ເມື່ອບໍ່ດົນມານີ້, ຄະນະພັກຮາກຖານ ກຸ່ມພັດທະນານໍ້າບໍ່ ເມືອງໂພນໄຊ ແຂວງຫລວງພະບາງ ໄດ້ສົມທົບກັບອໍານາດການປົກຄອງບ້ານ ແລະ ພໍ່ແມ່ປະຊາຊົນ 5 ບ້ານຄື: ບ້ານນໍ້າບໍ່,ທ່າໂພ,ຫ້ວຍລອນ,ໜອງຄໍາ ແລະ ບ້ານຫ້ວຍສາລາໄດ້ພ້ອມກັນສ້າງຂະບວນການອອກແຮງງານ ສ້ອມແປງເສັ້ນທາງ ເຊິ່ງມີຄວາມຍາວ 17,5 ກິໂລແມັດ ໂດຍໄດ້ພ້ອມກັນເອົາພ້າ,ຈົກ, ຊ້ວນ ແລະ ເຄື່ອງມືທີ່ຈໍາເປັນຕ່າງໆ ມາອອກແຮງງານ ແລະ ຖາງຫຍ້າແຄມທາງ, ຂຸດຮ່ອງລະບາຍນໍ້າ,ສ້ອມແປງເສັ້ນທາງບ່ອນທີ່ເປເພ,ຖົມບວກຂຸມ ແລະ ບ່ອນທີ່ມັນເຈື່ອນໂດຍມີແຮງງານເຂົ້າຮ່ວມທັງໜົດ 550 ຄົນ.
ທ່ານ ຄໍາພຸດ ແກ້ວບຸນມາ ຫົວໜ້າກຸ່ມພັດທະນານໍ້າບໍ່ ເມືອງໂພນໄຊ ໄດ້ໃຫ້ສໍາພາດວ່າ: ໃນວັນທີ 18-29 ສິງຫາ ຜ່ານມາ ໄດ້ເກີດມີຝົນຕົກໜັກຕິດຕໍ່ກັນຫລາຍວັນ ເຮັດໃຫ້ເສັ້ນທາງຄົມມະນາຄົມ ລະຫ່ວາງ ບ້ານຕໍ່ບ້ານ ໄດ້ຮັບຜົນກະທົບ,ເສັ້ນທາງບາງບ່ອນຖືກຕັດຂາດ, ບາງບ່ອນລົດໃຫຍ່ບໍ່ສາມາດທ່ຽວໄດ້,ທໍ່ນໍ້າລອດທາງບາງບ່ອນເປ່ເພເສຍຫາຍ. ສະນັ້ນຈຶ່ງໄດ້ສົມທົບກັບຫ້ອງການໂຍທາທິການ ແລະ ຂົນສົ່ງເມືອງ ໂພນໄຊ ແລະ ພໍ່ແມ່ປະຊາຊົນ ສ້າງຂະບວນການໃນຄັ້ງນີ້ ເພື່ອເຮັດໃຫ້ການສັນຈອນ ພາຫະນະລົດຈັກ ແລະ ລົດໃຫ່ຍສາມາດໄປມາໄດ້ຢ່າງສະດວກ.
Cr. KPL
