ໂຄງການຄຸນະພາບຊີ້ນງົວລາວ ໄດ້ຈັດການສາທິດທົດລອງຕົວຈິງໃນການລ້ຽງງົວເປັນຟາມຂອງຊາວກະສິກອນຂະໜາດນ້ອຍ ໃນທ້າຍເດືອນພະຈິກ 2018 ທີ່ຟາມຂອງທ່ານ ພອນແກ້ວ ບ້ານຫີນລັບ ເມືອງສັງທອງ ນະຄອນຫຼວງວຽງຈັນ ມີທ່ານ ບົວຄຳ ສີສົງຄາມ ຮອງເຈົ້າເມືອງສັງທອງ ທ່ານ ສີສະຫວັດ ສິນທະວີ ຮອງຫົວໜ້າພະແນກກະສິກຳ ແລະ ປ່າໄມ້ ນະຄອນຫຼວງວຽງຈັນ ທ່ານ ພັນທະວົງ ວົງສຳພັນ ຜູ້ປະສານງານໂຄງການຄຸນະພາບຊີ້ນງົວລາວ (ນູແວນເຊລັງ) ແລະ ພາກສ່ວນກ່ຽວຂ້ອງເຂົ້າຮ່ວມ.
ການທົດລອງຕົວຈິງຄັ້ງນີ້ ຜູ້ເຂົ້າຮ່ວມໄດ້ຮຽນຮູ້ກ່ຽວກັບລະບົບການລ້ຽງງົວຂອງຊາວກະສິກອນຂະໜາດນ້ອຍ ເຊັ່ນ: ການຈັດການຟາມງົວຊີ້ນທີ່ດີ ການເຮັດຫຍ້າໝັກ ການເຮັດຮົ້ວໄຟຟ້າ ແລະ ປ່ອຍໃຫ້ກິນ ນອກນັ້ນຍັງໄດ້ເນັ້ນໜັກກ່ຽວກັບການຮັກສາສຸຂະພາບສັດ ດ້ວຍການເອົາໃຈໃສ່ສັກຢາວັກຊີນປ້ອງກັນພະຍາດປາກເປື່ອຍລົງເລັບ ພະຍາດເຕົ້າໂຮມເລືອດ ແລະ ອື່ນໆ ການໃຫ້ອາຫານຕ້ອງຖືກຕ້ອງຕາມເຕັກນິກວິຊາການເຕັກນິກ ການຜະລິດຫຍ້າໝັກ ເພື່ອເກັບຫຍ້າແຮໄວ້ໃຫ້ກິນໃນໄລຍະຂາດແຄນຫຍ້າ (ລະດູແລ້ງ) ທັງນີ້ ເພື່ອເປັນການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ຄັ້ງທີ IV ຂອງເມືອງສັງທອງໃຫ້ປາກົດຜົນເປັນຈິງ ໂດຍສະເພາະ ແຜນການສົ່ງເສີມການປູກຝັງ-ລ້ຽງສັດແບບທຳມະຊາດ ຫັນມາສູ່ການນຳໃຊ້ລ້ຽງແບບເປັນຟາມຕາມຫຼັກວິຊາການໃຫ້ນັບມື້ຫຼາຍຂຶ້ນ.
#insidelaos
Cr.Vientianemai