Thursday, July 18, 2024
Lenovo

ພາກພູມໃຈ “ຄົບຮອບ 50 ປີແຫ່ງການສ້າງຕັ້ງເມືອງວຽງໄຊ”

ຕາມຫນ້າເພຈຂອງທ່ານ ສຸລິອຸດົງ ສູນດາລາ ຮອງລັດຖະມົນຕີ ກະຊວງວິທະຍາສາດແລະເຕັກໂນໂລຊີ ໃຫ້ຮູ້ວ່າ:

ສະຖານທີ່ແຫ່ງນີ້ ແມ່ນຖິ່ນກຳເນີດຂອງ ສປປລາວ ດິນແດນແຫ່ງການເຕົ້າໂຮມຄວາມສາມັກຄີ ຖານທີ່ໝັ້ນການປະຕິວັດ ດິນແດນວິລະຊົນ ມໍລະດົກປະຫວັດສາດ ແລະ ທຳມະຊາດ” – at 30 ພະຈິກ 1968-2018 ເມືອງວຽງໄຊ ແຂວງຫົວພັນ ສປປລາວ

(1) ເລີ່ມແຕ່ຊຸມປີ 1950, ປິຕຸພູມດິນແດນຂອງເມືອງວຽງໄຊໄດ້ຖືເອົາດິນແດນແຫ່ງນີ້ກາຍເປັນຖານທີ່ໝັ້ນ ແລະ ຊຸບຫຼໍ່ກໍ່ຕັ້ງເຫດການທາງການເມືອງທີ່ສຳຄັນຕ່າງໆຂອງກຳລັງການປະຕິວັດລາວພາຍໃຕ້ການນຳພາຂອງພັກຄອມມູນິດອິນດູຈີນ;
(2) ປະທານ ໄກສອນ ພົມວິຫານ ວິລະບຸລຸດຜູ້ປີຊາສາມາດພ້ອມດ້ວຍໝູ່ຄະນະນັກປະຕິວັດໄດ້ສ້າງຕັ້ງແນວລາວອິດສະຫລະ ແລະ ລັດຖະບານລາວຕໍ່ຕ້ານຂຶ້ນໃນປີ 1950 ຢູ່ຕາແສງໂສຍ ເມືອງໂສຍ (ເມືອງວຽງໄຊໃນປັດຈຸບັນ);
(3) ພາຍໃຕ້ການນຳພາອັນສະຫລາດສ່ອງໃສຂອງພັກ, ແນວລາວອິສະຫລະ ກໍ່ຄືການນຳພາຂອງລັດຖະບານລາວຕໍ່ຕ້ານ, ປະຊາຊົນບັນດາເຜົ່າໄດ້ພ້ອມກັນລຸກຂຶ້ນຕໍ່ສູ້ສາມາດປົດປ່ອຍເອົາ “ແຂວງຫົວພັນ” ອອກຈາກແອກປົກຄອງຂອງພວກສັກດີນາ ແລະ ພວກລ່າເມືອງຂຶ້ນຕ່າງດ້າວໃນປີ 1950;
(4) ພາຍຫຼັງຫັນທິດຕໍ່ສູ້ແຕ່ຕົ້ນຊຸມປີ 1960 ສູນກາງພັກໄດ້ເລືອກເອົາ “ຕາແສງຊຽງຊື້” (ທີ່ຂຶ້ນກັບເມືອງຊຳເໜືອໃນຕອນນັ້ນ) ເປັນທີ່ຕັ້ງຍຸດທະສາດສຳຄັນ ແລະ ສຳນັກງານໃຫຍ່ຂອງສູນກາງໄດ້ຕັ້ງຢູ່ທີ່ນັ້ນ;
