ກ້າວເຂົ້າສູ່ເດືອນພະຈິກແລ້ວ ກໍນັບວ່າເຂົ້າສູ່ຊ່ວງປາຍຝົນຕົກໜາວ ອາກາດກໍປ່ຽນແປງ ເລີ່ມມີລົມພັດແຮງໃນຫຼາຍພື້ນທີ່ ຫຼາຍຄົນກໍມັກຄິດວ່າ ເຢັນສະບາຍດີ ແຕ່ຮູ້ບໍ່ວ່າ ອາກາດແບບນີ້ຈະເຮັດໃຫ້ເຮົາເຈັບປ່ວຍໄດ້ງ່າຍກວ່າປົກກະຕິ.
ເນື່ອງຈາກອາກາດໜາວເຢັນ ຈະສົ່ງຜົນໃຫ້ເຊື້ອພະຍາດ ຫຼື ໄວຣັສ ແຜ່ກະຈາຍໄດ້ດີ ໂດຍສະເພາະແມ່ນກຸ່ມຄົນທີ່ ພູມຄຸ້ມກັນຕໍ່າ ກໍມັກພົບບັນຫາເລື່ອງສຸຂະພາບ ເພາະຮ່າງກາຍອາດຈະປັບຕົວບໍ່ທັນ ບໍ່ວ່າຈະເປັນເດັກນ້ອຍ, ຜູ້ໃຫຍ່ ຫຼື ຄົນທີ່ສູງອາຍຸກໍຕາມ ເຊິ່ງອາການປ່ວຍທີ່ເຫັນໄດ້ຫຼາຍກໍແມ່ນ ໄຂ້ຫວັດ, ໂຣກປອດບວມ, ພູມແພ້, ໂຣກຫອບຫືດ ແລະ ອື່ນໆ.
ເພື່ອໃຫ້ຮ່າງກາຍສ້າງພູມຄຸມກັນທີ່ດີ ແລະ ຫຼີກຫຼ່ຽງອາການເຈັບປ່ວຍ ແລະ ໂຣກຮ້າຍຕ່າງໆ ນີ້ ເຮົາຕ້ອງໃສ່ໃຈເລື່ອງການຢູ່, ການກິນ ໃຫ້ຫຼາຍຂຶ້ນ ເຊັ່ນ:
– ໃສ່ເສື້ອຜ້າທີ່ເໝາະສົມກັບສະພາບອາກາດໃນແຕ່ລະທ້ອງຖິ່ນ ແລະ ແຕ່ລະມື້ ບໍ່ໃສ່ໜາ ຫຼື ບາງເກີນໄປ (ສຳຄັນແມ່ນເດັກນ້ອຍຕ້ອງເອົາໃຈໃສ່ຫຼາຍກວ່າປົກກະຕິ)
– ກິນອາຫານທີ່ມີປະໂຫຍດ: ພະຍາຍາມໃຫ້ຄົບ 5 ໝູ່ ເນັ້ນພືດຜັກ ແລະ ໂປຣຕີນ ໂດຍສະເພາະກໍແມ່ນທາດເຫຼັກ ເພາະຈະຊ່ວຍປ້ອງກັນໄຂ້ຫວັດ ແລະ ເຮັດໃຫ້ຮ່າງກາຍມີພູມຕ້ານທານໄດ້ດີ.
– ພະຍາຍາມຢູ່ໃນບ່ອນທີ່ມີອາກາດຖ່າຍເທດີ ບໍ່ໄປໃກ້ຄົນ ຫຼື ສະຖານທີ່ ທີ່ມີຄົນຕິດເຊື້ອພະຍາດຕ່າງໆ.
– ງົດການດື່ມສິ່ງມຶນເມົາ, ຫຼີກຫຼ່ຽງການສູບຢາ ຫຼື ສິ່ງເສບຕິດຕ່າງໆ ເພາະມັນຈະເຮັດໃຫ້ຮ່າງກາຍອ່ອນແອສ່ຽງຕໍ່ການຕິດເຊື້ອພະຍາດໄດ້ງ່າຍ.
– ຮັກສາສຸຂະສຶກສາໃຫ້ດີ ທັງອາຫານການກິນ, ທີ່ຢູ່ອາໃສໃຫ້ສະອາດ ສຳຄັນໝັ່ນລ້າງມືໃຫ້ສະອາດຢູ່ສະເໝີ
– ດື່ມນໍ້າໃນປະລິມານທີ່ພໍດີ ແລະ ທີ່ສຳຄັນແມ່ນກິນວິຕາມິນເສີມ ເພື່ອໃຫ້ຮ່າງກາຍແຂງແຮງຂຶ້ນ
ນີ້ກໍເປັນພຽງບາງວິທີໃນການຮັກສາສຸຂະພາບໃນຊ່ວງອາກາດໜາວ ເຖິງຕອນນີ້ໃນລາວເຮົາ ອາກາດຈະຍັງບໍ່ໜາວຫຼາຍແຕ່ກໍເລີ່ມປ່ຽນຈາກຮ້ອນແຮງມາເປັນເຢັນລົງແລ້ວ ສະນັ້ນ, ກຽມພ້ອມໄວ້ເປັນການດີ ເພື່ອສຸຂະພາບຂອງຕົນເອງ ແລະ ຄົນທີ່ເຮົາຮັກ ໃຫ້ປອດໄພຈາກພະຍາດ ໂຣກຮ້າຍຕ່າງໆ.