ກະຊວງການຕ່າງປະເທດໂດຍສົມທົບກັບບັນດາພາກສ່ວນທີ່ກ່ຽວຂ້ອງຂອງລັດຖະບານໄດ້ຈັດພິທີເປີດການບໍລິການນຳໃຊ້ວີຊາອອນລາຍ (eVisa) ຢ່າງເປັນທາງການ ທີ່ສະໜາມບິນສາກົນວັດໄຕ ນະຄອນຫຼວງວຽງຈັນ.
ທ່ານ ສະເຫຼີມໄຊ ກົມມະສິດ, ລັດຖະມົນຕີກະຊວງການຕ່າງປະເທດ ໄດ້ກ່າວວ່າ: ຫວ່າງມໍ່ໆມານີ້ ລັດຖະບານ ແຫ່ງ ສປປ ລາວ ໄດ້ຕົກລົງໃຫ້ມີການພັດທະນາລະບົບອອກວີຊາອອນລາຍ (eVisa) ເພື່ອເປັນທາງເລືອກໃໝ່ໜຶ່ງອີກໃຫ້ແກ່ຄົນຕ່າງປະເທດ ໂດຍແນໃສ່ຊຸກຍູ້ສົ່ງເສີມການພົວພັນຮ່ວມມືໃນດ້ານຕ່າງໆ ກໍ່ຄືການໄປມາຫາສູ່ ລະຫວ່າງ ຄົນລາວ ແລະ ຄົນຕ່າງປະເທດໃຫ້ມີການຂະຫຍາຍຕົວຍິ່ງຂຶ້ນ.
ລະບົບດັ່ງກ່າວນີ້ຈະໄດ້ນຳໃຊ້ໄປຄຽງຄູ່ກັບລະບົບທີ່ປະຕິບັດຢູ່ໃນປະຈຸບັນ, ສໍາລັບລະບົບອອກວີຊາອອນລາຍ ໄດ້ອອກແບບມີລັກສະນະງ່າຍດາຍ, ບໍ່ສັບສົນ, ສາມາດເຂົ້າໃຈງ່າຍ, ມີຄວາມສະດວກ, ວ່ອງໄວ ແລະ ມີຄວາມປອດໄພ ສຳລັບຜູ້ຊົມໃຊ້, ຊຶ່ງທຸກຄົນສາມາດສະເໜີຂໍວີຊາເຂົ້າ ສປປ ລາວ ທາງອອນລາຍໄດ້ທຸກເວລາ ແລະ ທຸກສະຖານທີ່ ທີ່ມີອິນເຕີແນັດ ແລະ ເປັນການປະຢັດຄ່າໃຊ້ຈ່າຍ ຖ້າທຽບໃສ່ການໄປເອົາຢູ່ບັນດາສະຖານທູດ, ສະຖານກົງສຸນໃຫຍ່, ຫ້ອງການກົງສຸນຂອງລາວທີ່ຢູ່ຕ່າງປະເທດ, ລວມທັງເອົາຢູ່ກັບດ່ານສາກົນຕ່າງໆ.
ລັດຖະບານ ໄດ້ອະນຸຍາດໃຫ້ນໍາໃຊ້ 7 ດ່ານ ຄື: ສະໜາມບິນສາກົນວັດໄຕ; ຂົວມິດຕະພາບລາວ-ໄທແຫ່ງທີ 1; ຂົວມິດຕະພາບລາວ-ໄທແຫ່ງທີ 2; ຂົວມິດຕະພາບລາວ-ໄທແຫ່ງທີ 4; ສະໜາມບິນສາກົນຫຼວງພະບາງ; ສະໜາມບິນສາກົນປາກເຊ ແລະ ດ່ານບໍ່ເຕັນ ເພື່ອເປັນດ່ານໃນການຮອງຮັບ ແລະ ບໍລິການສຳລັບຄົນຕ່າງປະເທດທີ່ນຳໃຊ້ວີຊາອອນລາຍ ເຂົ້າມາ ສປປ ລາວ.
ແຕ່ໃນໃນໄລຍະເລີ່ມຕົ້ນ ແມ່ນຈະເລີ່ມໃຫ້ບໍລິການຢູ່ 2 ດ່ານຄື: ສະໜາມບິນສາກົນວັດໄຕ ແລະ ຂົວມິດຕະພາບລາວ-ໄທແຫ່ງທີ່ 1, ຊຶ່ງໃນປະຈຸບັນ ຜູ້ທີ່ໃຊ້ວີຊາອອນລາຍ ສາມາດເຂົ້າ ສປປ ລາວ ໄດ້ ໂດຍຜ່ານ 2 ດ່ານ ຕາມ Website:www.laoevisa.gov.la, ຫຼັງຈາກນັ້ນ, ໃນເວລາອັນໃກ້ນີ້ ຈະຂະຫຍາຍລະບົບໄປສູ່ດ່ານອື່ນທີ່ຍັງເຫຼືອ ຈົນກວ່າສໍາເລັດທັງໝົດ 7 ດ່ານ.
ສ່ວນໄລຍະທີ 2 ຈະໄດ້ມີການຄົ້ນຄວ້າ ແລະ ສະເໜີຂໍອະນຸມັດ ຈາກລັດຖະບານ ໃນການສືບຕໍ່ພັດທະນາ ຢູ່ດ່ານສາກົນອື່ນ ໃນຂອບເຂດທົ່ວປະເທດ, ໂດຍອີງໃສ່ເງື່ອນໄຂ ແລະ ຄວາມຈໍາເປັນຕົວຈິງໃນອະນາຄົດ.
ການຈັດຕັ້ງປະຕິບັດລະບົບອອກວີຊາອອນລາຍນີ້ ຈະເປັນສິ່ງກະຕຸກຊຸກຍູ້ການພົວພັນຮ່ວມມືໃນດ້ານຕ່າງໆ ລະຫວ່າງ ລັດຖະບານ ກໍຄືອົງການຈັດຕັ້ງຕ່າງໆ ຂອງ ສປປ ລາວ ກັບ ປະເທດຕ່າງໆ ທີ່ບໍ່ມີສັນຍາຍົກເວັ້ນວີຊາ ກັບ ສປປລາວ ໃຫ້ມີການຂະຫຍາຍຕົວແຂງແຮງກວ່າເກົ່າ, ໂດຍສະເພາະໃນດ້ານການທ່ອງທ່ຽວ, ຊຶ່ງຈະເປັນການປະກອບສ່ວນອັນສຳຄັນເຂົ້າໃນການພັດທະນາເສດຖະກິດ-ສັງຄົມຂອງ ສປປ ລາວ ໃນສະເພາະໜ້າ ແລະ ຍາວນານ.
ເຂົ້າຮ່ວມໃນພິທີເປີດຢ່າງເປັນທາງການ ແມ່ນ ທ່ານ ສອນໄຊ ສີພັນດອນ, ຮອງນາຍົກລັດຖະມົນຕີ ແຫ່ງ ສປປ ລາວ, ທ່ານ ສະເຫຼີມໄຊ ກົມມະສິດ, ບັນດາຮອງລັດຖະມົນຕີ, ທູຕານຸທູດ ແລະ ຜູ້ຕາງໜ້າຈາກອົງການຈັດຕັ້ງສາກົນ ປະຈຳ ສປປ ລາວ ເຂົ້າຮ່ວມ 100 ກວ່າທ່ານ.
ແຫຼ່ງຂໍ້ມູນ: ໜັງສືພິມວຽງຈັນທາຍ Lao Press in Foreign Languages
ຂ່າວ: ສຸກນີລັນດອນ
ພາບ: ຄຳພັນ