(5) ມາເຖີງກາງປີ 1964, ສູນກາງພັກຈື່ງໄດ້ຕົກລົງຍົກຍ້າຍທີ່ຕັ້ງຍຸດທະສາດຈາກ “ບ້ານຊຽງຊື້” ມາຢູ່ “ຖໍ້າຜາຫີນລ້ອງກູ້-ນາໄກ່”, ເພື່ອສ້າງສຳນັກງານໃໝ່ຂອງສູນກາງພັກ ແລະ ສູນກາງແນວລາວຮັກຊາດ;
(6) ເພື່ອເປັນສະດວກແກ່ການນໍາພາຈັດຕັ້ງປະຕິວັດແນວທາງຂອງພັກ, ມາເຖິງວັນທີ 30 ພະຈິກ 1968 ສູນກາງພັກໄດ້ຫັນເອົາ “10 ຕາແສງຂອງເມືອງຊຳເໜືອ ແລະ 01 ຕາແສງຂອງເມືອງໂສຍ” ມາສ້າງເປັນເຂດພິເສດໃຕ້ການຊີ້ນຳໂດຍກົງຂອງສູນກາງພັກ ແລະ ໃນປີດຽວກັນສູນກາງພັກໄດ້ກຳນົດເອົາເຂດນາໄກ່ມາເປັນ “ເຂດພິເສດວຽງໄຊ” ແລະ ເອີ້ນວ່າ “ວຽງໄຊ”;
(7) ກອງປະຊຸມໃຫຍ່ຄັ້ງທີ່ II ຂອງພັກ ປີ 1972 ໄດ້ວາງນະໂຍບາຍສ້າງເຂດປົດປ່ອຍ ໃຫ້ກາຍເປັນລັດໜຶ່ງທີ່ເຂັ້ມແຂງ, ອັນເຮັດໃຫ້ “ວຽງໄຊ” ກາຍເປັນນະຄອນຫລວງແຫ່ງການປະຕິວັດ ແລະ ເປັນສູນກາງແຫ່ງການບັນຊາຂະບວນການຕໍ່ສູ້ປົດປ່ອຍຊາດໃນທົ່ວປະເທດ;
(8) ພາຍຫຼັງປະເທດຊາດໄດ້ຮັບການປົດປ່ອຍ, ສູນກາງພັກ ແລະ ສຳນັກງານອົງການຕ່າງໆຂອງສູນກາງໄດ້ຍົກຍ້າຍເຂົ້າໄປວຽງຈັນໝົດ;
(9) ເພື່ອໃຫ້ແທດເໝາະກັບເງື່ອນໄຂໃໝ່, ໃນຕົ້ນປີ 1976 ສູນກາງພັກຈຶ່ງໄດ້ “ໂຮມເອົາເມືອງໂສຍເຂົ້າກັບເຂດພິເສດວຽງໄຊ” ມາສ້າງຕັ້ງເປັນ “ເມືອງສຳພັນ” (ໃນເມື່ອກ່ອນ) ທີ່ຂຶ້ນກັບແຂວງຫົວພັນ;
(10) ມາເຖິງປີ 1980, ສູນກາງພັກໄດ້ຕົກລົງປ່ຽນຊື່ຈາກ “ເມືອງສຳພັນ” ໃນເມື່ອກ່ອນມາເປັນ “ເມືອງວຽງໄຊ”, ຕາມຊື່ລັບຂອງທ່ານ ປະທານ ໄກສອນ ພົມວິຫານ ຜູ້ລິເລີ່ມເຂດພິເສດເປັນເມືອງສຳພັນ ແລະ ເມືອງວຽງໄຊມາເຖິງປັດຈຸບັນ;
