ທີ່ແຂວງສະຫວັນນະເຂດໄດ້ຈັດກອງປະຊຸມປຶກສາຫາລືກ່ຽວກັບແຜນການຄຸ້ມຄອງມໍລະດົກໃນເຂດສໍາປະທານໂຄງການບໍ່ຄໍາ-ທອງເຊໂປນ ຂອງເມືອງວິລະບູລີ ຈັດຂຶ້ນຢູ່ຮ້ານອາຫານລາວເດີມ ນະຄອນໄກສອນ ພົມວິຫານ ແຂວງສະຫວັນນະເຂດ ໃຫ້ກຽດເປັນປະທານໃນພິທີໂດຍທ່ານ ຄໍາພູນ ຕຸໄພທູນ ຮອງເຈົ້າແຂວງສະຫວັນນະເຂດ, ທ່ານ ທອງໃບ ໂພທິສານ ຫົວໜ້າກົມມໍລະດົກ, ທ່ານ ຄໍາສິດ ພົມມະຈັນ ຮອງຫົວໜ້າພະແນກຖະແຫຼງຂ່າວ, ວັດທະນະທໍາ ແລະທ່ອງທ່ຽວແຂວງ, ມີບັນດາພາກສ່ວນທີ່ກ່ຽວຂ້ອງເຂົ້າຮ່ວມ.
ໃນພິທ່ານ ຄຳພູນ ຕຸໄພທູນ ຮອງເຈົ້າແຂວງສະຫວັນນະເຂດກໍ່ໄດ້ກ່າວເປີດກອງປະຊຸມວ່າ:
ຕະຫຼອດເວລາທີ່ຜ່ານມາຕັ້ງແຕ່ມີການດໍາເນີນທຸລະກິດຂອງບໍລິສັດບໍ່ຄຳ-ເຊໂປນ ທີ່ເມືອງວິລະບູລີແຂວງສະ ຫວັນນະເຂດເປັນຕົ້ນມາກໍ່ເລີ່ມມີການຕິດພັນກັບວຽກງານສຶກສາ ແລະ ປະເມີນຜົນກະທົບຕໍ່ກັບມໍລະດົກຂອງຄະນະກຳມະການລະດັບຊາດມາຕັ້ງແຕ່ຕົ້ນຈົນກ້າວມາສູ່ການສ້າງໃຫ້ມີບົດບັນທຶກຄວາມຊ່ວຍຈຳເພື່ອສຶກສາຄົ້ນຄວ້າທາງດ້ານບູຮານວິທະຍາລະຫວ່າງກົມມໍລະດົກ.
ບໍລິສັດລ້ານຊ້າງມິນິໂຣນ ລິມີເຕັດ ແລະ ມະຫາວິທະຍາໄລເຈມສຄຸກປະເທດອົດສະຕາລີ, ມາເຖິງປະຈຸບັນກໍ່ເປັນເວລາ10ກວ່າປີພາຍໃຕ້ການຊີ້ນຳທາງດ້ານວິຊາການຂອງກົມມໍລະດົກ, ກອງບູຮານໂດຍມີການປະສານສົມທົບກັບພະແນກ ຖວທ ແຂວງ, ຫ້ອງການ ຖວທ ເມືອງກໍ່ຄືອຳນາດການປົກຄອງເມືອງວິລະບູລີ ແລະ ບໍລິສັດບໍ່ຄຳ-ທອງເຊໂປນເຊິ່ງໄດ້ເປັນບ່ອງອີ່ງໃຫ້ແກ່ທຸກຝ່າຍໄດ້ພ້ອມກັນຈັດຕັ້ງປະຕິບັດ ແລະ ເຄື່ອນໄຫວຕາມພາລະບົດ ບາດຂອງໃຜລາວພາຍໃຕ້ກອບກົດໝາຍ ມໍລະດົກແຫ່ງຊາດ ແລະ ລະບຽບການຂອງບໍລິສັດບໍ່ຄຳ-ທອງ ເຊໂປນຢ່າງເປັນລະບົບ ແລະ ໄດ້ຮັບຜົນສຳເລັດມາເປັນແຕ່ລະໄລຍະນັ້ນກໍ່ຄືຜົນງານຮ່ວມພວກເຮົາທຸກພາກສ່ວນ.
