ມື້ນີ້, ທີ່ນະຄອນຫຼວງວຽງຈັນ, ສະພາການຄ້າ ແລະອຸດສະຫະກໍາແຫ່ງຊາດ ຮ່ວມກັບກົມຊັບສິນທາງປັນຍາ ກະຊວງວິທະຍາສາດ ແລະເຕັກໂນໂລຊີ ໄດ້ຈັດກອງປະຊຸມທາບທາມຄໍາເຫັນໃສ່ ຮ່າງຂໍ້ຕົກລົງວ່າດ້ວຍ ການຈັດຕັ້ງປະຕິບັດກົດໝາຍ ວ່າດ້ວຍຊັບສິນທາງປັນຍາ ກ່ຽວກັບ ເຄື່ອງໝາຍການຄ້າ ແລະຊື່ການຄ້າ ໂດຍການເປັນປະທ່ານຂອງທ່ານນາງ ວາລີ ເວດສະພົງ ຮອງປະທານສະພາການຄ້າ ແລະອຸດສາຫະກໍາແຫ່ງຊາດ, ທ່ານ ຫົວໜ້າໂຄງການ, ມີບັນດາຕາງໜ້າຈາກພາກລັດ ແລະເອກະຊົນ, ບໍລິສັດທີ່ປືກສາດ້ານກົດໝາຍ, ສະມາຄົມທຸກລະກິດເຂົ້າຮ່ວມ.
ທ່ານນາງ ວາລີ ເວດສະພົງ ກ່າວວ່າ: ການຈັດກອງປະຊຸມຄັ້ງນີ້ ເພື່ອແນະນໍາໃຫ້ພາກທຸລະກິດ ເຫັນໄດ້ຄວາມໝາຍ ແລະຄວາມສໍາຄັນຂອງເວັບໄຊຈົດໝາຍເຫດຂອງລັດຖະການ ເປັນຕົ້ນ ວິທີການຊອກຫານິຕິກໍາທີ່ມີຜົນບັງຄັບທົ່ວໄປທຸກສະບັບທີ່ໄດ້ປະກາດໃຊ້ແລ້ວ ແລະການປະກອບຄໍາເຫັນໃສ່ຮ່າງນິຕິກໍາທີ່ອົງການສ້າງ ແລະປັບປຸງນິຕິກໍາ ໄດ້ເອົາລົງໃນເວບໄຊດັ່ງກ່າວ. ນອກນັ້ນໃນກອງປະຊຸມໄດ້ຄົ້ນຄ້ວາ, ປືກສາຫາລືເນື້ອໃນຂອງຮ່າງຂໍ້ຕົກລົງແບບເປັນກຸ່ມ ກ່ຽວກັບການຈັດຕັ້ງປະຕິບັດວຽກງານເຄື່ອງໝາຍການຄ້າ ໃນໄລຍະຜ່ານມາ ຊຶ່ງໄດ້ຍົກໃຫ້ເຫັນບັນຫາ, ອຸປະສັກ ແລະສິ່ງທ້າທາຍ ແລະສະເໜີການປັບປຸງແກ້ໄຂ. ສະນັ້ນ ເພື່ອປະກອບສ່ວນເຮັດໃຫ້ເນື້ອໃນຂໍ້ຕົກລົງສະບັບນີ້ ມີຄວາມສົມບູນ, ຄົບຖ້ວນຫຼາຍຂຶ້ນ ທັງສອດຄ່ອງກັບສະພາບຄວາມເປັນຈິງພາຍໃນປະເທດ.
ທັງນີ້ ກໍເພື່ອເຮັດໃຫ້ການເຄື່ອນໄຫວວຽກງານກ່ຽວກັບເຄື່ອງໝາຍການຄ້າ ເປັນຕົ້ນແມ່ນ ຂັ້ນຕອນການຍື່ນຄໍາຮ້ອງຂໍຈົດທະບຽນເຄື່ອງໝາຍການຄ້າ, ການກວດສອບເບື້ອງຕົ້ນ, ການເຜີຍແຜ່ຄໍາຮ້ອງ, ການຄັດຄ້ານຄໍາຮ້ອງ, ການກວດສອບເນື້ອໃນ, ການຈົດທະບຽນ, ການຕໍ່ອາຍຸການປົກປ້ອງ, ການດໍາເນີນການຕ່າງໆ ຫຼັງຈາກການຈົນທະບຽນ, ການທົບທວນຄືນທາງດ້ານບໍລິຫານ ແລະອື່ນໆ ມີຄວາມສະດວກ, ວ່ອງໄວ, ມີຄວາມໂປ່ງໃສ ຮັບປະກັນ ໃຫ້ການຈັດຕັ້ງປະຕິບັດກົດໝາຍວ່າດ້ວຍຊັບສິນທາງປັນຍາ ມີຄວາມເປັນເອກະພາບໃນຂອບເຂດທົ່ວປະເທດ, ແນໃສ່ການຊຸກຍູ້ການດໍາເນີນທຸລະກິດໃຫ້ຂະຫຍາຍຕົວຕໍ່ເນື່ອງ ແລະເຊື່ອມໂຍງເຂົ້າກັບພາກພື້ນ ແລະສາກົນ, ສ້າງສະພາຍແວດລ້ອມທີ່ເອື້ອອໍານວຍໃຫ້ແກ່ນັກລົງທຶນທັງພາຍໃນ ແລະຕ່າງປະເທດ ປະກອບສ່ວນເຂົ້າໃນການພັດທະນາເສດະກິດ-ສັງຄົມຂອງຊາດ.