(11) ເປັນການຫວນຄືນເຖິງມູນເຊື້ອຄວາມປີຊາສາມາດ, ສະຫຼາດສ່ອງໃສຂອງພັກ, ລະນຶກເຖິງໄຊຊະນະອັນຍິ່ງໃຫຍ່ຂອງປະຊາຊົນລາວບັນດາເຜົ່າ, ຄຸນງາມຄວາມດີຂອງຜູ້ນໍາ ແລະ ນັກປະຕິວັດໃນເມື່ອກ່ອນທີ່ໄດ້ນຳພາພາລະກິດຕໍ່ສູ້ກູ້ຊາດຈົນໄດ້ຮັບການປົດປ່ອຍ; 
(12) ເປັນການເປີດໂອກາດໃຫ້ປະຊາຊົນລາວ ແລະ ເພື່ອນມິດສາກົນຮັບຮູ້ວ່າເມືອງວຽງໄຊເປັນຖິ່ນກຳເນີດຂອງ ສປປລາວ;
(13) ເພື່ອຕີຖອຍບັນດາປະກົດການຫຍໍ້ທໍ້ເປັນຕົ້ນແມ່ນຄວາມເຂົ້າໃຈຜິດ, ອາຄາດບາດໝາງຂອງກຸ່ມຄົນບໍ່ດີຕໍ່ກັບເມືອງວຽງໄຊ ແລະ ເປີດໂອກາດຍາດແຍ່ງເອົາການສະໜັບສະໜູນຈາກນັກທຸລະກິດທັງພາຍໃນ-ຕ່າງປະເທດເຂົ້າມາລົງທຶນ ແລະ ທ່ອງທ່ຽວໃຫ້ຫຼາຍຂຶ້ນ;
(14) ກົມການເມືອງສູນກາງພັກຈິງໄດ້ຕົກລົງໃຫ້ເມືອງວຽງໄຊຈັດຕັ້ງພິທີສະເຫຼີມສະຫຼອງຄົບຮອບ 50 ປີຂື້ນ ແລະ ຍົກໃຫ້ການສະເຫຼີມສະຫຼອງຄັ້ງນີ້ເປັນວາລະລະດັບຊາດ ໂດຍມອບໃຫ້ເມືອງວຽງໄຊເປັນເຈົ້າພາບ;
(15) ການສະເຫຼີມສະຫຼອງເມືອງວຽງໄຊຈະຈັດຂື້ນເປັນເວລາ 03 ວັນ ເລີ່ມແຕ່ວັນທີ 28-30 ພະຈິກ 2018;
(16) ໃນນັ້ນຈິ່ງຈັດໃຫ້ມີການສະເຫຼີມສະຫຼອງບຸນປະເພນີຊົນເຜົ່າປະຈຳປີໃນສອງມື້ທຳອິດ ແລະ ສະເຫຼີມສະຫຼອງວັນສ້າງຕັ້ງເມືອງວຽງໄຊຄົບຮອບ 50 ປີໃນມື້ສຸດທ້າຍ;
(17) ດັ່ງນັ້ນ, ກົມການເມືອງສູນກາງພັກ ໄດ້ອະນຸຍາດອອກຂໍ້ຕົກລົງແຕ່ງຕັ້ງຄະນະຮັບຜິດຊອບຄະນະຮັບຜິດຊອບລະດັບຊາດ, ຂັ້ນແຂວງ ແລະ ຂັ້ນເມືອງຂຶ້ນເພື່ອບັນຈຸໜ້າວຽກຕ່າງໆໃຫ້ມີຜົນສຳເລັດສູງ;
(18) ພ້ອມກັນນີ້ລັດຖະບານແຫ່ງ ສປປລາວ ໄດ້ອະນຸມັດງົບປະມານເຂົ້າໃນການປະດັບປະດາ ແລະ ບໍລິຫານວຽກງານຕ່າງໆຈຳນວນ 10 ຕື້ກີບ ແລະ ກໍ່ສ້າງປັບປຸງພື້ນຖານໂຄງລ່າງພາຍໃນເທສະບານເມືອງວຽງໄຊຈຳນວນ 09 ໂຄງການ ລວມມູນຄ່າ 24 ຕື້ກວ່າກີບ.