ໃນໂອກາດນີ້, ທ່ານ ທອງລິດ ຫຼວງໂຄດ ຫົວໜ້າກອງບູຮານວິທະຍາ ກໍ່່ໄດ້ກ່າວລາຍງານຄວາມເປັນມາ ແລະ ຈໍານວນວັດຖຸບູຮານທີ່ຄົ້ນພົບຈາກເຂດບໍ່ຄໍາ-ທອງເຊໂປນ ເມືອງວິລະບູລີ ເຊິ່ງໃຫ້ຮູ້ວ່າ:
ເມືອງວິລະບູລີເປັນຖືໄດ້ວ່າເປັນເມືອງທີ່ມີຄວາມລຶບລັບສັບຊ້ອນໃນທາງດ້ານທໍາມະຊາດເປັນຕົ້ນແມ່ນແຮ່ທອງ, ຄໍາ, ຊືນ, ກົ່ວ ແລະອື່ນໆ, ຍັງມີວັດຖຸບູຮານພາຊະນະເຄື່ອງໃຊ້ໃນສະໄໝອະດີດເກືອບ 2.500 ກວ່າປີກ່ອນ ທີ່ສາມາດຂຸດຄົ້ນໄດ້ໃນລະຫວ່າງການຂຸດຄົ້ນແຮ່ທາດທໍາມະຊາດ. ເຊິ່ງການຂຸດຄົ້ນວັດຖຸບູຮານແມ່ນໄດ້ມາຈາກຫຼາຍແຫ່ງເປັນຕົ້ນແມ່ນການສໍາຫຼວດຂອງຄະນະກໍາມະການ, ຄົ້ນພົບຈາກການລາຍງານຂອງໜ່ວຍງານ (UXO) ໜ່ວຍງານເກັບກູ້ລະເບີດອອກຈາກເຂດສໍາປະທານ, ການຄົ້ນພົບຂອງອໍານາດການປົກຄອງພາຍໃນເມືອງ, ບ້ານ ກໍ່ຄືພໍ່ແມ່ປະຊາຊົນ. ໂດຍເຂດທີ່ຄົ້ນພົບຫຼາຍທີ່ສຸດມີ 3 ເຂດຄື: ເປີ້ນເບົ້າຫຼໍ່, ພູແທ່ງຄໍາ ແລະທົ່ງນາເງືອກ.
ຜ່ານມາສາມາດຄົ້ນພົບວັດຖຸບູຮານທົງມົດທີ່ຄົ້ນພົບທັງຮູບຮ່າງສົບບູນ ແລະບໍ່ສົມບູນຈາກແຫຼ່ງຕ່າງໆພາຍໃນເມືອງມີທັງໝົດ 75.563 ຊິນ/ອັນ/. ໂດຍສ່ວນໜຶ່ງໄດ້ນໍາມາເກັບຮັກສາໄວ້ທີ່ຫໍວັດທະນະທໍາເມືອງວິລະບູລີ ແລະ ອີກສ່ວນໜຶ່ງກໍ່ເກັບໄວ້ທີ່ຫ້ອງການວັດທະນະທໍາຂອງບໍລິສັດລ້ານຊ້າງມິເນໂຣນ ລິມີເຕັດ.
ຈາກນັ້ນ, ທ່ານ ທອງໃບ ໂພທິສານ ຫົວໜ້າກົມມໍລະດົກກໍ່ມີຄໍາເຫັນຕີລາຄາສູງຕໍ່ການປຶກສາຫາລືເພາະເປັນນະ ໂຍບາຍເປັນຫຼັກການ ແລະ ເປັນແຜນການທີ່ຕ້ອງປະຕິບັດຕາມກອງປະຊຸມທີ່ຮັບຮອງເອົາຄວາມຄິດເຫັນ, ຮັບ ຮອງແຜນການນະໂຍບາຍ, ແຜນການຄຸ້ມຄອງມໍລະດົກອັນລໍ້າຄ່າຂອງຊາດທີ່ກຳເນີດເກີດຂຶ້ນໃນແຜ່ນດິນປະ ຫວັດສາດທີ່ມີຊື່ສຽງ, ອັນທີ່ມີຄວາມໝາຍຄວາມສໍາຄັນໃນພາກພື້ນບາງອັນກໍ່ໃນລະດັບໂລກຈຶ່ງສະເໜີບາງຂໍ້ຄິດເຫັນໃຫ້ມີການຈັດແບ່ງວັດຖຸບູຮານການກອບກູ້ຄົ້ນຄວ້າວິໄຈ,ຈາກແຜ່ນດິນວິລະບູລີໃຫ້ທາງເມືອງ, ແຂວງ, ສູນກາງ ໃຫ້ມີຄຳຄິດເຫັນນຳກັນວ່າສິ່ງທີ່ເປັນວັດຖຸບູຮານອັນເກົ່າແກ່ ແລະ ສຳຄັນ ຄວນຢູ່ບ່ອນໃດ ໃຫ້ມີຄວາມຖືກຕ້ອງ ແລະ ສອດຄ່ອງເປັນເອກະພາບກັນ.
ຈາກນັ້ນໃນກອງປະຊຸມກໍ່ໄດ້ມີການປຶກສາຫາລື ແລກປ່ຽນຄຳຄິດເຫັນຕ່າງໆ ເຊິ່ງກັນ ແລະ ກັນຕື່ມອີກ.
ແຫຼ່ງຂໍ້ມູນ: Midia Laos