່ 250.000 ກີບ ບວກເງິນທີ່ຕ້ອງການໃສ່.
ເຖິງຢ່າງໃດກໍຕາມ ກ່ອນທີ່ຈະຊື້ດອກໄມ້ໃຫ້ຄົນຮັກ ກໍຢ່າລືມເບິ່ງງົບໃນກະເປົາແດ່ເດີ້ວ່າພໍສຳລັບດອກໄມ້ເພດໃດ ເພາະຖ້າເວົ້າເລື່ອງຄວາມຮັກແລ້ວ ບໍ່ວ່າດອກໄມ້ຈະຖືກ ຫຼື ແພງ ຂໍພຽງແຕ່ມອບໃຫ້ກັນດ້ວຍຄວາມຈິງໃຈ ຄວາມຮັກກໍສົດໃສຍິ່ງຂຶ້ນ.