Cr.Sourioudong Sundara

InsideLaos
InsideLaoshttp://insidelaos.com
Online Journalists at insidelaos.com.

More from author

Related posts

ຂໍຂອບໃຈນຳຜູ້ສະໜັບສະໜູນ

Latest posts

ຈົບມໍປາຍ ຈະຮຽນຕໍ່ສາຍໃດດີ?

ເມື່ອກ່ອນ ການສຶກສາຖືໄດ້ວ່າມີບັນຍາກາດຄຶກຄື້ນ ແລະ ເປັນຂະບວນການ ຫຼາຍຄົນແຂ່ງກັນຮຽນ ແຂ່ງກັນເສັງເພື່ອຈະໄດ້ເຂົ້າຮຽນສາຍທີ່ຕົນເອງມັກ ແຕ່ຕົກມາຍຸກປັດຈຸບັນນີ້ ດ້ວຍສະພາບເສດຖະກິດ ສະພາບແວດລ້ອມ ແລະ ຫຼາຍຢ່າງໃນສັງຄົມທີ່ຜັນແປໄປ ເດັກນ້ອຍສ່ວນໃຫຍ່ບໍ່ຢາກທີ່ຈະຮຽນຕໍ່, ບາງຄົນກໍຈຳເປັນຕ້ອງອອກໄປເຮັດວຽກເພື່ອຫາເງິນຊ່ວຍຄອບຄົວ, ຫຼາຍຄົນກໍອອກມາປະກອບກິດຈະການເຮັດທຸລະກິດ ເປັນນາຍຂອງຕົນເອງ ແຕ່ບໍ່ວ່າຈະຢ່າງໃດກໍຕາມ ຖ້າຄົນທີ່ມີເງືອນໄຂກໍຍັງສະໜັບສະໜູນໃຫ້ຮຽນຕໍ່ສາຍວິຊາຊີບໃຫ້ຈົບຈະເປັນການດີທີ່ສຸດ.

ຍຸກນີ້! ຕ້ອງອວດກັນປະຢັດ

ເມື່ອສັງຄົມເຮົາກ້າວເຂົ້າສູ່ຍຸກທີ່ເຂົ້າຍາກມາກແພງ ຫຼາຍຄົນ “ຫາເຊົ້າກິນເຊົ້າ” ບໍ່ແມ່ນ “ຫາເຊົ້າກິນຄໍ່າ” ຄືແຕ່ກ່ອນແລ້ວ ເຄື່ອງໃຊ້ຂອງສອຍຕ່າງໆ ກໍລ້ວນແຕ່ລາຄາສູງຂຶ້ນເທົ່າຕົວ, ເຮົາຍັງຈະພາກັນມາອວດລວຍໂຊລົດສະນິຍົມດີໆ ໃຊ້ຂອງແພງໆ ກິນອາຫານຫຼູຫຼາ ຕາມຄົນມີລາຍຮັບທີ່ໝັ່ນຄົງ ຫຼື ຄົນຮັ່ງມີບໍ່ໄດ້ແລ້ວ

ຊໍາຊຸງ ເປີດໂຕ Galaxy Z Fold6 ແລະ Z Flip6 ຍົກລະດັບ Galaxy Al ລຸ້ນໃໝ່ສໍາລັບໂທລະສັບໜ້າຈໍພັບ.

ຊໍາຊຸງລາວ ເປີດໂຕ Galaxy Z Fold6 ແລະ Z Flip6 ພ້ອມໂປຣໂມຊັນພິເສດສໍາລັບຜູ້ທີ່ສັ່ງຊື້ລ່ວງໜ້າທີ່ Galaxy Experience Space ນະຄອນຫຼວງວຽງຈັນ  ເປິດປະສົບການ Galaxy AI ລຸ້ນຫຼ້າສຸດສໍາລັບໂທລະສັບມືຖືໜ້າຈໍພັບ  ໃຫ້ຜູ້ເຂົ້າຮ່ວມງານໄດ້ສໍາຜັດການໃຊ້ງານໂທລະສັບມືຖືທີ່ທັນສະໄໝ  ຮ່ວມກັບໂມງ Galaxy Watch7 ແລະ ຫູຟັງ Galaxy Buds3/Galaxy Buds3 Pro ເຊິ່ງໄດ້ເປີດໂຕພອ້ມກັນໃນງານ Samsung Unpacked ທີ່ປາຣີ  (Paris) ປະເທດຝຣັ່ງ ໃນວັນທີ 10 ກໍລະກົດ 2024 ທີ່ຜ່ານມາ.